Ñahendu Hesu. Viernes 15ª Tiempo Durante el Año

Escucha el evangelio y la reflexión en: https://youtu.be/JVuJ5ODniU8

Viernes 15º Durante el Año

Mateo 12, 1 – 8

Peteĩ sábado árape, Jesús ohasa ohóvo peteĩ kokue rupi idisípulokuéra ndive. Umi idisípulo iñembyahýigui, oñepyrũ oipo’o trígo ra’ỹi ha ho’u ohóvo hikuái. Umi fariséo ohechávo upéva, he’i Jesúspe: — Ema’ẽmi mba’épa ojapo hína nde disípulo kuéra.

Péicha ndajajapóiva pytu’uha árape.

Jesús katu he’i chupe kuéra: — Ndapeikuaái nga’u piko mba’épa David ha iñirũnguéra ojapo raka’e ku iñembyahýi ramo guare. Oike hikuái tupaópe ha ho’u umi pan Ñandejárape oñemboyke vaekue. Ha’e kuéra niko ndaikatúi va’ekue ho’u umíva.

Pa’ikuérape guarãnte vaekue niko. Ndapeikuaái avei piko Moisés léipe he’iha, pa’ikuéra ikatuha hembiapo pytu’uha árape tupaópe, ha avave ndaikatuiha he’i hesekuéra mba’eve. Añete ha’e peẽme, pende apytépe oĩ hína ko’ágã peteĩ tuichavéva tupaógui.

Peẽ ndapeikuaái hína mba’épa he’ise ku Ñandejára Ñe’ẽme he’írõ “Che aipota pe iporiahuvereko pende rapichápe, pene rymba peikuave’ẽ rangue chéve ofréndarõ.”

Péva peikuaa rire, napemboja reíri vaerã mo’ã avavére hembiapo vaiha. Ha che poguýpe oime avei hína ha’évo mba’e-mba’épa ikatu ojejapo pytu’uha árape.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Heta ningo jareko léi ha artículokuéra, oñemoĩva ñane akã ári. Umi ikatúva jajapo ha ndaikatúiva jajapo oĩmba hína lívrope, he’íva lo mitã ñe’ẽ. Oime ñane Constitución, decreto, ordenanza municipal, estatuto, reglamento.

Ndofaltái ningo léi oparupiete. Organización, escuela, tupaópe jepe oime hína la kondision oñemoĩva ñandéve ha mba’éichapa ñamboguata va’erã opa mba’e. Ha umíva niko ñaikotevẽ ikatu haguãicha jajorrespeta, jaiko peteĩ guatápe ha ñañombojojapa.

Opa umi léi, decreto, reglamento, ordenanza kuéra, taha’e ñande socieda, térã ñande Iglésia rehegua, oĩ vaerã ñanepytyvõ haguãicha.

Umíva ha’e tembiporu oñemoĩva jaiko porãve haguã oñondive ñande sosiedápe ha Ñandejára rapére. Ndaha’éi vaerã niko ñane mbyai ha ñande rape joko haguã.

Ñahendu angete umi fariseo kuéra oiko vai Hesu ndive, idisípulokuéra ndojapói haguére pe léi he’i haichaite. Iñembyahýigui hikuái oipo’o kokuégui trígo ha ho’u ohóvo. Ha péva sábado árape ndikatúi kuri ojejapo iléi kuérape.

Hesu katu odefende ichupekuéra ha he’i pe tapicha ohasa asýva ha oikotevẽvape ndaikatúi jajopyve léi rérape ha ñambohasa asyve. Ha Ñandejára oipotaha ñane rakate’ỹ ñande rekovére ha ñande rapicha rekovére ha’e hakate’ỹ háicha ñande rehe. Ha pe léi, taha’e ha’éva, ñande
reko asy, ñande jopýva ha ohupíva ñande ári ikatu’ỹva jaropu’aka, natekotevẽi ñapena.

Oimépa hína nde che irũ ha che reindy, léi, reglamento umíva, oñemoĩva ne akã ári ha nepytyvõ rangue ndereko asyvéva. Mba’éichapa ikatúne umíva jaipe’a ha ñambopyahu. Mba’éichapa ikatúne péva jajapo.

Pa’i Alberto Luna.