VIERNES 9º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Tobías arandukápe oĩ háicha 11, 5-18a

Ana oguapy hína okápe ha omaña pe tapére ou va’erãha rupi imemby. Peichaháguinte oñandu kuaa vaicha imemby ouha, ha he’i Tobítpe: Ou hína nde ra’y iñirũ ndive.

Oguahẽ mboyve pe ógape, Rafael he’i Tobíaspe: Aikuaa porã nde ru ohecha jevytaha. Emona ágã hesáre pe irokue. Upéva ko pohã hína, ha omoñyñýi ha oitýta pe morotĩngue oĩva hesáre. Péicha nde ru ohecha jevýta ára resa.

Ana osẽ imemby ruguãitívo, oñañuãvo ichupe he’i: Ko’ágä ikatúntema amano, rohecha jevýma niko che memby. Ha oñepyrũ hasẽ.

Tobit opu’ã ha ñepysãnga sãngápe osẽ pe okẽ rupi oĩva korapy gotyo. Tobías ou hendápe, pe irokue ipópe. Oipeju itúva resápe ha ojokóvo ichupe he’i: Néike taita.

Upéi omona hesáre pe pohã ha oipichy, ha mokõivéva ipópe oipe’a heságui pe morotĩngue oguerekóva. Upépe itúva hasẽ, oñañuã ichupe ha he’i: Rohecha che ra’y, ndéko hína umi che resa rembovy’áva. Ha upéi he’i:

“To ñemomba’e guasu Tupã Ñandejára. To ñemomba’e guasu héra tuichaite.
To ñemomba’e guasu mayma Tupã Ñandejára remimbou marangatu.
Tupã Ñandejára réra tuichaite ta ñane mo’ã opavavépe.
To ñemomba’e guasuTupã Ñandejára remimboukuéra opa ára.
Tupã Ñandejára niko che nupã va’ekue, ha upéi katu che poriahuvereko, ha ko’ágä ikatu ahecha che ra’y Tobíaspe”.

Tobías oike hógape tory ha vy’a pópe, ha sapukaihápe omomba’e guasu Tupã Ñandejárape. Upéi omombe’u itúvape osẽ porã hague opa mba’épe ha ogueruha pe pláta. Omombe’u avei ichupe omenda hague Ragüel rajy, Sara rehe, oguahẽmava oúvo Nínivepe upe jave.

Tupã Ñandejára Ñe’ẽ.

SALMO ÑEMBOHOVÁI 145, 1b-2c. 7-10

Opavave: Che py’a te guive amomba’e guasu Tupã Ñandejárape.

Aikove aja amomba’e guasúta Tupã Ñandejárape,
che rekove pukukue apurahéita Tupã Ñandejárape.
Oñemoĩ ojejopy vaíva ykére, omongaru iñembyahýivape.
Tupã Ñandejára opoi umi iñapytĩmby ojererekóvagui. O.

Tupã Ñandejára oheja umi ohecha’ỹvape ohecha jevy,
omoï porã ha omopu’ã umi ikangývape,
Tupã Ñandejára ohayhu umi heko jojávape,
oñangareko umi mombyry guáre. O.

Ha ityre’ỹ ha iména manóvape ha’e oipytyvõ.
Heko vaíva rape katu ha’e ohundi.
Tupã Ñandejára oisambyhy apa áraitépe,
oisambyhy Sion guive Tupã Ñandejára opavavetépe. O.

ALELUIA Jn 14, 23

Aleluia.
Ñandejára Jesucristo he’i: “Pe che rayhúva nomboyke mo’äi che ñe’ẽ, che Ru ohayhúta ichupe ha rohóta hendápe”.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Marcos omombe’u háicha 12, 35-37

Upe ramo Jesús oporombo’e hína Tupaópe ha oporandu: “Mba’ére piko Moisés rembiapoukapy mbo’eha he’i pe Mesías, David ñemoñareha? David voi niko, Espíritu Santo rupi he’i va’ekue:

“Tupã he’i che Járape
‘Eguapy che akatúa gotyo,
ta moĩ ne pyenda ramo
umi nde rayhu’ỹva.’”

David voi niko he’i ichupe “Che Jára”? Mba’éicha piko aipórõ pe Mesías David ñemoñaréta?
Heta umi ijatýva upépe, ha oguerohory joa Jesús Ñe’ẽ.

Ñandejára Jesucristo Ñe’ẽ.