LECTURAS JUEVES 3º TIEMPO DURANTE EL AÑO

LECTURA PETEÎHA:

Ko’ágä   ñahendúta Tupã Ñandejára ñe’ẽ Samuel arandukápe oĩ háicha                                       7, 18-19. 24-29

Natán omombe’u rire mburuvicha guasu David upe Tupã Ñandejára ñe’ẽ, David oike oñembo’e haguã Tupã Ñandejára renondépe ha he’i: “Che Jára, máva piko che, ha che rogagua, che moguahẽ haguã ko’apete peve? Ha michĩ etereígui gueteri vaicha ndéve ko rejapóva, ne mandu’a avei ne rembiguái róga ko’ẽrõ guáre. Ndaipóri ndeichagua Tupã che Jára! nde reipota haguére tetã Israel nemba’erã opa árape guarã ha nde hína Tupã Ijára.

Ko’ágä   che Jára, emoañete kena opa ára peve guarã ko ne ñe’ẽ reme’ẽva ne rembiguái ha hóga guápe, ha ejapo ere haguéicha! To ñemomba’e guasu nde réra opa árape. To je’e: ‘Ñandejára ipu’akapáva niko Israel Tupã.’ Ha che róga toĩ hatã ne renondépe.

Nde, Tupã Ñandejára ipu’akapáva, reikuaauka chéve remohendataha che rogagua, upévare che, ne rembiguái ramo jepe, ajerure ndéve kóicha: Nde hína Tupã che Jára ha ne ñe’ẽ añetegua. Ere va’ekue reme’ẽta ne rembiguáipe ko’ã mba’e iporã itéva. Ehovasa kena che róga, opyta haguã opa ára nde resa renondépe. Nde, Tupã Ñandejára, reme’ẽma ne ñe’ẽ, ha rehovasávo ne rembiguái róga, ojehovasáta opa árape guarã.”

Tupã Ñandejára Ñe’ẽ

SALMO ÑEMBOHOVÁI   131, 1-5. 11.13-14

Opavave: Tupã Ñandejára omoĩta ichupe mburuvicha guasúrõ

Ore Jára, ne mandu’a kena David rehe

ha opa mba’e ohasáva nde rehehápe.

Heta ite ha’e ohasa asy va’ekue,

Ndéve Tupã Jacob Jára mbarete. O.

“Ndaike mo’ãi che róga guýpe, che rupápe nañenói chéne,

che resa ndahejái chéne oñemboty,

térã che ropepi osapymi, ajuhu peve Ñandejárape hendarã,

upépe, Jacob Tupã mbarete oiko haguã.” O.

Tupã Ñandejára nopyrũiva iñe’ẽre, ome’ẽ va’ekue Davídpe iñe’ẽ:

“Peteĩ nde ra’y amoĩta mburuvicha

guasúrõ ne rendaguépe. O.

Tupã Ñandejára niko oiporavo yvyty

Sión upépe ha’e oikoségui.

Ápe apytu’úta opa ára, ápe aguapýta ko’ápe aikoségui. O.

ALELUIA Sal  118, 105

Aleluia.

Ne ñe’ë mba’erendy hína che raperäme

ha ohesapéva che rape.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Marcos omombe’u háicha      4, 21-25

Upe ramo Jesús he’i upe aty guasúpe: “Ojegueru nga’u piko peteĩ mba’e rendy oñemoĩ haguã mbayru guýpe térã tupa guýpe? Nahániri, peteĩ mba’e rendy oñemoĩ yvate oporohesape haguã. Upéicha avei ndaipóri okañýva ojehecha’ỹ va’erã ha oñemíva ojekuaa’ÿ va’erã. Ijapysáva to hendu.”

He’i avei ichupekuéra: “Pehendúke ko ha’éva: Peẽ pejapo háicha pende rapicháre, Tupã Ñandejára ojapóta pende rehe ha ombojo’avéne. Upe oguerekóvape oñeme’ẽvéta, pe oguereko’ỹvagui katu upe michĩmi oguerekóva jepe oipe’áta.”

Ñandejára Jesucristo Ñe’ẽ