Ñahendu Jesús. San José ára

Escucha el evangelio y la reflexión en: https://youtu.be/fdWNwA0VFcg

19 de marzo: San José ára Mateo 1, 16. 18-21. 24

Jacob, José ru; ha José, María ména. María niko hína Jesús, hérava Kirito, sy. Jesucristo onase ramo guare niko kóicha vaekue. María, Jesús sy, ome’ẽ va’ekue iñe’ẽ Josépe, omenda haguã hese. Ha oiko mboyve hikuái oñondive, María ou hye guasu.

José niko kuimba’e joheipyre vaekue, nomoherakuã vaiséiva Maríape opavave rovake. Kirirĩhámente ohejáta kuri chupe, avave oikuaa’ỹre.

Ko’ã mba’e ombojere aja iñakãme, ojehechauka sapy’a chupe iképe Ñandejára ánhel, ha he’i chupe:— José, ani ndepy’a mokõitei remenda haguã Maríare. Pe mitã ha’e oguerekótava niko Espíritu Santo rupi ou. Ágã María imemby vove, rembohérata pe mitã Jesús. Ha’e hína upe osalvátava hetãguápe ipekádogui.

José opáyvo, ojapo Ñandejára ánhel he’i haguéicha chupe, ha omenda Maríare.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñande niko jajapose upe jaipotávante, ñañandu ha jahecha háicha ñande py’ápe. Ha pévante avei jaipota ojerure ñandéve jajapo haguã ñande patrón. Upe ñande vevúi hápe ha ñandegusta hápe ñane ñe’ẽrendu ha jajapo oje’éva ñandéve. Sapy’ánte oje’éramo ñandéve jajapo haguã ndajajaposéiva, upépe ipohýi ha ijetu’u pe ñe’ẽrendu.

Ha upépe añete ojekuaa añetépa ñaneñe’ẽ rendu, ha jajapópa ñande py’aite guive pe ñande ruvicha ojeruréva ñandéve nañandegustáiramo jepe.

Jahecha San José ojuhu hembirekorã Maríape hye guasuha, ha oiméma oheja haguãicha chupe avave oikuaa’ỹre. Ha upépe Ñandejára remimbou ojechauka chupe iképe ha he’i chupe ani haguã ojapo pe orekóva iñakãme.

Ani oheja Maríape, omoguahẽ haguã chupe hógape hembirekorã ha oñangareko haguã pe mitãre, ndaha’éiramo jepe imba’e. Ha’e hína Ñandejára remimbou ohovasátava upe tetãme. Ha upépe San José ohechauka ñandéve ñe’ẽ rendu Ñandejárape. Tenonderã ojerovia rupi iñe’ẽre, ha upéi katu ojapo haguére pe ánhel he’íva chupe, oñandúramo jepe ijetu’uha.

Ajépa niko che irü ha che reindy sapy’ánte ñamboguata haguã ñande rogapy, ñande familia, ñane komunida, jahupi va’erã ñande apére tembiapo ijetu’u ha ipohýiva. Sapy’ánte avave oikuaa ha ohechakuaa’ỹre ñandéve. Ñane mandu’a San Josére upéicha jave. Heta ipohýi ha iro kuéte ohupi vaekue ijapére ha oipykúi kirirĩ ha kañymbýpe, hógagua, Jesús, ha hembireko María rayhupápe.

Pa’i Alberto Luna.