LECTURAS JUEVES SEMANA 25º DURANTE EL AÑO

LECTURAS JUEVES SEMANA 25º DURANTE EL AÑO

Ko’ágã ñahendúta Tupã Ñandejára ñe’ẽ Eclesiastés arandukápe oĩ háicha      1, 2-11

Tavy reko poru rei, tavy reko poru rei!

Mba’épa oguenohẽ yvypóra imba’apo reta itégui ko arapýpe?

Oime onaséva, oime omanóva, yvy katu ndoikovéi araka’eve.

Osë kuarahy, oike kuarahy, ha ojevy hendaguépe osẽ jevy haguã. Yvy gotyo oipeju yvytu ha ojere upéi yvate gotyo.

Ojere ha ojere pe yvytu! Ojere ha ojere jevy!

Ysyry maymáva ho’a yguasúpe ha yguasu máramo nahenyhẽi.

Ysyry ojevy pe osẽ haguégui, oipykúi jevy tape oguata haguénte.

Avave ndaikatúi he’i mba’éicha ite pevépa ñane monguerái opa mba’e.

Mba’eve ndaipóri ñahendu ha jahecháva ñane mbohory porã va’erã. Ndaipóri chéne mba’eve ymave oĩ’ỹ va’ekue.

Mba’eve ndojejapói chéne, ymave ojejapo’ỹ va’ekue.

Yvy apére ndaipóri mba’eve ipyahúva!

Oime va’erã katu ete he’íva: “Kóva katu mba’e ipyahúva”

Jepevénte upéva oiméma va’ekue  are ñande ñaime mboyve.

Umi mba’e ohasávagui tesarái oiko, ha tesaráipe ho’áne mba’e tenondegua, umi ou va’erã upe rire apytépe.

Tupã Ñandejára Ñe’ẽ.

SALMO ÑEMBOHOVÁI   89, 3-6. 12-14. 17

Opavave: Ore Jára, eju ore rendápe

Nde upe yvypórape remondóva oiko haguã ichugui  yvy

ichupekuéra erévo: “Tapeho jevy yvýpe pepa.”

Mil áño ndéve guarã ku ohasa va’ekuéicha, opa jeýmava,

térã ku pyhare mbykýicha, pya’e ohasáva. O.

Ku jake ramo guáicha sapy’a ite reraha ichupekuéra, ku ñana heñói vaicha, ko’ẽ vove.

Pyhare heñói ha ipoty, ka’aru haviru ha ipiru. O.

Ehechauka ore rekove mbykyha ikatu haguã ore akã guapy.

Ore Jára, eju ore rendápe!

Araka’e peve piko reñe ha’arõukáta?

Ore poriahuverekóna, ore niko ne rembiguái hína. O.

Ára ko’ẽre ore moenyhẽ ne mborayhúgui

ikatu haguã ore py’a rory roikove aja pukukue.

Tupã Ñandejára imba’e porãva ta ñande rovasa

ha ta ñane pytyvõ ñasë porã haguã opa mba’épe. O.

ALELUIA Jn 14, 6

Aleluia.

Ñandejára Jesucristo he’i:

“Che hína pe Tape, Añetegua ha Tekove.

Avave ndohói che Túva rendápe ndaha’éi ramo che rupi”.

Aleluia.

EVANGELIO

Marandu porã ñahendúta Ñandejára Jesucristo rekove ha hemimbo’e San Lucas omombe’u háicha  9, 7-9

Upe ramo mburuvicha guasu Herodes ohendu opa ite mba’e oikóva, ha ndoikuaái mba’épa ojapóta, oĩgui he’íva Juan oikove jevy hague. Ambue katu he’i, ou hague maranduhára Elías, ha ambueve katu, oimeha maranduhára yma guare oikove jeýva.Ha Herodes he’i:

Chete ha’e va’ekue  oñeñaka’õ haguã Juan. Máva piko aipórõ pe heta ite mba’e oñemombe’uha?

Upévare Herodes oñeha’ã ohecha Jesúspe.

Ñandejára Jesucristo Ñe’ẽ