Ñahendu Jesús Ñe’ẽ. Domingo 25º Durante el Año

Escucha el evangelio y la reflexión en: https://youtu.be/3BU8xuKnnRs

Domingo 25º Durante el Año

Marcos 9, 30 – 37

Umi árape Jesús ha idisípulokuéra osẽ oho Galiléa jerére. Ha Jesús katu ndoipotái avave oikuaa ha’e oikoha upe rupi, ombo’égui oikóvo idisípulokuérape. He’i chupekuéra: — Umi che rehe ija’e’ỹva niko che reitýta hína ha che jukáta hikuái. Ha amano hague 3 ára hápe katu, aikove jeýta.

Idisípulokuéra katu ndoikuaái mba’épa pe Jesús he’íva chupekuéra. Ha okyhyjégui, noporandúi chupe hikuái.
Jesús ha idisípulokuéra oguãhẽ Cafarnaúmpe. Ha oĩ jave hína hikuái Pedro rógape, Jesús oporandu chupekuéra: — Mba’e rehe piko peñemongeta kyre’ỹ pejúvo tapére.

Ha’ekuéra katu okirirĩmba chugui. Oñe’ẽ niko oúvo ra’e hikuái mávapa pe tuichavétava ijapytépekuéra. Ha Jesús oguapy, ha ohenói umi 12pe. He’i chupekuéra: — Oĩrõ pende apytépe oñemoĩséva hapichakuéra ári, péva tapykuetépe oñemoĩ vaerã, ha oiko va’erã hapichakuéra rembiguái ramo.

Upéi ohenói peteĩ mitã ha omoñembo’y ijapytépekuéra. Omboguapy hapypa’ũme ha he’i chupekuéra: — Peẽ peguerohory ramo mitã ko’ãichagua, chéve che guerohory hína. Ha chéve che guerohorýva, nda chéve añói che guerohory, upe che mbouharépe ave.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE

Ajépa ningo nañandetapykueséi avavégui ha ndajaperdeséi avave rovake. Hi’ãnte ñandéve yvatete ñaime. Hi’ãnte ñapuntea ha ñaganamba, opavave tañande recha ramo ha tañande guerohory. Yvágare váicha ñandepojáita upéicha ramo.

Hesu ohechakuaa iñirũnguéra apytépe oikeha avei pe ñembotuichase ha opilla tapére oiko vaiha hikuái oúvo jahecha mávapa la kápo ijapytépe. Avave ndaitapykueséi.

Upéva ikatu oiko avei ñande Iglésiape, oiko ñande grupo ha komunida kuérape, ñande kapílla ha congregaciónpe, ikatu oiko obíspo ha pa’ikuéra apytépe.

Oike ñande apytépe upe jeiko vai jahecha haguã mavaitévapa hína la omandáva, oñe’ẽ ha opyrû hatãvéva. Ha upépe ndaje Jesús ohenói iñirũnguérape ha he’i upe yvágare ipojaiséva, upe tuichasevéva, oñemoĩ va’erãha opavave rembiguái ramo, ha pe itenondeséva itapykue va’erãha ikatu haguãicha omoirũ umi itapykuéva, umi oñemohembývape. Ha Jesús he’i avei ñande jaguerohory ramo umi michĩvévape, mitãicha, ichupe jaguerohory ha jahayhu hína.

ÑAÑEMBO’E OÑONDIVE

Ñandejára Jesukrísto nde rejúi va’ekue eñemoĩvo avave akã ári. Eguejy va’ekue yvágaguiehovasa, eipohano ha embo’e mborayhupópe mboriahu ha michĩvévape. Orembo’e míkena roñemoĩ haguã avei umi mboriahu ha oñembotapykuéva ykére nde rejapo haguéicha. Ani ipu’aka ore rehe jejapo ha chentese. Amén.

Pa’i Jasy.