Ñahendu Jesús Ñe’ẽ. Martes Semana 9º Durante el Año

Escucha el evangelio y la reflexión en: https://youtu.be/W_klt8bKU1w

Martes Semana 9º Durante el Año

Marcos 12, 13 – 17

Upérõ omondo hikuái Jesús rendápe mbovy fariséo ha Herodes kapángakuéra ombopakova pire haguã Jesúspe. Ha oporandu chupe hikuái:

— Mbo’ehára, roikuaa niko na nde japuyiha. Roikuaa avei nerepenaiha umi mba’e nde rehe oje’évare. Ha upéi ave, neremañái avavére rehecha hag̃ua mba’eichaguápa ha’e. Hekoitépe niko rembo’e Tupã rape. Ore roikuaase mba’épa nde ere. Oĩ porã piko japaga
impuésto Césarpe, térãpa nahániri.

Jesús katu niko oikuaa porã mba’épa oguereko hikuái iñakãme. Osẽ he’i chupekuéra: — Mba’éreiko peẽ che mbopakova pirese. Pehechauka chéve pe níkel peme’ẽva jepi pepaga hag̃ua. Ha ombohasa chupe hikuái.

Jesús oporandu chupekuéra: — Máva ra’ãnga ha máva réra piko ko oĩva hese.

Ha’ekuéra he’i: — César niko péva.

Jesús he’i chupekuéra: — Néi, peme’ẽ Césarpe imba’éva, ha Tupãme imba’éva. Ha ijurujái hikuái opytávo.

Ñandejára Jesucristo ñe’ẽ

ÑAMBOGUEJY ÑANDE REKOVÉPE
Mba’épa pe ñande Iglésia rembiapo. Mba’épa ñande católico rembiapo. Mba’épa ñande comunidakuéra rembiaporã ko ñane retãme.

Umi mba’e hendape’ỹva ha ivaíva renondépe jahecháva mburuvicha kuéra, políticokuéra ojapóva piko ñande ñapu’ã va’erã ñambohovái. Mba’épa Hesu ojapo va’erã mo’ã oĩ rire ñanendive ohechávo umi mba’e hendape’ỹva ojapóva mburuvicha guasukuéra.

Ñanemokyre’ỹnepa ha’e ñapu’ã haguã umíva renondépe, térãpa mba’e.

Jahecha niko ouha umi fariseokuéra oporandu Hesúpe iporãpa ome’ẽ hikuái pe impuesto mburuvicha guasu Rromaguápe. Jaikuaa niko péva ha’e hague peteĩ mba’e ivaíva umi Rromagua omoĩ va’ekue mbaretépe Israelgua akã ári. Oikuaa voi niko hikuái péva ha’eha peteĩ mba’e hendape’ỹva, ha ou upévare omoñuhã Hesúpe omoĩ vai haguã chupe hikuái Rromagua kuéra renondépe.

Hesu katu opilla ichupe kuéra ha upévo omohenda pe tekotevẽva jajapo.

Tekotevẽ ñame’ẽ peteĩ teĩme imba’éva, hekópe porã. Ñame’ẽ Ñandejárape upe imba’éva. He’ise ñañeha’ã jajapo upe Ñandejára oipotáva. Upéva Hesu ojapo, ha upéva oipota avei ñande jajapo. Ñamosã ñande rekove Ñandejárare, ñahendu Hesu ñe’ẽ, ñañembo’e, jaguata ñande iglésiape, ñande comunidápe.

Upéicha hesakãvéta ñandéve mba’eichagua tetã ha mba’eichagua távapa Ñandejára oipóta ñamopu’ã. Ñapena vaerã niko pe léi he’i háicha ha ñande ruvichakuéra ñe’ẽ léire oñemosãva. Jaike avei ñande ñamba’apo ñamoporãve ñande política, oguata haguã hekópe mburuvicha kuéra, ani jaheja ojapo ojaposéva.

Mba’épa reñandu che irũ ha che reindy oguata lája mburuvichakuéra. Ha mba’épa oñanduka ndéve Ñandejára rejapo haguã nde.

Pa’i Alberto Luna.