SÁBADO 9º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Tobías arandukápe oĩ háicha 12, 1. 5-15. 20

Tobit ohenói ita’ýra Tobíaspe ha he’i ichupe: Che ra’y, ehepyme’ẽke pe ne irũ ne ndive oho va’ekuépe. Ja’e haguéicha eme’ẽ ichupe, ha ikatu voínte rembojo’amive.

Upépe Tobías ohenói Rafaélpe ha he’i ichupe: Ne rembiapo repykue ramo eraha mbytere umi mba’e jaru va’ekuégui, ha tosẽ porãmba ndéve opa mba’e.

Upéma ramo Rafael ogueraha mokõivépe mombyrymi, ha he’i ichupekuéra: Pemomba’e guasu Tupã Ñandejárape ha perohory ichupe opavave renondépe, heta mba’e porã ome’ẽ haguére peẽme.

Péicharõ maymáva ogueropurahéi ha omomba’e guasúta Tupã Ñandejára réra. Peikuaauka maymávape umi mba’e Tupã Ñandejára ojapo va’ekue pende rehe ha pene mandu’a mante hese. Mburuvicha guasu omombe’u ramo peẽme peteĩ mba’e ambue oikuaa’ỹva, iporã perokirirĩ.

Umi mba’e Tupã Ñandejára ojapóva katu, ñamombe’u va’erã hekópe ha ñamoasãi va’erã ojekuaa haguã opa rupi. Akóinteke pejapo mba’e iporãva, ha mba’e vai ndou mo’ãi pende ári araka’eve.

Iporãve ñañembo’e karu’ỹ reheve ha tupãmba’e me’ẽ teko joja reheve, jareko rangue mba’e repyeta ha ñande reko aña. Iporãve ñame’ẽ oikotevẽvape ñamboaty rangue óro ñame’ẽ ramo oikotevẽvape nañamano mo’ãi, ha ojeíta ñande hegui ñande angaipa. Ome’ẽva oikotevẽvape oikove pukúta. Umi iñangaipáva ha heko añáva ijehénte ojapo hína.

Ko’ágã amombe’úta peẽme peteĩ mba’e ha mba’evete narokirirĩ mo’ãi. Ha’éma kuri peẽme mburuvicha guasúgui peikuaa ramo peteĩ mba’e ojekuaa’ỹva, perokirirĩ va’erãha.

Umi mba’e Tupã Ñandejára ojapóva katu pemombe’u va’erã hekópe. Nde ha Sara peñe mbo’e ramo guare, che va’ekue pe omoguahẽva Tupã Ñandejára reko mimbipa renondépe opa mba’e pejeruréva. Ha péicha avei ajapo va’ekue ne ndive Tobit, reñotỹ ramo umi omano va’ekuépe.

Pe repu’ã ramo meságui ha reheja ne rembi’u reho haguã reñotỹ nde rapicha retekue repena’ỹre mba’evére, che pe añembou va’ekue roheko ra’ã haguã.

Tupã Ñandejára che mbou avei romonguera haguã ndéve ha nde ra’y rembireko Sárape avei. Che hína Rafael, Tupã Ñandejára remimbou peteĩ, umi 7 apytégui, roĩva Ñandejára reko mimbipa renondépe ha ikatúva roñemboja hendápe.

Upévare pemomba’e guasu Tupã Ñandejárape yvy ári ha peropurahéi ichupe. Ko’ágã katu che aháta Tupã Ñandejára, che mbouhare, rendápe. Pemoĩ kuatiáre opa umi mba’e ojehu va’ekue peẽme. Ha upéva he’ipávo, oho yvate.

Tupã Ñandejára Ñe’ẽ

SALMO ÑEMBOHOVÁI Tob 13, 2. 7-8

Opavave: Che amomba’e guasu Tupã Ñandejárape.

Ha’e ñane nupã ha ñande poriahuvereko,
ñane mboguejy omanóva ohohápe, ha ñande pe’a ñañe hundi haguãgui.
Ndaipóri avave okañýva ichugui . O.

Che amomba’e guasu Tupã Ñandejárape,
mburuvicha guasu yvagagua, ha che py’a ite guive amomba’e guasu ipokatu.
Opavave to momba’e guasu ichupe Jerusalénpe. O.

Che amomba’e guasu chupe ko tetã aikohápe
mombyrygua ramo, ha ahechauka
ko’ã hembiapo vaívape Tupã Ñandejára pokatu ha ituichakue. O.

Ajevy Tupã Ñandejára gotyo che rembiapo vaígui,
ajapo teko joja heko itépe henondépe, ikatu mba’e niko ha’a porã ichupe
ha che poriahurereko jevy. O.

ALELUIA Mt 5, 3

Aleluia.
Ovy’aite umi heko mboriahúva, imba’ekuérarã Tupã Ñandejára Sambyhy.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Marcos omombe’u háicha 12, 38- 44

Upe ramo Jesús oporombo’évo he’i jepi: “Peñe ñangarekóke umi Moisés rembiapoukapy mbo’eha kuéragui. Ha’ekuéra niko oikose ao puku reheve, ha oipota umi okaháre oñemomaitei ichupe kuéra karai guasúicha. Oĩ porãvetahápe oguapy karu guasuhápe, ha judíokuéra tupaópe. Ha oñembo’e puku gua’u oipe’apa haguã oguerekóva guive kuña imenave’ỹvagui. Ichupe kuéra oñenupã rasyvéta.”

Peteĩ jevy Jesús oguapy hína Tupaópe upe mba’e me’ẽha ryru rovái, ha ohecha mba’éichapa oñemoĩ pype viru. Mba’eta rerekuakuéra omoĩ heta heta. Oguahë sapy’a peteĩ kuña mboriahu imenave’ỹva, ha omoĩ mokõi viru pehẽnguemi.

Upérõ Jesús ohenói hemimbo’e kuérape ha he’i:

Ha’e peẽme ko kuña mboriahu imenave’ỹva ome’ẽ hetave hague opavavégui, opavave niko ome’ẽ upe hembývagui ichupekuéra, ha’e katu, imboriahu pa’ũme, ome’ẽmba oguereko va’ekue okaru haguã.

Ñandejára Jesucristo Ñe’ẽ.