Ñahendu Jesús Ñe’ẽ. Miércoles 6º Tiempo Durante el Año

Escucha el evangelio y la reflexión en: https://youtu.be/GnOLGRlMkpk

Miércoles 6º Durante el Año Marcos 8, 22 – 26

Upérõ Jesús ha idisípulokuéra oguãhẽ Betsáidape, ha ogueraha chupe hikuái peteĩ ohecha’ỹva. Ojerure chupe hikuái opokomi haguã hese. Jesús ipojái pe ohecha’ỹva póre ha oguenohẽ chupe táva rokápe. Hendýpe omyakỹ umi hesa, omoĩ ipo hese ha oporandu chupe ohechámapa.

Pe ohecha’ỹva oñepyrũ ohecha ha he’i Jesúspe: — Ahecha oguatáva, ha ojogua vaicha chéve yvyra mátape.

Upévo, Jesús omoĩ jey ipo umi hesáre. Ha pe kuimba’e oipe’a umi hesa, omaña porã ha ohecha opa mba’e. Okuera. Upépe, Jesús omondo chupe hógape ha he’i chupe: — Anínte reike puéblope.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Heta mba’e niko ñande ndajaikuaái ha ndajahechái, okañy ñande hegui. Ndajarekopái ñande resa renondépe. Ha oiméramo jepe jahecha ñande resa rupi, nañama’ẽi ha nañañandúi Ñandejára ohecha ha oñandu háicha.

Ogueru hikuái Jesús pe peteĩ ohecha’ỹva ha Jesús ipojái hese, ogueraha ha’eño háme hikuái mokõimi. Upépe oñemongeta hendive, omyakỹ hendýpe upe ohecha’ỹva resa, omoĩ ipo iñakã ári, opoko hese ha oñeñanduka ichupe.

Sapy’ánte ñande ñañekonvida jaha haguã retiro hápe, jaike haguã ñañemongeta puku Ñandejára ndive, ñahendu ha ñañamindu’u haguã iñe’ẽre, ñañe’ẽ haguã Jesús ndive.

Tomoĩ avei ipo ñane akã ári ñanderesape’a ha jahecha porãve haguã ñande raperã.Ha pe tesape’a ningo ndaha’éi pya’e pya’e, ndaha’éi péicha péichante oikóva.

Ñañeha’ã vaerã niko ñande jehe ha ñande rapicháre avei, mbeguekatúpe hesakãve haguã ohóvo ñandéve. Japáy ha jahecha porãve haguã pe ñande rekove Ñandejára oipota háicha. Jesús opoko rire pe ohecha’ỹva rehe niko upe hesa ojepe’a vai vaínte raka’e. Ohecháramo jepe nahesakãmbái upe henondépe oĩva: “Ahecha umi oguatáva, ojogua yvyra hakã ha hoguévape”, he’i.

Ha upéicha avei ñande, che reindy ha che irũ. Oiméramo jepe Jesús ñande ykére, ndajahecha porãmbái ñande rekove, nahesakãmbái ñandéve ñama’ẽramo ñande rapicháre. Ha ñaikotevẽ Jesús opoko jevy jevy ñande rehe. Toipe’a ñande resa hesakã haguã ñane rembiaporã ha jahecha porãite haguã ñande rapicha kuérape.

Pa’i Alberto Luna.