LECTURAS SÁBADO 7º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Eclesiástico arandukápe oĩ háicha 17, 1-15

Tupã Ñandejára ojapo yvypórape yvýgui ha upéi ojapo jevy ichugui yvy.
He’i mboy árapa oikovéta ha ipoguýpe omoĩ opa mba’e yvy arigua.
Ichupe ome’ẽ pokatu ojoguáva ipokatúpe, ha ojapo ichupe ijoguaha.
Opa oikovévape omongyhyje ichugui , ha ipo guýpe omoĩ tymba ha guyrakuéra.

Ome’ẽ ichupe juru, kũ, tesa, apysa ha akã opa mba’e oikuaa haguã.
Omoenyhẽ yvypórape mba’e kuaa ha arandúgui, ha ohechauka ichupe ivai ha iporãva.
Ome’ẽ imba’e kuaágui ohecha kuaa haguã hembiapokue porã ita, oikuaauka haguã imba’e mombe’upyrã, ha ogueropurahéi haguã héra marangatu.

Ome’ẽ ichupe kuéra arandu ha imba’erã Tembiapoukapy oporomoingovéva.
Ojapo hendive kuéra ñe’ẽ me’ẽ ijapyra’ÿva, ha oikuaauka ichupe kuéra hembiapoukapy.
Ha’e kuéra ohecha hesa tee rupi heko mimbipa, ha ijapysa rupi ohendu iñe’ẽ marangatu.

He’i ichupekuéra: “Ani pejapo ipojoja’ỹva”.
He’i avei mba’éichapa oiko va’erã hapicha apytépe.
Henondépe oĩ mante yvypóra rekove, mba’eve nokañýi ichugui .

Tupã Ñandejára Ñe’e.

SALMO ÑEMBOHOVÁI 102, 13-18a

Opavave: Tupã Ñandejára mborayhu ndopái araka’eve.

Túva omokunu’ũ háicha ta’ýra kuérape,
upéicha avei Tupã Ñandejára umi ichupe omomba’éva ndive.
Ha’e oikuaa mba’éguipa ñande apo raka’e,
oikuaa porã yvynteha voi ñande. O.

Yvypóra rekove niko ku ñanáicha,
yvoty ñu ipoty jera vaicha,
oipejúvo ichupe yvytu opa reíva,
hendague jepe ndojekuaavéi. O.

Tupã Ñandejára mborayhu katu ndopái araka’eve,
ohupity umi ichupe omomba’éva ñemoñarépe,
umi ojapóva iñe’ẽ ome’ẽ va’ekue
ha imandu’áva hembiapoukapýre. O.

ALELUIA Cf. Mt 11, 25
Aleluia.
Nde niko hovaspyre, ore Ru, Tupã yvy ha yvága Jára,
hehechauka va’ekue mba’e guasu ete Sambyhy rehegua
umi imichïvévape.
Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha 10, 13-16

Upe ramo ogueraha hikuái mitã nguéra Jesúspe opoko haguã hesekuéra. Umi hemimbo’e kuéra katu, ipochy umi mitãme oguerúva ndive.

Jesús ohechávo kóva ipochy ha he’i ichupe kuéra: Peheja umi mitã tou che rendápe, ha ani pejoko. Umi ha’e kuéraicha guápe guarã niko hína ñesãmbyhy yvágagui oúva. Añetehápe ha’e peẽme, oimérõ Tupã Ñandejára sãmbyhy ogueroguahẽva ku mitãicha, oikéta pype. Ha ohupi ijyva ári mitã nguérape, ha ohovasa omoĩvo ipo hesekuéra.

Ñandejára Jesucristo Ñe’ẽ.