Ñahendu Jesús Ñe’ẽ. Viernes 4º de Cuaresma

Escucha el evangelio y la reflexión en: https://youtu.be/6QJ-Ax-eWPc

Viernes 4º Cuaresma Juan 7, 1-2. 10. 14. 25-30

Jesús oho oiko Galiléape oikuaágui Judéape umi judío ruvichakuéra ohekaha chupe ojuka haguã. Hi’aguĩma umi judíokuéra arete hérava Enrramadaguy, Ityvýrakuéra oho rire Jerusalénpe, Jesús avei upe rire osẽ oho upe Enramadaguy areterã. Kirirĩhamete oho, ojechauka’ỹre avavépe.

Upe arete mbyte rupíma hína, Jesús oho tupaópe ombo’e haguã. Umi Jerusalengua apytépe oĩ he’íva Jesús rehe: — Ndaha’éi piko kóva ku ohekáva hikuái ojuka haguã. Ha péina ápe oñe’ẽ hína opavave renondépe ha ndaipóri he’íva chupe mba’eve. Oime piko ñande ruvicha kuéra oikuaa ha’eha hína pe Mesías. Ani chéne. Ñande niko jaikuaa moõguápa kóva. Ha jaikuaa ave, ágã pe Mesías ou vove, ndajaikuaái mo’ãiha moõguipa ou.

Jesús ombo’e hína tupaópe, ha ohendúvo ko’ã mba’e oñe’ẽ hatã porã ha he’i: — Añetéiko peikuaa mávapa che ha moõguipa aju. Chéko ndajúi che jehegui reínte. Aju, che mbou haguére peteĩ ijeroviaháva ha peẽ peikuaa’ỹva. Ha che aikuaa chupe, chugui ajúgui ha ha’e
che mboúgui.

Upépe, oĩ oguerahaséva Jesúspe préso. Avave jepe ndopokói hese, noguãhẽigui gueteri hi’ára. Heta jepe oĩ ojeroviáva hese, ha he’íva: — Pe Mesías ou vove, nga’u piko hetave milágro ojapóta chugui.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñande rogagua, ñane vesíno, ñande kakuaa irũngue, ñande valleguápe ningo ñande jaikuaa porã, ñandeichaguánte hikuái. Ha nañaha’arõ guasúi ojapóvo mba’e guasu, hechapyrãva. Ha péicha hágui herakuã guasúramo ja’émane: Máva piko oimo’ãta… Ha
oñemomba’e guasuse ramo ja’éne chupe: Máva piko nandekuaái… Ha péicha avei umi Jesús vallegua ndojeroviaiete voi ha’éne haguã Ñandejára remimbou, pe Mesia oha’arõva hikuái, oikuaa rupi moõguápa.

Jesús ningo Galileagua, kampañagua. Ha la Nazaret katu peteĩ tava’i, compañía kañ’i peteĩ Galilea ruguápe oiméva, naherakuã porãiva hi’ári.

Jesús oñandu ndojeroiviaiha hese ha he’i chupe kuéra mba’eve nde’iséi oikuaa ramo hikuái moõguápa ha’e. Mba’eve nde’iséi ha’e ramo kampesíno, siudagua, itavy térã iñarandu ramo. Upe he’iséva hína ha’e jaikuaa ha ñaneñe’ẽrendu Ñandejárape. Ha’e hína upe omohendáva, omoañetéva ñande rekove ha ñane rembiapo.

Ikatúko hína che irũ ha nde che reindy, ñande avei jajeko ha ñapenaiterei upe oje’évare ñande rehe. Jesús he’i umíva ári ndaikatúi ñamboguapy ñande rekove. Umíva ou ha oho yvytúicha. Pe Ñandejára ñanembo’éva ha ohechaukáva ñandéve katu opyta opa ára
guarã. Ha hese ñapena ramo, te’íntema hikuái he’iséva ñande rehe, marãve ndoikói.

Pa’i Alberto Luna.