SÁBADO XIV DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Génesis arandukápe oĩ háicha 27, 1-5. 15-29

Isaac itujáma ha ndohechavéi. Upérõ ohenói ita’ýra ypykue Esaúpe ha he’i ichupe: Che ra’y.
Ha’e he’i: Mba’épa taita?

He’i Isaac: Che tujáma ha ko’ẽrõ itéma amanóne. Upévare aipota reho ka’aguýpe nde hu’y kuéra reheve ha rejuka peteĩ tymba chéve guarã. Embojy che ha’use háicha ha eru chéve.

Upéi rohovasáta amano mboyve. Isaac oñe’ẽ aja Esaúpe, Rebeca ojapysaka hína. Esaú osẽ rire, ohenói Jacóbpe ha he’i ichupe: Upéi ogueru umi Esaú ao iporãvéva ha’e oñongatúva hógape ha omonde Jacob rehe. Umi kavara ra’y pirekuépe ojaho’i ipo ha ijajúra. Upéi ome’ẽ ichupe upe tembi’u ityrarã reheve.

Jacob oike itúva rendápe ha he’i ichupe: Taita.

Ha’e oporandu ichupe: Máva piko nde che ra’y?

Ha’e he’i: Che hína nde ra’y ypykue Esaú. Ajapóma ere va’ekue chéve. Epu’ã eguapy nde rupápe, ha he’u ko arúva ndéve. Upéi che rovasa.

Itúva he’i: Pya’ete piko rejuhu che ra’y!

Ha’e he’i: Hẽe. Tupã nde Jára che pytyvõ ajuhu haguã.

Isaac he’i: Eñemboja ta pokomi nde rehe. Nde piko añete che ra’y Esaú?

Jacob oñemboja itúva Isaac rendápe. Ha’e opoko hese ha he’i: Ne ñe’ẽ ojogua Jacob ñe’ẽme, nde po katu Esaú pópe.

Ndoikuaái ichupe, ipo raguepágui ityke’ýraicha. Ohovasa mboyve ichupe katu, oporandu jevy: Añetehápe piko nde hína che ra’y Esaú?

Jacob he’i: Hẽe.

Upéi he’i Isaac: Eru chéve che rembi’urã, ta’u ha to rohovasa.

Jacob omoĩ itúvape ho’u haguã. Ome’ẽ avei ichupe vino.
Upéi Isaac he’i: Eñembojave, ha che retü che ra’y.

Ojapóvo upéicha, itúva ohetũ ijao ryakuãngue ha upéi ohovasa ichupe kóicha: “Kokue ryakuãngue Tupã Ñandejára ohovasáva, upévako hína che ra’y ryakuã.

To me’ẽ ndéve Tupã Ñandejára upe yvy hi’áva, to me’ẽ ysapy ha trígo. Ha vino ñane mbovy’áva ta heta ha ta hembypa.

Ne rembiguái ramo toiko táva kuéra ha ne renondépe to jayvy tetã. Nde sy memby kuéra járake ta ndénte, ha ne renondépe to jayvy joa. Nde rehe ojahéiva toiko ijaheipýrõ, ha nde rovasáva to jehovasa.”

Tupã Ñandejára Ñe’ẽ.

SALMO ÑEMBOHOVÁI 134, 1-6

Opavave: To ñemomba’e guasu Tupä Ñandejára, ha’e ipy’a porã.

To ñemomba’e guasu Tupã Ñandejára.
Pemomba’e guasu Tupã Ñandejára réra,
umi hese ojeroviáva, umi tupaópe hembiapóva,
ha umi tupao pepo guýpe oĩva. O.

Pemomba’e guasu Ñandejárape,
ha’e niko ipy’a porã, héra peropurahéi,
ha’e niko imba’e recha kuaa. O.

Che aikuaa porã Tupä Ñandejára tuichaha, Tupã tuichave opa ambue tupãnguéragui.
Tupã Ñandejára niko ojapo ojaposéva, yvága ha yvýpe, yguasu ha upe huguápe.O.

ALELUIA Jn 10, 27

Aleluia.
Tupã Ñandejára he’i: “Che ovechakuéra ohendu che ñe’ẽ, che aikuaa ichupekuéra ha ha’ekuéra oho che rapykuéri.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha

9, 14-17

Upe ramo Juan Bautista remimbo’e kuéra oñemboja Jesús rendápe, ha oporandu ichupe: Fariséokuéra ha ore ave, niko rohasa jepi ára ro’u’ỹre mba’eve. Mba’ére piko ne remimbo’ekuéra nda upéichai?

Jesús he’i ichupe kuéra: Peẽ piko peimo’ã peteĩ omenda ramóva irũ nguéra oñembyasytaha ha’e oĩ aja hendive kuéra imendahápe? Nahániri. Ãgante oguahẽne ára ipore’ỹvo ha’e, ha upépe katu ohasáne ho’u’ỹre mba’eve.

Avave niko nombovyvýi ao pehẽngue pyahu ao tujáre. Pe ipyahúva oñyñýine ha omondoro jevýne pe itujáva, ha upekuévo omondoro tuichave.

Vino pyahu niko noñembohyrúi vino ryru tujápe. Péicha ojejapórõ umi vino ryru osoróne ha oñehundíta pe vino ha umi hyru. Upévare, vino oñembohyru va’erã vino ryru pyahúpe, ha péicha mokõivéva oiko aréta oñemboai’ỹre.

Ñandejára Jesucristo Ñe’ẽ