Ñahendu Jesús Ñe’ẽ. Domingo Semana 24° TO

Escucha el evangelio y la reflexión en: https://youtu.be/7DeETCGZaZU?si=ue6vehdNWsKmRcSl

Domingo 24 a TO Ciclo A Mateo 18, 21-35

Upérõ Pedro oñemboja Jesús rendápe ha he’i chupe: — Mbo’ehára, oime ramo hembiapo vaíva che ndive piko mboy vése aheja rei vaerã chupe. 7 piko iporãma.

Jesús katu he’i chupe: — Nahániri. Ndaha’éi 7, 77 jo’a jo’a uvei.

Kóa ko káso ohechaukáta peẽme mba’éichatapa hína Ñandejára Rréino. Oiko va’ekue ndaje raka’e peteĩ mburuvicha oikuaaséva mboy-mboýpa odeve chupe umi omba’apóva chupe. Iñepyrũme voi, ojegueru hendápe peteĩ hetaiterei rasa odevéva chupe. Ha isoguégui, ndaikatu mo’ãiva omyengovia mba’eve. Huvicha upémarõ he’i ovendetaha chupe tembiguái ramo ta’ýrakuéra ha hembireko ave, ha upéva ári opa mba’e oguerekóva.

Pe hepykue opytáta chupe upe oiporu vaekue rekovia. Upépe, pe kuimba’e oñesũ huvicha renondépe ha ojerure asy chupe: “Che ruvicha, ndikatúi piko che ra’arõ’imive.

‘
Amyengoviáta niko ndéve pe aiporu va’ekue.” Ha huvicha oiporiahuvereko chupe. Oheja
rei chupe pe odevéva, ha oheja oho.

Ha ha’e osẽvo okápe katu, ojuhu hapichápe oiporu vaekue chugui pláta michĩ ra’ymi.
Opo voi hese ha oityvyro chupe, he’ívo: “Emyengovia chéve pe redevéva.” Hapicha oñesũ henondépe ha ojerure asy chupe: “Ndikatúi piko che ra’arõ’imive. Amyengoviáta niko ndéve pe aiporu vaekue” Ha’e katu ndoikuaaséi chugui mba’eve. Oguerahauka préso omyengoviapa peve pe oiporu va’ekue.

Umi hapicha ohechávo upéva, ipochypa. Oho hikuái mburuvicha rendápe ha omombe’u chupe mba’épa ojehu. Upémarõ pe mburuvicha ohenoika pe kuimba’épe ha he’i chupe: “Ne aña ra’y reikóva. Che niko aheja rei ndéve pe ikatu’ỹ vaekue remyengovia chéve, rejerure haguére. Mba’éicha piko nde, nderehecha kuaái nde rapichápe, che ajapo haguéicha ne ndive.”

Ha pe mburuvicha ipochy’eterei opytávo. Upémarõ ombyepotiuka omyengoviapa peve
upe chupe odevéva.

Upéi Jesús osẽ he’i: — Péicha avei ojapóta pende rehe che ru yvágape oĩva pende py’aite guive ndapeheja reíri ramo pende rapichápe pe ivaíva ojapóva pende rehe.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE

Mboy vése piko ñaperdona va’erã ñande rapichápe hembiapo vaikue; osẽ Pedro oporandu Jesúspe. Siete vésepa, he’i Pedro. Ha upéva ningo hetáma hina ñapensa porãramo, ajépa.

“Kóa ohasáma la rrája”. Ja’e niko ñande oiméramo ofalla va’ekue ñanendive, ñaperdona rire ofalla jeýramo. Jesús katu he’i Pédrope, ha he’i avei ñandéve, che irũ ha che reindy, ndaha’éi peteĩ térã mbohapy, térã 7 vésente jaheja rei va’erãha ofallávape.

Opa araite ñaperdona vaerã ñande rapichápe ohechakuaáramo hembiapo vaikue ha ojerure perdón.

ÑAÑEMBO’E OÑONDIVE

Ñandejára ore Ru, nde niko opa araite oreperdona ha eheja rei oréve ore pekádo, rombyasy ha rojeruréramo ndéve. Ore pytyvõmíkena ore avei ndéicha, roiporiahuvereko ha roperdona haguã ore rapicha ojavýva, ikangýva ha ofalláva, oúramo ojerure perdón.

Pa’i Jasy.