ÑANDEJÁRA HESUKRÍSTO RETE – CORPUS CHRISTI

ÑANDEJÁRA HESUKRÍSTO RETE – CORPUS CHRISTI

LECTURA PETEÎHA:

Ko’ágã ñahendúta Tupã Ñandejára ñe’ẽ Deuteronomio arandukápe oĩ háicha 8, 2-3. 14b-16a

Pene mandu’a mba’éichapa Tupã Ñandejára pene moirũ peiko aja pe yvy ojeiko’ỹha rupi, ko’ã 40 áño pukukue, omoĩvo ñepysãnga mimi pende raperãme, oikuaaségui mba’eichaguápa peë, mba’épa pembojy pene akãme ha pene ñe’ẽ rendútapa ichupe térã nahániri.

Ha’e pene mbohasa asy ha pene moñembyahýi, ha upéi pene mongaru manáme, peteĩ tembi’u peẽ térã pende ru ypykue ndape’úi va’ekue araka’eve upe mboyve. Ha’e ojapo péicha pende reko mbo’e haguã, na ñane mongaruiha hi’upy año, avei ñane mongaru opa mba’e he’íva Tupã Ñandejára.

Ani pende resarái Tupã Ñandejáragui pene renohẽ va’ekue Egíptogui peiko haguépe tembiguái ramo. Ha’e pene moirũ ko yvy ojeiko’ỹha tuicha itéva ha oporo mongyhyjéva rupi, oĩ haguépe mbói ha alakran. Pe yvýpe ndaiporihápe y ha’e oguenohẽ y pe itágui peëme guarã.

Pe yvy ojeiko’ỹháme ome’ẽ peëme maná pe’u haguã, ha tembi’u peichagua ndo’úi va’ekue pende rukuéra ypykue. Omoĩ ñepysãnga pene raperãme oikuaaségui mba’eichaguápa peẽ, ikatu haguã pende rovasa ipahápe ome’ẽvo peẽme heta mba’e porã.

Tupä Ñandejára Ñe’ẽ.

Todos: Romomba’e guasu ndéve, Ñandejára.

SALMO ÑEMBOHOVÁI 147, 12-15. 19-20

Opavave: Jerusalén, erohory Tupä Ñandejárape.

Jerusalén, erohory Tupã Ñandejárape,
Sión emomba’e guasu Tupãme.
Ha’e omboty hatã ne rokẽ nguéra
ha ohovasa nde ra’y ha nde rajykuéra nde pype. O.

Ha’e ogueru py’a guapy nde yvýpe,
ha nemohyvatã trígo iporãvévape.
Ha’e ombou iñe’ẽ ko yvýpe
ha upe he’íva py’a’e oguahẽ. O.

Jacóbpe ha’e oikuaauka hembipota.
Israélpe ome’ẽ hembiapoukapy.
Ambue tetã ndive ha’e upéicha ndojapói,
ndoikuaaukái ichupe kuéra hembiapoukapy. O.

LECTURA MOKÕIHA:

Ñahendúta Tupã Ñandejára Ñe’ẽ San Pablo ohai va’ekue ikuatia peteïháme Corinto guápe 10, 16-17

Che pehenguekuéra: Ja’u ramo pe víno Tupã ohovasa vaekue niko ku jajehe’arõ guáicha Crísto ruguýpe. Ha jaipehe’ãrõ pan ha ja’u niko ku jajehe’arõ guáicha Crísto retére hína. Ñande reta ramo jepe, peteĩ pan añóguinte ja’u, ha upévare maymáva ñandé peteĩnte avei.

Tupä Ñandejára Ñe’ẽ.

Opavave: Romomba’e guasu ndéve, Ñandejára.

SECUENCIA
Emomba’e guasu, ne Salvahárape, Sión, emomba’e guasu purahéipe nde ruvicha ha nde Rerekuápe.
Emomba’e guasu nde ikatu háicha.

Ha’e niko tuichavéva opavavégui
ha araka’eve ndaikatumo’ãiva emomba’e guasupa
Ko árape ojejerure ñandéve
Ñamomorã haguã tembi’u ome’ëva tekove.

Pe pan Cristo ome’ẽ va’ekue
hemimbo’ekuérape oñembyaty hápe hikuái oñopehenguéicha.
Ñamomba’eguasu pe pan kyre’ỹme,
ñamomba’eguasu vy’apópe, to ñehendu javy’a itereiha.

Ko árape jagueromandu’a ko karuguasu marangatu.
oñembopyahu hague.

Ko mburuvicha guasu pyahu renondépe,
Páskua tekove pyahu rehegua.
omohu’ã pe Paskua ymaguare.

Ko ñemomorã pyahu niko omyengovia pe itujávape,
pe añetegua omopotï ñande rekove
pe mba’e rendy omyesakã iñypytũva.

