Ñahendu Jesús Ñe’ẽ. Martes 27º Durante el Año
5 octubre, 2026Ñahendu Jesús Ñe’ẽ. Jueves Semana 27º Durante el Año
7 octubre, 2026
Escucha el evangelio y la reflexión en: https://youtu.be/6qfc3DndaZo
7 octubre: Tupãsy Rosario ára. Lucas 1, 26 – 38
Ha 6 mése haguépe, Ñandejára omondo ánhel Graviélpe Nazarétpe, opytáva Galiléape. María, peteĩ kuñataĩ marã’ỹ, oikómiva upépe. Ha’e niko ome’ẽma va’ekue iñe’ẽ omenda haguã Josére. José niko David ñemoñare va’ekue.
Ñandejára ánhel oike pe María oĩháme ha he’i chupe: — Maitei María. Ñandejára nderovasa. Ñandejára oĩ ne ndive.
María oñemondýi opytávo. Ha oikuaase mba’épa he’iséne pe maitei upéva.
Ñandejára ánhel he’i chupe: — Ani rekyhyje María. Ñandejára niko tuicha nde rovasa. Nde rye guasúta hína, ha ne membýta. Rembohérata pe mitã Jesús. Pe mitã tuicha mba’éta hína, ha oje’éta hese: “Ñandejára Yvatetegua Ra’y”. Ha Ñandejára omoĩngóta chupe Rey ramo, ijypykue Davídcha. Ha’e oisãmbyhýta hetã Israel opa árape guarã.
María oporandu Ñandejára ánhelpe: — Mba’éichata piko péicha, ko che ne’ĩrava amenda.
Ñandejára ánhel katu he’i chupe: — Espíritu Santo rupíta hína péva. Ñandejára Yvatetegua ne añuãta ipokatúpe. Upévare, pe mitã hérata Ñandejára Ra’y Marangatu.
Ha ne príma Isabel imembýta hína avei, iguãiguĩma ramo jepe. Ku oje’e va’ekue ndaikatuiha imemby, ojapóma hína 6 mése hye guasuha. Ñandejárape guarã niko ndaipóri ikatu’ỹva.
Upépe María osẽ he’i: — Che niko Ñandejára rembiguaimínte. Tojapo che rehe pe ere háicha. Ha Ñandejára ánhel oho.
Ñandejára Jesucristo ñe’ẽ
ÑAMBOGUEJY ÑANDE REKOVÉPE
“Los astros del firmamento pe yvága omyataindy, todas las planta ipoty, henyhẽ de mil contento”. He’i ningo Emiliano R. Fernández purahéi. Ha la Emiliano ndaje ñembo’e ýva voi raka’e imitãrusúpe. Ha oiméne ko pe rosario oñembo’e jave ohecha umi tataindy ojajái ha otitipáva umi estrella yvagapeguáicha.
Ha péicha ningo ñande ñañembo’e jave pe rosario, ñamomaiteívo ñande sy Tupãsýme, jaipápavaicha estrella henondépe, jahechápa nomboguejýi ñande jyva ári pe imemby Jesús porãite asy, Ñandejára gracia gui henyhẽva, ñande rovasa ha ñanemoirũ haguã ñande rekovépe, ombovevúi haguã ñandéve opa mba’e.
Ha péicha umi rosario ra’ỹi jaipapávo ñanemandu’a jahávo Jesucristo rembiasakuére, ñande resapéva ha ñanerekombo’éva. Ha upéicha ñande sy Tupãsy del Rosario hína ñanembo’ehára, ohechaukáva tape jaguata haguã imemby Jesús ndive. Oiko haguã ñande hegui Jesús irũ añete, ha’e oiko hagueichaite.
Pa’i Alberto Luna.