VIERNES XII DEL TIEMPO ORDINARIO

Ko’ágã ñahendúta Tupã Ñandejára ñe’ẽ Génesis arandukápe oĩ háicha   17, 1. 4-5. 9-10. 15-22

Abram oguereko ramo 99 áño, Tupã Ñandejára ojechauka ichupe ha he’i: “Che ha’e Tupã Ñandejára ipu’akapáva, eikóke aipota háicha ha eñeha’ã ne marangatu.

Tupã Ñandejára he’i jevy Abrahámpe: Nde ha ne ñemoñarekuéra avei pejapóta che ñe’ẽ me’ẽ. Nde ha ne ñemoñare kuimba’éva guive pejeapi’óta.

He’i avei Tupã Ñandjára Abrahámpe: Ne rembireko ndahéra mo’ã véima Sarai. Hérata Sara.

Ahovasáta ichupe ha imembýta nde hegui peteĩ mitã kuimba’e. Oikóta ichugui  tetãnguéra sy ypykue ha mburuvicha guasu kuéra osẽta iñemoñare apytépe. Abraham ojeity yvýre ha opuka ha he’i ipy’apýpe: “Karai tuja oguerekóva 100 áño piko ita’ýrata, ha Sara oguerekóva 90 áño piko imembýta?”

Ha he’i Tupã Ñandejárape: Che ra’y Ismaélpe rehovasa ramo iporãma chéve. Tupã Ñandejára katu he’i ichupe: Nahániri. Ne rembireko Sáragui nde ra’ýta ha rembohérata Isaac. Hendive ha iñemoñare ndive amo añetéta che ñe’ẽ me’ẽ opa árape guarã.

Ne mandu’a niko kuri nde ra’y Ismael rehe; ichupe avei ahovasáta ha iñemoñare heta etereíta. Ichugui  osẽta 12 mburuvicha guasu ha ajapóta tetã nde tuicháva iñemoñare kuéragui. Amoañetéta che Ñe’ẽ me’ẽ nde ra’y Isaac, Sara ome’ẽtava ndéve ko áragui áñope. Tupã Ñandejára oñe’ẽmba rire Abraham ndive, oho.

Tupã Ñandejára Ñe’ẽ.

SALMO ÑEMBOHOVÁI 127, 1-5

Opavave: Revy’a va’erã Tupã Ñandejára rehe rejerovia ramo.

Revy’a va’erã Tupä Ñandejára rehe rejerovia ramo, ha reiko ramo ha’e oipota háicha.

Nde ry’ái repykuégui rekarúne, revy’áne, ha opa mba’épe resẽ porãne. O.

Nde róga pýpe ne rembireko ojoguáta ku parral hi’a hetávape.

Ne mesa jerére katu nde ra’y ha nde rajykuéra

ojoguáta umi yvyra roky pyahúpe. O.

Kóicha ojehovasáta upe Tupä Ñandejára rehe ojeroviáva.

Tupã Ñandejára ta nde rovasa Sión guive reikove aja pukukue.

Reikovéta rehecha haguã mba’éichapa Jerusalén opu’ã. O.

ALELUIA Mt 8, 17

Aleluia.

Cristo ojapyhy ñande reko kangykue ha ohupi ijapére ñane mba’asy eta.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha 8, 1-4

Upe ramo Jesús oguejy yvytymígui ha heta umi ohóva hapykuéri. Oñemboja hendápe peteĩ kuimba’e ijaipáva, ha oñesũ henondépe ha he’i ichupe: Che Jára, nde reipotárõ che mongueráne che mba’asýgui.

Jesús opoko hese ha he’i ichupe: Aipota. Ekuera!

Ha upepete, ojei ichugui  ikuru vai, ha okuera.

Ha Jesús he’i ichupe: Aníke emombe’u avavépe. Tereho uvei ejehechauka pa’ípe, ha eikuave’ẽ Tupã Ñandejárape umi mba’e Moisés he’i va’ekue oñekuave’ẽ va’erãha, ojehecha haguã rekueramaha.

Ñandejára Jesucristo Ñe’ẽ.