Cristo ojapo va’ekue séna pyharépe
he’i ojejapo jevy haguã imborayhu rehehápe.

Ñandejára Jesucrísto ñane mbo’e rupi
ñamongarai pe pan ha vino oiko haguã ichugui ofrenda ñande salva va’erã.

Ha’e niko Jerovia añetetegua Ñandejára Jesucrísto rayhupára kuérape
Pe pan ha vinogui oikóha hete ha huguy.

Nde nerehesa’ỹjói ha nde rehecháivape
Ojehechauka porãveta ndéve jerovia rupive,
opaite mba’e oĩva yvy ape árigui.

Pe pan ha vino rupive, ojehechaukáva ñandéve añetegua iporãitéva.

Hete niko ha’e tembi’u ha huguy katu ñamboy’u,
ko’ã tembiecharã pe niko oĩ Ñandejára Jesucrístoite voi.

Ojejapyhy ichupe añetehápe ikatu’ỹre mavave omboja’o omopë ha ombosa’i.
Ojapyhy peteï, ojapyhy heta iteve, ko’ãva ha umíva mavave ndaikatúi ho’upa.

Peteĩme guarã tekove ha ambuépe guarã katu mano imarangatu ha iñangaipáva maymáva ojapyhy.

Iñangaipávape guarã ñemano, ha hekojojáva pe guarã tekove; ema’ẽmina mba’éichapa peteĩ tembi’u
peteïme guarã tekove ha ambuepe guarã ñemano.

Pe pan karai oñemboja’óvo, ani nde py’ã mokoĩ, ne mandu’áke peteï teïva pehenguépe
oïha Ñandejára Jesucrístoite voi.

Pe añetegua oĩ hendaitépe pe tembiecharãnte oñepehe’ã ha Cristo pu’aka ha tuichakue noñemomichivéi.
Kóva ha’e angelkuéra rembi’u oikóva ichugui tembi’u yvypórakuéra pe guarã pan añete Ñandejára ra’y ha rajy kuéra pe guarã.
ndaha’ei jaguápe guarã.

Heta techaukaha omomarandúma va’ekue: Isaac jehasa asy, pe ovecha ra’y jejuka ha pe mana ho’u va’ekue ñande rukuéra.

Jesús, eñangareko porãva ore rehe, pan añetetévape, oreporiahuvereko mína: ore mbopy’aguapy ha eñangareko ore rehe;
ikatu haguãicha rohecha pe mba’e porã opave’ÿva ko yvypórakuéra apytépe.

Nde, reikuaapáva ha nde ikatupáva,
Nde, eme’ẽva oréve ore rembi’urã ko yvy ape ári, ore rerahamína yvágape nde reiporavo va’ekue apytépe.
ne santokuéra ndive.

ALELUIA Jn 6, 51
Aleluia.
Che hína pe pan oporo moingovéva, oguejýva yvágagui. Upéva pe pan ho’úva oikovéta opa ára guarã. Pe pan che ame’ẽtava peëme niko che rete voi hína, che ame’ẽva opavave rehehápe, oikove haguã.
Aleluia.

EVANGELIO
Marandu porã Ñandejára Hesukrísto rehegua San Juan omombe’u háicha 6, 51-58

Opavave: Romomba’e guasu ndéve, Ñandejára.

Upérõ Jesús he’i umi hénte kuérape: Che niko pe pan oporomoingovéva, oguejýva yvágagui. Upéva pe pan ho’úva oikovéta opa ára guarã. Pe pan che ame’ẽtava peẽme niko che rete voi hína. Ha che ame’ẽta opavave rehehápe, oikove haguã.

Kóva ombopochy umi judío kuérape, ha he’i hikuái ojupe: — Mba’éicha piko aipo hete ho’ukáta ñandéve.

Jesús he’i chupe kuéra: — Añetéko ha’e peẽme, ndape’úi ramo Ñandejára ra’y rete ha ndapey’úi ramo huguykue, ndapeikove mo’ãi. Pe ho’úva che rete ha che ruguy oikovéta opa ára guarã, ha che amopu’ã jeýta chupe ára pahápe. Che rete ha che ruguy niko hína
hi’upy añetetéva.

Che rete ha che ruguy ho’úva, peteĩnte chendive, ha che peteĩnte hendive. Che Ru, che mbou va’ekue, niko oikove ha ha’e rupi che aikove. Péicha avei, upe che retégui ho’úva, oikovéta che rupi. Añe’ẽ niko hína peẽme upe pan yvágagui oguejy va’ekuére. Upéva ndaha’éi ku manáicha pende ru kuéra ypykue ho’u vaekue ha upéi omano. Nahániri. Pe ho’úva kóva ko pan, oikovéta opa ára guarã.

Ñandejára Hesukrísto Ñe’ẽ.

Todos responden: Romomba’e guasu ndéve, Ñandejára Hesukrísto.