LECTURAS VIERNES SEMANA 27º DURANTE EL AÑO

LECTURAS VIERNES SEMANA 27º DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Galacia guápe  3, 7-14

Che pehẽnguekuéra: Aipórõ, peẽ peikuaa va’erã, Abraham ñemoñare teeha umi ogueroviáva. Tupã Ñandejára ñe’ẽ, he’íma va’ekue  voi, umi judio’ỹva apytépe oĩtaha umi Tupã Ñandejára oguerekóva hekojojáva ramo ijerovia rupi.

Ha omoguahẽ va’ekue  Abrahámpe ko marandu porã: “Opa tetã ojehovasáta nde rupi.” Aipórõ, umi Abrahámcha ogueroviáva ojehovasa avei.

Umi ojeroviáva tembiapoukapýre oñehundíta. Tupä Ñandejára ñe’ẽ he’ígui: “Oñehundíne umi ojapo’ỹva he’i háicha ite pe tembiapoukapýpe oĩva.” Aipórõ, hesakã porã avave ndojererekoiha heko jojáva ramo tembiapoukapy rupi. Tupä Ñandejára ñe’ẽ niko he’i: “Heko jojáva oikovéne ijerovia rupi.” Pe tembiapoukapy niko naipyendái jeroviápe, he’i uvei: “Tembiapoukapy ojapóva hendaicha ite, oikovéne hese.”

Jesucristo ñande pe’a ani ñañehundi pe tembiapoukapy rupi, ha’e voi oñemoĩ oñehundi haguã ñane rendaguépe. Tupä Ñandejára ñe’ẽ he’i: “Oñehundíne pe yvyráre osãingóva.”

Upéva ojehu, pe jehovasa Tupã Ñandejára ome’ẽ va’ekue  Abrahámpe ohupity haguã avei, Jesucristo rupi, umi judio’ỹvape. Ha oguahẽ haguã ñandéve ñande jerovia rupi, pe Espíritu Tupã Ñandejára he’i va’ekue  ome’ẽtaha ñandéve.

Tupã Ñandejára Ñe’ẽ.

SALMO ÑEMBOHOVÁI     110, 1- 6

Opavave: Tupã Ñandejára ndahesaráiri iñe’ẽ marangatúgui.

Che py’aite guive arohory Tupã Ñandejárape,

aty guasu ha heko jojáva atyhápe.

Tuicháko hína umi Tupã Ñandejára rembiapokue,

ha umi oguerojepy’a mongeta hese. O.

Tupã Ñandejára rembiapokue iporã ha omimbipa, ha’e heko joja opa ára.

Mba’e hechapyrãva ojapo ha umívagui ndoikói tesarái.

Tupã Ñandejára ipy’a porã ha oporohecha kuaa. O.

Ha’e omongaru umi hese ojeroviávape, ha opa ára imandu’a iñe’ẽ ome’ẽ va’ekuére.

Hetã guápe ohechauka hembiapo imbareteha,

ome’ẽvo ichupekuéra ambue tetã yvy. O.

ALELUIA Jn 12, 31b. 32

Aleluia.

Ñandejára Jesucristo he’i:

“Ko’ágã ko yvy Mburuvicha guasu oñemombóta okápe;

ha Che ajehupívove yvate yvy ári, amboatýta che jehe maymavépe.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha  11, 15-26

Upe ramo Ñandejára omosẽ rire añame, oime he’íva: “Beelzebú, Aña nguéra ruvicha voi niko hína pe ohejáva ichupe omosẽ umi mba’epochy kuérape.”

Ha oime avei umi, omoñuhãvo ichupe, ojeruréva Jesúspe ojapo haguã mba’e hechapyrãva ohechauka haguã Tupã Ñandejára oĩha hendive.

Ha’e katu, oikuaáva hína mba’épa oguereko hikuái iñakãme, he’i ichupe kuéra: Peteĩ tetã oñemboja’opa ramo ha opu’ãmba ramo oñoakãre, oñehundi. Ha opa hóga kuéra ho’apa ojo’ári. Péicha avei Satana voi opu’ã ramo ijehe, mba’éicha piko imbarete tapiáta? Kóicha ha’e, peẽ pejégui che amosẽha mba’epochy kuérape, Beelzebú pokatu rupi.

Péicharõ añete, máva piko ome’ẽ pene remimbo’e kuérape pokatu omosẽ haguã ichupe kuéra? Pene remimbo’e kuéra ojapóva rupi voi, ojehecha peẽ pejavyha. Che amosẽ ramo mba’epochy kuérape Tupã Ñandejára po rupi, upéva he’ise Tupã Ñandejára sãmbyhy oguahẽmaha peẽme.

“Peteï kuimba’e mbarete ikyse porã ramo ha oñangareko hógare, umi mba’e oñongatúva ipype oĩ porã. Ha ou ramo ambue imbaretevéva ichugui  ha ipu’aka hese katu, oipe’a ichugui  pe kyse ojerovia hague, ha opa oguerekóva, ha ojapo umívagui ojaposéva.

Upe che ndive oĩ’ỹva, oñemoĩ che rehe. Ha upe che ndive omono’õ’ỹva, omosarambi.”

“Peteĩ mba’epochy osẽ ramo oimeraẽvagui, oho oiko umi oky’ỹha rupi ohekávo pytu’u. Ha ndojuhúi ramo he’i: ‘Aha jevýta che rógape, mamo asẽ haguégui.” Ha ou jeývo, ojuhu pe osẽ hague ojetypei ha ipotĩ porãha. Upéi, oho ha ogueru ambue 7 mba’epochy, heko añavéva ichugui, oike hikuái ipype, ha oiko upépe. Ha péicha, pe yvypóra rekove opyta vaive iñepyrũmbýgui.

Ñandejára Jesucristo Ñe’ẽ