MIÉRCOLES TRIGÉSIMO SEGUNDO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Sabiduría arandukápe oĩ háicha    6, 1-11

Pema’ẽke, peẽ, peisãmbyhýva hetápe, ha pejejapóva umi tetã pende po guýpe oĩvare. Pokatu ou peẽme Tupä Ñandejáragui, ha pe Yvateteguágui pu’aka, pene rembiapokue ha’e oipyguaráne oikuaa haguã mba’érepa pejapo ha mba’épa pejaposeve.

Peẽ, hembijokuái, ndapeporo sãmbyhýi va’ekue  hekópe, ndapejapói mba’evérõ hembiapoukapy, ha ndapejapói ha’e oipota háicha.

Peichahágui Tupä Ñandejára ojeitýta pende ári pochy guasúpe, poguasu kuérape oha’arõgui ñembojovake ipohýiva. Oiporiahuverekógui oheja rei imirĩvape, ipoguasúva ndive katu ojopy va’erã.

Tupã opa mba’e Jára ndoguevíri avavégui, ha ipoguasúva nomongyhyjéi ichupe: ha’e ojapo michĩva ha tuichávape, ha peteĩcha oñangareko hesekuéra.

Umi poguasu katu oñembojovake pohýi va’erã. Mburuvicha guasukuéra, peë me amondo che ñe’ẽ, peikuaa haguã arandu ha ani pe’a jejavýpe.

Tupã Ñandejára rembiapoukapy, ojapóva ojererekóta imarangatúva ramo, ha umi ipype ojeheko mbo’éva ipype avei ojuhúne pytyvõ.

Pehendúke, aipórõ, che ñe’ẽ, peikumby ha pejeheko mbo’éne.

Tupã Ñandejára Ñe’ẽ.

SALMO ÑEMBOHOVÁI    81, 3-4. 6-7

Opavave: Tupã Ñandejára heko joja hína.

Peipytyvõ umi ha’eño ha ityre’ỹvape,

pehecha kuaa imboriahu ha ojejopy vaívape.

Peipytyvõ umi ikangy ha imboriahúvape,

ha peipe’a ichupe kuéra umi hembiapo vaíva po guýgui.” O.

Che ha’e pende rehe: ‘Tupã Ñandejára niko peẽ,

upe Yvatete oikóva ra’y.’

Amo ipahápe yvypóraicha jeýnte pemanóta,

peñehundíta mburuvichakuéra oñehundi háicha.” O.

ALELUIA 1Tes 5, 18

Aleluia.

Pe aguyjeveme’ẽ Tupã Ñandejárape opa áraite: péva hína Tupã Ñandejára oipotáva pende hegui

Ñandejára Jesucrísto rupi.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha   17, 11-19

Upe ramo ohóvo Jerusalénpe, Jesús ohasa Samaría ha Galiléa pa’ũ rupi. Ha oguahẽ peteĩ tava’ípe, ha upépe osẽ huguãitĩvo 10 kuimba’e ijaipáva. Opyta mombyry ichugui, ha osapukái: Jesús, mbo’ehára, ore poriahuvereko mína!

Ohechávo ichupekuéra, Jesús he’i: Tapeho pa’i rendápe.

Ha oho aja, ipotĩ hikuái imba’asýgui. Peteĩva, ojechávo ipotĩha, ojevy ha sapukáipe oguerohory Tupã Ñandejárape, ha oñesũ Jesús renondépe, ojayvy yvy peve ome’ẽvo ichupe ijaguyje .

Upéva pe kuimba’e Samariagua. Jesús he’i ichupe: Ndaha’éi piko 10 ra’e umi ipotĩ va’ekue  imba’asýgui? Moõ piko oime umi ambue 9? Ko kuimba’e mombyrygua año piko ou oguerohory haguã Tupã Ñandejárape?

Ha he’i upe karia’ýpe: Epu’ã ha tereho. Rejerovia rupi rekuera.

Ñandejára Jesucristo Ñe’ẽ.