Ñahendu Jesús Ñe’ẽ. Sábado 04 de enero

Escucha el evangelio y la reflexión en: https://youtu.be/qoS7LoxhR1o

4 de enero. Feria de Navidad San Juan 1, 35 – 42.

Upe ára ambuépe, Juan oĩ jeýma hína Betániape mokõi idisípulo ndive. Ha ohechávo Jesúspe ohasáva ohóvo hína, he’i: “Amóva hína Ñandejára ovecha Ra’y”. Juan disípulokuéra ohendúvo upéva, osẽ oho Jesús rapykuéri. Upéi katu Jesús ojere omaña, ha ohecha chupekuéra oúva hína hapykuéri. Osẽ oporandu chupekuéra: — Mba’éiko peheka.

He’i chupe hikuái: — Mbo’ehára, moõiko reiko.
Jesús he’i chupe kuéra: — Peju pehecha.

Ka’arúma upérõ. Ha oho hikuái Jesús ndive ohecha haguã moõpa oiko. Ha opyta hendive
hógape pytũ meve. Peteĩva umi ohendu vaekue Juánpe ha oho vaekue Jesús rapykuéri niko
héra vaekue Andrés. Simón Pedro ryke’y vaekue ha’e. Ha Andrés pya’e porã osẽ Simón
rekávo. Ha ojuhúvo chupe he’i: — Oime rojuhu pe Mesías.
Upéi, Andrés ogueraha Simónpe, Jesús rendápe. Ha Jesús ohechávo chupe, he’i: — Nde
niko Simón, Juan ra’y. Ko’ágã guive nde rérata Cefas, he’iséva Pedro.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Pe mbo’ehára, pe maestro, oñemoĩ ombo’e haguã mitãme térã ipyahúvape ha upévarã tekotevẽ ha’e raẽ oikuaa porã upe ombo’étava. Oiméramo pe mbo’ehára ipererĩ ha ilápi mbyky mba’eve guasu nombo’emoãi mitãme, vyropápe osẽta ha nombokatupyrymo’ãi hapichápe ha’e voi ndoipykúigui pe katupyry rape tenonderã. Pe vaqueano oñemoĩ opuntea haguã umi ndoikuaáiva tape, omoguahẽ haguã ichupe kuéra ohose hápe.

Upevarã tekotevẽ ha’e raẽ oikuaa porã pe tape ani ágã upéi oñedesatina ha’e ha omongañy hapicha ojeroviáva hese.

Upéicha avei oime ñande Iglésiape oñemoĩva ombo’e haguã mitã, pyahu ha kakuaápe Ñandejára arandu, oime ikatupyrýva jeroviápe ha oñemoĩva opuntea ha oguata haguã tenonderã ohechaukávo Hesu rape umi ndoikuaáivape.

Umíva tekotevẽ ombopypuku raẽ ijerovia Ñandejárare ha oñemosã mbarete Jesúre, oñemoirũ raẽ hese upéi oipytyvõ haguã hapichápe oguahẽ haguã Jesús rendápe. Péicha jahecha ojapo Juan Bautista, ha péicha avei jahecha ojapo umi apóstolkuéra, tenonderã oho Jesús rapykuéri, omoirũ ha oñemongeta puku hikuái hendive, oikuaa ichupe, ha upégui osẽ omombe’u hapichápe upe oñandúva ha ogueru ichupekuéra oikuaa haguã avei Jesúpe.

Hi’ãite che irũ ha che reindy ñande vakeanove jahávo Hesu rapére, ñañemboja raẽ hese tañanembokatupyry. Ha’ete voi, ikatu haguãicha upéi ñambo’e, ñamosã ha ñamboguata ñande rapichápe Ñandejára rapére.

Pa’i Jasy.