VIERNES XVI DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Éxodo arandukápe oĩ háicha 20, 1-17

Tupã Ñandejára he’i ko’ã mba’e: Che hína Tupã nde Jára roguenohẽ va’ekue Egíptogui, tembiguái rekógui. Ani rereko ambue tupã che ykére.

Ani rejapo mba’eveichagua ta’ãnga, taha’e yvagapegua, taha’e yvy arigua, taha’e ypegua oikóva ra’ãnga. Ani reñesũ mba’eveichagua ta’ãnga renondépe térã remomba’e guasu ichupe. Cháke che hína Tupã nde Jára ha ndaipotái che myengovia avavére. Ainupã pochy umi oñemoĩvape che rehe ha ita’ýra kuérape, ñemoñare mbohapyha térã irundyha peve.

Umi che rayhúvape katu ha ojapóva che rembiapoukapy ha iñemoñarépe, aiporiahuvereko opa árape. Ani reiporu Tupã nde Jára réra rejapo haguã ivaíva, cháke che hína Tupã ha ainupã pochy pe oiporu vaívape che réra.

Ne mandu’a pytu’uha ára rehe remboarete haguã. Emba’apo 6 ára ha umívape ejapopa ne rembiaporã. Ára 7 katu pytu’uha ára ha remboyke va’erã chéve guarã. To japo’ỹ mba’eve avaveichagua oikóva nde rógape taha’e nde ra’y, nde rajy, ne rembiguái kuimba’éva, ne rembiguái kuñáva, ne rymba térã mombyrygua oikóva nde rógape.

Che niko ajapo va’ekue 6 árape yvága, yvy, yguasu ha opa mba’e ipype oĩva, 7hápe katu apytu’u. Upévare ahovasa ára 7 ha amboarete. Ehayhu nde ru ha nde sýpe, ipuku haguã nde rekove upe yvýpe che, Tupã nde Jára, ame’ẽtava ndéve.

Ani reporojuka.
Ani reiko tembireko ne mba’e’ỹva ndive.
Ani remonda.
Ani remboja rei mba’eve nde rapicháre.
Ani reipota rei nde rapicha róga, hembireko, hembiguái kuimba’éva, hembiguái kuñáva, hymba guéi, hymba vúrro térã mba’eve imba’éva.

Tupã Ñandejára Ñe’ẽ.

SALMO ÑEMBOHOVÁI 18, 8-11

Opavave: Tupã Ñandejára ne Ñe’ẽ ome’ẽ Tekove ndo páiva

Tupã Ñandejára rembiapoukapy ndaijojahái,
ñane mbopy’a rory.
Tupã Ñandejára rembiapoukapy ijeroviaha,
omoarandu oikuaa’ỹvape. O.

Tupã Ñandejára rembiapoukapy oĩ heko itépe,
ombovy’a ñane korasö.
Tupã Ñandejára rembiapoukapy hesakã,
ñande resape’a. O.

Tupã Ñandejára ñe’ẽ naimeguãi
ha ndahekoviái araka’eve.
Tupã Ñandejára rembiapoukapy ijeroviaha,
opavave oĩ heko itépe. O.

Iporã iteve óro ojajaipávagui,
umi óro joheipyrégui.
he’ẽve eiretégui
osyrýva káva raitýgui. O.

ALELUIA Cf. Lc 8, 15

Aleluia.
Ovy’a va’erã umi orekóva iñakãme Tupä Ñandejára ñe’ẽ ikorasö oĩ porãre ha osë ichugui heta mba’e na ikane’öire.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha

13, 18-23

Upe ramo Jesús he’i hemimombe’ekuérape:

Peẽ katu pehendu mba’épa he’ise pe ñe’ẽ mbojoja ñemitỹhára rehegua. Umi ohendúva pe ñe’ẽ ñesãmbyhy Tupã Ñandejáragui oúva rehegua ha ndoikuaáiva mba’épa he’ise, ojogua umi mba’e ra’ỹime ho’a va’ekue tapépe. Upéi ou Aña, ha oipe’a pe ñe’ẽ ipy’apýpe oñeñotỹ va’ekue.

Umi mba’e ra’ỹi ho’áva itatýpe katu ojogua umi Tupä Ñandejára Ñe’ẽ ohendúva, ha ogueroviáva vy’apópe. Ha ndahapo pypukúigui, ndopyta hatãi ipypekuéra. Oiko asy térã ojejopy vai ramo oguerovia haguére pe ñe’ẽ, pya’e ojei ichugui.

Umi mba’e ra’ỹi oñeñotỹva ñuatĩndýpe, umíva hína umi ohendúva pe ñe’ẽ. Ha’e kuéra katu ojepy’apy umi mba’e yvy arigua rehénte voi, ha mba’eta rerekose ombotavy ete ichupe kuéra.
Ko’ã mba’e ojaho’i ha ojuka pe ñe’ẽ, ha upévagui ndaikatúi hi’a.

Umi oñeñotỹva yvy porãme katu ojogua umi ohendúva pe ñe’ẽ, ha oikuaa porãva mba’épa he’ise. Upéi hi’a porã, ha oĩ hi’áva 100, oĩ katu hi’áva 60, ha oĩ hi’áva 30 peteĩgui.

Ñandejára Jesucristo Ñe’ẽ