Ñahendu Hesu. Lunes 14ª Tiempo Durante el Año

Escucha el evangelio y la reflexión en: https://youtu.be/04-MDFLFpyY

Lunes 14º Durante el Año Mateo 9, 18 – 26

Upérõ Jesús oñe’ẽ aja hína, oguãhẽ sapy’a hendápe peteĩ hudíokuéra ruvicha.

Oñesũ henondépe ha he’i chupe: — Che rajy niko oime omano ramoite. Reho ramo emoĩ nde po hi’ári, oikove jeýne.

Jesús opu’ã ha oho hendive, idisípulo kuéra hapykuéri. Tapére katu, peteĩ kuña hasýva oikóvo 12 áñoma huguy mantéva, oñemboja Jesús rehe hapykue guio ha opoko ijao ruguáire. Pe kuña niko he’i ipy’apýpe “Ijao rehénte jepe apokórõ, akueráne.”

Jesús katu ojere, ha ohechávo pe kuñáme he’i chupe: — Néike che rajy. Che rehe rejerovia haguére rekuera. Ha upepete pe kuña okuera.

Ha Jesús oguãhẽvo pe mburuvicha rógape, ojuhúma upépe umi músiko kuéra, ha heta
hénte ojahe’o joáva hína. He’i chupekuéra:— Pesẽmba ko’águi. Ko mitakuña niko nomanói, okénte hína. Ha opukapa hese hikuái.

Omosẽmba rire opavavépe katu, Jesús oike pe mitakuña oĩháme. Ipojái ipóre ha omopu’ã pe mitakuñame. Ha opa rupi ojekuaa pe ojehu va’ekue.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime niko umi mba’e ñande ndaikatúiva ñamohenda, oñeapytĩ su’úva ñande rekovépe ndaikatúiva jajora, nañande pu’akáiva, noiméiva ñande pópe. Ko’ápe oñemombe’u ñandéve mokõi káso umíva reheguáva: ñemano ha mba’asy puku. Ha umíva ohasáva ou Hesu rendápe orovia pype ha’e ikatutaha ipu’aka umi ñande nañande pu’akáiva rehe.

Che rajy omano, he’i pe karai guasu. Nde rehóramo emoĩ nde po iñakã ári oikove jevýta. Ha pe kuña ymaite guivéma hasyetéva he’i ipy’ápe: “ijao rehente jepe apokórõ, akueráta.” Ha oho hendápe opoko peve hese. Mokõivéva ojerovia ha oñeha’ã, omýi, ojerure asy, opoko, oguata, oñe’ẽ, oheka. Ndaha’éi ku ojesaupi, oñepomoĩva ha opytáva oha’arõ.

Pe ñande jerovia ñanemboguata vaerã, ñanemoĩ vaerã tapépe. Jaheka Hesúpe, jaha endápe, ñahuguitĩ ichupe, ñañe’ẽ hendive. Jahecha Hesu noñembotavýi, oho hendive kuéra, oñe’ẽ avei ichupekuéra, ha he’i ojerovia haguére okuera hague.

Mba’éichaitépa reime hína che irũ ha che reindy. Rehótapa reñesũ Hesu renondépe ha ejerure asy ichupe upe eikotevẽtéva, ojapo haguéicha ko karai.

Térãpa eñembojátante ñemiete hápe, ojapo haguéicha pe kuña hasýva, he’i va’ekue ipy’ápe: Apokóramo ijao rehente jepe akuerátama. Ikatúko oime jakyhyje oiméramo opukáva ha oñembohorýtava mba’e ñande rehe. Marãve ndoikói. Hesu oma’ẽ guive ñande rehe, umíva vyropáma.

Pa’i Alberto Luna.