LECTURAS SÁBADO XVII DEL TIEMPO ORDINARIO

LECTURAS SÁBADO XVII DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Levítico arandukápe oĩ háicha 25, 1. 8-17

Tupã Ñandejára he’i Moiséspe yvyty Sinaí ru’ãme: Peipapa 7 jevy 7 áño, to mbyapu’a 49 áño. Jeheja rei árape, upéva hína ára 10 mes 7hápe hérava Tisri, to ñembopu trompéta tetã pýre.

Péicha pemboykéta Tupä Ñandejárape guarã pe áño 50ha, ha pemoerakuãta ñesãsõ opa tetã guápe guarã. Ko áño pukukue, opaichagua yvy to ñeme’ẽ jevy ijára ypykuépe ha to jepoi jevy opa tapichágui oiko va’ekue tembiguái ramo, oho jevy haguã rogagua kuéra ndive.

Ani peñemitỹ pende kokuépe térã pemono’õ pe trígo okakuaáva ijehegui, térã parral a pende parralty noñehakã’ói va’ekuégui. Ko áño oñemboyke chéve guarã. Pe heñói va’ekue pende kokuépe ijehegui ae, upévante pe’u.

Ko áñope, opa yvy oñeme’ẽ va’ekue plátare to ñeme’ẽ jevy ijára ypy kuépe. Ha upévare, peme’ẽ ramo plátare pende yvy pende rapicha Israelguápe térã pejogua ichugui ijyvy, ani pejapo hekope’ỹ.

Oñemoĩ haguã pe yvy repy to ñema’ẽ mboy áñopa hemby gueteri ojehupity haguã pe 50. Hetave hemby ramo hepyvéta pe yvy, mbovyve ramo ivaratovéta. Pe oñeme’ẽva plátare niko hína, kóga’a oñerenohẽtava pe yvýgui.

Ani avave ombotavy hapichápe. Pehechauka pemboajeha pende Járape, che niko hína Tupã pende Jára.

Tupã Ñandejára Ñe’ẽ.

SALMO ÑEMBOHOVÁI 66, 2-3. 5. 7-8

Opavave: Tupã Ñandejárape to purahéi vy’a pópe tetãnguéra.

Tupã Ñandejára ta ñande poriahuvereko,
ha ta ñande rovasa, to ma’ẽ ñande rehe,
to jekuaa opa rupi hembipota,
ha opa tetã rupi ha’e oporope’aha jejopy vaígui. O.

Opavave ta ne momba’e guasu,
to purahéi vy’a pópe tetã nguéra,
resaimbyhýgui opavave tekojojápe,
hekopete remboguata tetãnguéra yvy ári. O.

Yvy ome’ẽ hi’a, Tupã Ñandejára, ñande ru, ñande rovasa.
Tupã Ñandejára ta ñande rovasa,
ha to ñemomba’e ichupe ko yvy jerekuévo. O.

ALELUIA Mt 5, 10

Aleluia.
Ovy’a va’erã umi oñemo akäsäséva ichupekuéra ojapo haguére teko joja, ichupekuéra niko oñeme’ẽta Sambyhy Yvágape oïva.
Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 14, 1-12

Upe ramo umi árape Herodes, mburuvicha guasu Galiléa pegua, ohendu umi mba’e Jesús ojapóva, ha he’i hembiguái kuérape: Upéva niko Juan Bautista hína, opu’ã jeýva omanóva apytégui. Upévare ipokatu ojapo haguã umi mba’e hechapyrãva.

Herodes niko ojopyuka va’ekue Juánpe yvyra kuápe ha ombotyuka ichupe koty ypytũme. Herodes niko omenda va’ekue Herodías, tyvýra Filipo rembirekóre, ha Juan he’íva Heródespe: Ndaikatúi remenda Herodías rehe.

Herodes ojukase va’ekue Juánpe. Okyhyjénte opavavégui, ha’e kuéra oguerekógui Juánpe maranduhára ramo.

Ha Herodes hi’ára mbotyha árape, Herodías membykuña osẽ ojeroky Herodes ha opa umi upépe oĩva renondépe. Herodes oguerohory eterei pe ijeroky, ha Tupã rérare he’i, ome’ẽne haguã ichupe oimeraẽ mba’e ha’e ojeruréva.

Pe mitãkuña he’i haguéicha ichupe isy, he’i Heródespe: Ko’ágã ite aipota reme’ẽ chéve peteĩ ña’ẽmbépe Juan Bautista akãngue.

Upéva tuicha oguapy mburuvicha guasu Herodes rehe. Ha ome’ẽ haguére iñe’ẽ opavave rovake nda ikatúi opyrũvo hese.

Upévare ojapo pe mitãkuña ojeruréva. Ha oñakã’ouka Juánpe oĩva hína koty ypytũme, ha ogueru hikuái iñakãngue peteĩ ña’ẽmbépe ha ome’ẽ pe mitãkuñáme. Ha’e ogueraha ha ome’ẽ isýpe.

Upéi oho Juan remimbo’e kuéra ha ogueraha hetekue ha oñotỹ. Upéi oho omombe’u hikuái Jesúspe mba’épa ojehu.

Ñandejára Jesucristo Ñe’ẽ.