DOMINGO VIGÉSIMO OCTAVO DURANTE EL AÑO

DOMINGO VIGÉSIMO OCTAVO DURANTE EL AÑO

MAITEI OÚVAPE – Saludo

Ñaguahẽ porãite ñande atývo ñande comunidad pe che hermanokuéra. Ñande niko hína umi ñahendúva Ñandejára konvíte ha jajúva jaike haguã Jesús ndive pe Ñandejára karu guasu marangatúpe.

COLECTA ÑEMBO’E

Tupã Ñandejára nde pu’akapáva, ne remime’ẽ ta ore sambyhy ha ta ore moirũ opa araite, ha ta ore pytyvõ rojapo meme haguã umi mba’e porã. Nde Ra’y Hesukrísto rupive, Tupã Ñandejaraite, oikovéva ha ipu’akapáva
nendive Espíritu Sánto ñemopeteĩme, yma, ko’ãga ha opa araite.

ÑAHENDU ÑANDEJÁRAPE
LECTURA PETEÎHA:

Motivación: Proféta Isaías rupive Ñandejára he’i ojapotaha karu guasu ñandéve guarã. Omokãta ñande resay, ñanemongarúta ha ñanemoyvatãta.

Ko’ágã Tupã Ñandejára ñe’ẽ Isaías arandukápe oĩ háicha 25, 6-10a

Yvyty Siónpe Ñandejára ipu’akapáva ombosako’i tetãnguérape guarã karu guasu oĩháme tembi’u he ha víno he’ẽ, so’o kyra ha víno poravo pyre. Ko yvytýpe Ñandejára oipe’áta ao hũ ojaho’íva tetãnguéra.

Ñandejára oipe’áta ñemano, noñemano mo’ãi araka’eve, opa rupi omokãta tesay ha oipe’áta yvy árigui ñemotĩ onáva hetã guare. Ñandejára he’i péicha.

Upe árape oje’éta: “Kóva hína ore Tupã, hese rojerovia ha ivaívagui ore pe’a. Javy’a, ñande rory, ha’e ñane renohẽ jejopy vaígui”. Ñandejára ipópe omo’ãta yvyty Sión.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI. 22, 1-6

Opavave: Ñandejára ojapo ñandéve Karu guasu.

Ñandejára che rerekua, mba’eve naikotevẽi.
Ñu rovyũ asýpe che mombytu’u, y satĩ ypýpe che moguahẽ. Che mombarete jevy. O.

Ha tape hekópe guáre che reraha héra rehehápe.
Ahasa ramo jepe ka’aguy ypytũ rupi,
ndakyhyjéi chéne, nde, che Jára, reimégui che ndive.
Nde yvyra jekoha, nde rehe che mbojerovia. O.

Karu guasu chéve rejapo umi che rayhu’ỹva rovake.
Che akã rehe reñohẽ mba’e ryakuã asy,
ha upe hay’uha remyenyhẽ chovi. O.

Ne mborayhu ha ne mba’e recha kuaa,
rehechauka chéve aikove aja pukukue,
ha nde rópe Ñandejára, aikóne opa araite. O.

LECTURA MOKÕIHA:
Motivación: San Pablo he’i jaikóramo Jesús ndive, jahasa va’erãha opa mba’e apytépe. Ha jaikokuaa va’erãha jeiko porã ha jejopy vai pa’ũme.

Ñahendúta Tupã Ñandejára Ñe’ẽ San Pablo ohai va’ekue Filipos guápe 4, 12-14.19-20

Che pehenguekuéra: Che mboriahukuaa ha che mba’e reta kuaa. Aime opaicharã: che ryguãtã térã che ñembyahýi haguã, arekopa haguã térã areko’ỹ ete haguã.

Ndaipóri chéve guarã ikatu’ỹva, Cristo che mombaretéva rupi. Upéicha ramo jepe, pejapo porã che pytyvõ hague rehe che remikotevẽme.

Aipo ramo Tupã che Jára ome’ẽne peẽme opa peikotevẽva imba’eta yvága peguágui Cristo Jesús rupi. To jererohory opa ára Ñandejára ñande Ru. Amén!

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Cf. Ef 1, 17-18
Aleluia.
Ajerure Ñandejárape omyesakã haguã peẽme pene akãme perekóva, peikuaa porã haguã mba’e peha’arõ haguãpa ha’e pene renói raka’e
Aleluia.

EVANGELIO

Motivación: Jesús ombojoja Ñandejára Reino peteĩ ñemenda karu guasu rehe. Ha ñane konvida ñandéve jaike haguã hendive pe vy’a guasúpe. Jajapysaka porãke, ani jajepy’apy eterei umi mba’e yvy ariguáre ha japyta okápe.

Marandu porã Ñandejára Hesukristo rehegua San Mateo omombe’u háicha 22, 1-14

Opavave: Romomba’e guasu ndéve, Ñandejára.

Jesús omombe’u opavavépe kóva ko káso: Ñandejára Reino niko ojogua ku Rey peteĩme ojapo va’ekue karu guasu ita’ýra omendáta haguére. Omondo ndaje umi hembiguáipe ohenói hag̃ua opa umi oñekonvida va’ekuépe ou hag̃ua. Ipahápe,avave ndouséi.

Upémarõ omondo jey voi ambue hembiguái he’ikávo chupekuéra, “Tembi’u niko oĩmbáma. Umi che rymba ikyra-kyravéva niko ajuka. Pejúntema javy’a”. Amo ipahápe avave ndoúi. Avave nopenái hese. Oĩ ndaje ohóva ohecha ijyvy, ambue katu oho oñemu. Oĩ katu osẽva umi tembiguáipe ha heta oinupã rire ojuka. Péva ombopochy pe Rey pe. Omondo upémarõ isoldadokuéra ojuka hag̃ua umi hembiguái jukaharépe, ha ohapypa hogakuéra.

Upéi katu he’i hembiguaikuérape, “Oĩmbáma niko ko che ra’y menda rehegua karu guasu. Umi akonvida ypy va’ekuépe niko iporãve voi ndoúi che rógape. Tapeho opa rupi ha opa pejuhúvape peje tou.”

Umi hembiguái osẽ ha ogueru opa ojuhúva. Oĩ heko porãva ha oĩ nahániriva. Ha peteĩcha ohopa joa hikuái. Omyenyhẽ hikuái pe óga.

Upéi katu pe Rey oho ohecha máva-mávapa umi ou va’ekue. Ijapytepekuéra ohecha sapy’a peteĩ oñemonde porã’ỹ va’ekue mendahápe g̃uarãicha. He’i chupe, “Che irũ, mba’éicha rupi piko reike che rógape. Ne reñemondéi niko mendahápe g̃uarãicha”.

Pe kuimba’e katu okirirĩnte chugui. Upérõ pe Rey he’i hembiguaikuérape, “Peipykua ha peipokua, ha pemombo okápe, iñypytũháme. Upépe tahasẽ ha hãi tomopururũ”.

Upéi he’i Jesús chupekuéra: — Heta niko hína umi oñekonvidáva, ha mbovy umi ojeporavóva.

Tupã Ñandejára Ñe’ẽ.

Opavave: Romomba’e guasu ndéve, Ñandejára Jesucristo