Ñahendu Hesu. Martes 11ª Tiempo Durante el Año

Escucha el evangelio y la reflexión en: https://youtu.be/-V1T7OHH35c

Martes 11º Durante el Año

Mateo 5, 43 – 48

Upérõ Jesús he’i idisípulokuérape: Peikuaa avei oje’eha: “Ehayhu nde rayhúvape, ha nde rayhu’ỹvape katu nahániri.” Che katu ha’e peẽme: “Pehayhu umi pende rayhu’ỹvape, ha pene mbohasa asývape. Peñembo’e hesekuéra.

Péicharõ, pehechaukáta hína pejapoha upe pende Ru yvagapegua oipotáva. Ha’e niko oheja kuarahy ojope iñañávape ha ipy’a porãvape. Ha’e hína pe oguerúva ama umi hembiapo porãvape ha umi hembiapo vaívape.

Pehayhúrõ pende rayhúvape año, piko mba’éicha Ñandejára omyengoviáta peẽme pene rembiapo. Pláta mbyatyha jepe niko péicha avei ojapo. Ha pemomaitei ha peñakãity ramo umi peikuaáva añópente, piko mba’e iporãva oĩ upévape.

Umi Ñandejárare ojerovia’ỹva jepe niko péicha ojapo. Peẽ katu pende py’a porã vaerã pende Ru yvága pegua ipy’a porãháicha.”

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñande niko jajehe’ave umi jaikuaávare ha jaguerohory ñane irũnguéra ha umi jajepokuaávare. Ñande rapicha ndajaikuaáiva, ndaha’éiva ñande vesíno, ñane héntekuéra térã ñane irũ katu nañañe’ẽi voi chupe péicha péichante.

Ha umi oñe’ẽ vaíva ñande rehe, térã katu ñane kontrário mba’e ndajahechaséi voi, jajerénte voi chuguikuéra. Ha oñeporandu ramo ñandéve hese mba’e katu ñañepopĩa’o ha jakopi ilómokuérare katuete.

Hesu he’i Ñandejára ñande ru omopu’ãha kuarahy imba’e porãva ha hembiapo vaíva peguarã peteĩchante. Umi oñembo’éva ha umi heréhe akã ári ombou ama peteĩcha. Ha ñande ave jajeroviáva hese jajogua vaerãha ñande rúpe, ñanemba’e porã va’erãha umi ñande rayhúva ha umi nañanderayhúiva ndive peteĩcha.

Ha mba’éicha piko jahayhúta upe nañande rayhúivape. Ijetu’u eterei niko péva. Ja’e ñande. Hasy upe ojapo vaíva ñande rehére ñañandu haguã mborayhu ha py’a porã.

Upéva rangue katu ñañandu pochy ha py’aro. San Ignacio he’i mborayhu añete ojekuaaha tembiapo rupive, ndaha’éi ñe’ẽ térã ñane remiandu rupive. Aipo ramo jepe ñande py’ápe nañañandúi mborayhu, ha ndaikatúi ramo jepe ja’e ñande rapicha añáme jahayhuha ichupe, ani haguã ñande japu, opáichavo ikatu jajapo tembiapo porã ha ñame’ẽ jarekóvagui chupe, jepe ramo ha’e ojapo kuri ivaíva ñande rehe.

Upéicha niko omba’apo Ñandejára. Kirirĩ hápente ha’e ojapo ha ome’ẽ iporãva hembiapo vaívape guarã, ome’ẽ háicha hembiapo porãvape. Ojeroviávape ha ndojeroviáivape peteĩcha. Upe jajapóva ha ñame’ẽva hina upe he’iséva, ndaha’éi ñe’ẽ térã pe ñañandúva ñande py’ápente.

Mba’épa ikatúne ñanepytyvõ che reindy ha nde che irũ, ani haguã ñane apytĩ upe pochy ha py’aro. Mba’éichapa ikatúne jahasa upéva ári, ha jajapo iporãva umi iñañávape ñanendive. Mba’épa nde ere.

Pa’i Alberto Luna.