LECTURAS VIERNES SEMANA 25º DURANTE EL AÑO

LECTURAS VIERNES SEMANA 25º DURANTE EL AÑO

Ko’ágã ñahendúta Tupã Ñandejára ñe’ẽ Eclesiastes arandukápe oĩ háicha     3, 1-11

Ko arapýpe opa mba’e hi’ára; opa mba’e oikóva peguarã oime hi’ára:

Ára ojeikove ypy haguã ha ára oñemano haguã, ára oñeñemitỹ haguã ha ára oñemono’õ haguã temitỹngue.

Oime ára ojeporojuka haguã ha ára oñeporomonguera haguã.

Peteĩ ára oñembyai haguã ha peteĩ ára ojejapo haguã.

Ára oime haguã opukáva.

Ára oime haguã hasẽva.

Ára oñembyasy haguã omanóva ha ára oñeime haguã vy’ápe.

Ára oñemyasãi haguã ita ha ára oñemono’õ haguã.

Ára oñeañuã haguã ha ára ojejei haguã ojuehegui.

Ára oñeñeha’ã haguã ha ára ojeheja haguã ojejapóva.

Ára oñeñongatu haguã ha ára oñemombo haguã.

Ára oñemondoro haguã ha ára oñembovyvy haguã.

Ára oñekirirĩ haguã ha ára oñeñe’ẽ haguã.

Ára mborayhúpe guarã ha ára ro’yrõme guarã.

Ára ñorairõme guarã ha ára ñorairõve’ÿme guarã.

Mba’épa oguenohẽ yvypóra hetaite omba’apo haguégui? Ahecha kuaa pe mba’e pohýi omoĩva Tupã Ñandejára yvypórape omotĩndy haguã. Ha’e, hi’árape porã, opa mba’e ojapo iporãva; omoĩ avei yvypóra akãme mba’e pave’ỹ ndaikatúi ramo jepe oikuaapa Tupã Ñandejára ojapo va’ekue  ha ojapo va’erã.

Tupã Ñandejára Ñe’ẽ.

SALMO ÑEMBOHOVÁI 143, 1a. 2-4

Opavave: To ñemomba’e guasu Tupä Ñandejára

To ñemomba’e guasu Tupä Ñandejára!

Ha’e upe che mbokatupyrýva ñorairõrã.

Ha’e ipy’a porã che ndive ha che mo’ã,

oñangareko che rehe ha che nohẽ jejopy vaígui. O.

Ha’e ha upe omoĩva tetã nguéra che po guýpe.

Tupä Ñandejára, mba’e piko yvypóra ne mandu’a haguã hese?

Máva piko yvypóra remomba’e eterei haguã?

Hekove ipytuhẽicha mbyky, ku kuarahy’ãicha pya’e ohasa. O.

ALELUIA Mc 10, 45

Aleluia.

Che yvypóraicha aju va’ekue aikóvo tembiguai ramo

ha ame’ëvo che rekove mayma yvypóra rayhupápe.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha 9, 18-22

Peteĩ jevy, Jesús oñembo’e jave hína ha’eño, ha hemimbo’e kuéra oĩ hendive, oporandu ichupe kuéra: Mavaha che piko oje’e?

Ha’e kuéra he’i ichupe: Oĩ he’íva ndeha Juan Bautista. Oĩ he’íva ndeha Elías, ha oime katu he’íva ndeha peteĩva umi maranduhára yma guare oikove jeýva.

Jesús oporandu ichupe kuéra: Ha peẽ piko mba’e peje, mávapa che?

Ha Pedro he’i: Nde hína upe Mesías, Tupã Ñandejára rembiporavo.

Jesús katu heta he’i hemimbo’ekuérape ani haguã omombe’u upéva avavépe.

Ha he’i: Che, yvypóraicha aju va’ekue, ahasa asy mante va’erã, ha ojahéita che rehe umi moakãhára, umi pa’i ruvicha ha umi Moisés rembiapoukapy mbo’eha. Che jukáta hikuái, ha mbohapy ára rire aikove jevýta.

Ñandejára Jesucristo Ñe’ẽ