Ñahendu Jesús Ñe’ẽ. Domingo 8º Tiempo Durante el Año

Escucha el evangelio y la reflexión en: https://youtu.be/IbkmfRh5DbE

Domingo 8º Durante el Año Ciclo C Lucas 6, 39-45

Upérõ Jesús omombe’u idisípulokuérape kóva ko káso: “Hesatũva nga’u piko ikatúne ogueraha ipógui hapicha resatũme. Nahániri aje. Mokõivéva ho’áne yvykuápe oñondive. Ndaipóri avave ikatúva tuichave imbo’eháragui. Ojehekombo’e porã rire ae ikatúne ohupyty imbo’eharépe.

Mba’éicha piko aipo rehecha pe yvyra ku’i nde ryvy resápe oĩva, ha nderehechái pe yvyra poguasukue tuja nde resápe oĩva. Ha nderehecháirõ pe nde resápe oĩva piko, mba’éicha nde py’a ere haguã nde ryvýpe: ‘Tanohẽna ndéve pe yvyra ku’i nde resápe oĩva’. Nde, tekove rova mokõi. Enohẽ raẽna pe yvyra poguasu kue tuja nde resápe oĩva rehecha porã haguã. Ágã upéi ikatúne renohẽ pe yvyra ku’i nde ryvy reságui.”

Yvyramáta porã niko ndaikatúi hi’a vaívo. Upéicha ave, ndaipóri yvyramáta vai hi’a porãva. Yvyramáta niko jaikuaa hi’áre. Ndajaipo’ói niko ígo jukérigui, térã parral ñana reígui. Umi ipy’a porãva niko, mba’e iporãvante he’i. Ipy’apýpe voi imba’e porãgui.

Umi heko añáva katu, ivaívante voi he’i. Ipy’apýpe voi oĩ ivaíva. Ha upe ipy’apýpe oguerekóvagui, upévaguinte oñe’ẽ.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Kachórro de tígre suele ser hovéro”, he’i ningo Emiliano purahéi. Jaguarete ra’y ipara mante va’erã. Upéicha ningo oje’e umi mitã ojagarráva pe ilája vai itúva, isy, terã ihénte kuéragui.

Jesús he’i peteĩ yvyra máta porã ndaikatúi hi’a vai ha peteĩ yvyra máta vai ndaikatúi hi’a porã. Ha pe yvyramáta hína pe ñande py’a, ñane korasõ. Ndaha’éi katuete ñane reñói hague, ñande sy, ñande ru.

Pe ñande py’a ha ñane korasõgui niko osẽ temiandu, mba’e pota, ñe’ẽ, tembiapo. Iporãva ha ivaíva. Ha pe ñane korasõ niko upévare oike va’erã eskuélape. Ha jaha haguã jaike upe Jesús eskuélape ningo tekotevẽ nde che irũ ha nde che reindy, jahechakuaa sapy’ánte ñane resatũ ha ñakañyha jaikóvo amo ñande javorái kuápe. Ñaikotevẽha ha’e ha avei ñande rapichakuéra ñande resape’a.

Ñaikotevẽ upéva raẽ jajapo, he’i Jesús. Ani ñambo’e ñande rapichápe mba’épa ojapo va’erã ha mba’épa ndojapói vaerã. Ha ñande katu tuichave ñaneresatũ ha ñakañy.

Upéicha ramo mokõi hesatũva oñomboguata ha ho’áta hína yvykuápe. Ñañembojami Jesús re aipóramo toipe’a ñande reságui upe ky’a ñanemohesatũva, ha ñahendu avei ñande rapicha he’íramo ñandéve jajavyha. Ha upéi ñaipytyvõ ñande avei ñande rapichápe ohecha porãve haguã hape ha hekove.

ÑAÑEMBO’E OÑONDIVE

Ore pytyvõmíkena Ñandejára ore Ru ha ore resape’a, rohechakuaávo umi mba’e ore apytĩ ha ore jokóva, roñeha’ã haguã rojora ha roipe’a roguata porãve haguã ore rapichakuéra ndive. Amén.

Pa’i Alberto Luna.