LECTURAS DOMINGO 26º DURANTE EL AÑO

LECTURAS DOMINGO 26º DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Números arandukápe oĩ háicha 11, 16-17a. 24-29

Ñandejára he’i Moiséspe: Embyaty 70 kuimba’e ojeapóva mba’e ramo ha omyakãva ichupekuéra. Eru ichupekuéra Jotopa Rógape ha toĩ upépe nendive. Che aháta añe’ẽ nendive upépe ha aipe’áta nde hegui michĩmi nde espíritugui, ame’ẽ haguã ichupekuéra.

Moisés osẽ ha omombe’u Israel guápe umi mba’e Ñandejára he’i va’ekue. Ombyaty umi 70 myakãhára ha omohenda ichupekuéra Jotopa Róga jere rehe. Upéma ramo Ñandejára oguejy pe arai ári ha oñe’ẽ ichupe.

Oipyhy michĩmi pe espíritugui ome’ẽ va’ekue Moiséspe ha ome’ẽ ichupekuéra. Pe espíritu oúvo hi’ári kuéra, oñepyrũ hikuái osapukái umi profétaicha. Upe rire ndojehuvéi ichupekuéra upéicha.

Mokõi umi 70 myakãhára gui, Eldad ha Medad, opyta ra’e hekohápe ha ndohói jotopa Rógape. Upépe Israel ñemoñare rekoha mbytépe pe espíritu ou hi’árikuéra ha ha’ekuéra avei oñepyrũ osapukái profétaicha. Peteĩ mitã rusu ou pya’e omombe’u Moiséspe mba’épa ojapo hína Eldad ha Medad.

Upéma ramo Josué, Nun ra’y, Moisés pytyvõhára imitã rusu guive, he’i Moiséspe: Ejokóna ichupekuéra che ruvicha!
Moisés katu he’i ichupe: ¿Nde selóso piko che rehe che ra’y? ¡Ha nga’u Ñandejára ome’ẽ ijespíritu opa Israel guápe osapukái haguã proféta ramo!

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 19, 8. 10. 12-14

Opavave: Ñandejára rembiapoukapy ndaijojahai, ñane mbopy’a rory.

Ñandejára rembiapoukapy ndaijojahai,
ñane mbopy’a rory.
Ñandejára rembiapoukapy ijeroviaha,
omoarandu oikuaa’ỹvape.O.

Ñandejára ñe’ẽ ipotĩ ha ndahekoviái.
Ñandejára rembiapoukapy ijeroviaha,
opavave oĩ heko itépe. O.

Chéve avei che resape’a,
ha umíva ajapógui chéve oho porã.
Mávapa upe ojavýrõ ohecha kuaáva?
Ñandejára, eheja rei chéve che rembiapo vaikue. O.

Ani rehejátei ajererovu,
upéicha ramo mante che reko potĩta,
ha mba’e vaípe nda’a mo’ãi. O.

LECTURA MOKÕIHA:
Ko’ágã ñahendúta Tupã Ñandejára ñe’ẽ Santiago kuatiañe’ẽpe oĩ háicha 5, 1-6

Pehendúke peẽ mba’e repyeta perekóva. Pene rasẽ ha pesapukáike, cháke ojehu vaíko hína peẽme. Pene mba’e repyeta itujupáta, pende ao ho’upáta yso.

Pende óro ha pende pláta havẽmbáta, ha umíva pene moĩ vaíta ha pene rundíta tatápe guáicha. Peiko pembyaty mba’e repyeta ko’ã ára pahápe guarã.

Hembiapokue repy napeme’ẽi va’ekue kokuépe omba’apóvape, osapukái hína pejejuhu vai haguã, ha Ñandejára ipu’akapáva ohendúma ko’ã mba’apohára sapukái.

Ko yvy ári peiko karu guasu ha vy’ápe, ha pende kyra tymbáicha, ha oguahẽma hína jejuka ára. Pejukauka reiete va’ekue hembiapo vai’ỹvape, ha’ekuéra oñemoĩ’ỹre pende rehe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Cf. Jn 17, 17ba
Aleluia.
Ne ñe’ẽ añeteguáva rupi
emboyke ichupekuéra ne mba’erã
Aleluia.

EVANGELIO
Marandu porã Ñandejára Jesucrísto rekove ha hemimbo’e San Marcos omombe’u háicha 9, 38-43. 45. 47-48

Upérõ Juan he’i Jesúspe: — Maéstro, rohecha niko kuri peteĩ omosẽva demóño nde rérape. Roho chupe ha rojoko, ndaha’éigui ñande apytepegua.

Jesús he’i: — Ani pejoko. Milágro ojapóva che rérape niko ndikatúi oñe’ẽ vai che rehe. Umi opu’ã’ỹva ñande rehe niko oĩ ñane ndive. Pe oñemoĩ’ỹva ñande rehe niko oĩ ñane ndive. Ha oimeraẽva ome’ẽva peẽme ymínte jepe, chendive peiko haguére, añete ha’e peẽme ndopyta mo’ãiha hekovia’ỹre chupe.

Oimeraẽ oitýva pekádope umi michĩvéva jepe che rehe ojeroviávape, iporãve va’erã upévape oñapytĩ ita ijajúrare ha ojeity ýpe. Ha peichahágui nde po nde reitýtarõ pekádope, eikytĩ. Iporãve niko reikove Ñandejára ndive nde po peteĩ reheve, ha ani nde po mokõive reheve reho Aña retãme, tata ogue’ỹháme. Ha nde py nde reitýtarõ pekádope, eikytĩ.

Iporãve vaerã niko reikovérõ nde py peteĩ reheve, reho rangue Aña retãme nde py mokõive reheve. Ha nde resa nde reitýtarõ pekádope, emombu. Iporãve vaerã niko reike Ñandejára Réinope nde resa peteĩ reheve, reho rangue Aña retãme nde resa mokõi reheve. Cháke upépe umi yso nomanói ha tata araka’eve ndogue mo’ãi.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.