Ñahendu Jesús. Chiquitunga ára

Escucha el evangelio y la reflexión en: https://youtu.be/JpI6lB8nu0M

28 abril: Chiquitunga ára Lucas 10, 38 – 42

Ohokuévo Jerusalénpe, Jesús ha idisípulokuéra og̃uahẽ peteĩ puéblope. Upépe, peteĩ kuña hérava Marta omog̃uahẽ chupe kuéra hógape. Marta ndive oiko avei ikypy’y hérava María. Ha oho María oguapy Jesús ypýpe ha ojapysaka hína Jesús rehe.

Marta katu hembiapóva hína kosináme ha óga ñemopotĩme hamba’e, upéi oñemboja Jesús rendápe ha he’i chupe:— Mbo’ehára, nde rehechakuaái piko chenteha pe omba’apóva, ha María ndojapoiha mba’eve. Ere chupe ta che pytyvõ.

Jesús ojere he’i chupe: — Marta, Marta. Heta mba’ére niko rejepy’apy hína. Ha rejepy’apy rei. Peteĩ mba’énte niko oĩ ovalevéva opa mba’égui. María oiporavo upéva, ha upéva ndoipe’a mo’ãi chugui avave.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Ko árape ñanemandu’a ha jaguerohory hína ñande Iglésia Paraguái guápe, peteĩ mitãkuña marangatúpe. Péva hína Chiquitunga, héra teéva María Felicia Guggiari. Ha’e niko onase va’ekue Villarrica pe 1925 pe. Ko kuña gua’i marangatu ikarai ha ojapo va’ekue ipriméra comunión ha iconfirmación, iválle Villarrica Catedral pe. Villarrica pe avei ostudia ha 16 áño pe ou oikuaa Pa’i caazapeño Julio César Duarte Ortellado marangatúpe.

Péva omokyre’ỹ ichupe ha oike Acción Católica pe, ijaty hápe mitãrusu ha mitãkuñarusu ojerovia mbaretéva Ñandejárare. Ha hetia’e voi ombyatývo hapichápe ijerere. Ombo’e mitãnguéra, oho ohecha hasýva hospitálpe, préso, ha umi ha’eñóva rendápe.

Opu’ã upérõ pe revolución 1947 gua ha itúva ha’égui liberal okañy ha oho Argentina pe ani haguã ojejuka. Heta ohasa asy ihénte kuéra umíva apytépe. Ipahápe ova hikuái Paraguaýpe. 25 áño oreko upérõ Chiquitunga. Hatãvéma opyrũ ohóvo pe Acción Católica pe ha omoĩ ichupe hikuái omotenonde haguã ipyahuvéva. Upe jave ou avei ojegusta peteĩ kuimba’e pe aty guárehe, ha oñomoirũ hikuái tembiapópe, oho ohecha hasýva Hospital pe, ombo’e catesímo Chacarita pe hamba’e.

Upe jave avei ostudiave maestrarã ha oiko ichugui mbo’ehára. Ha ombo’e kuri mitãme Escuela Tupao Perpetuo Socorro pe. Ajépa iporãite ñanemandu’a hese mbo’ehára kuéra ára oguahẽ mbotávo.

Heta tembiapo porã omomýi rire, 29 áño orekópe, Chiquitunga ou oñandu Ñandejára ohenoiha ichupe hermanarã. Ha oike hermana Karmelíta kuéra ndive opytaségui oñembo’e ñembotypy Jesús ndive. Ha 4 áño rire ou hasy katuete. Ha oñembo’évo umi iñermánakuéra ndive oñandu porã iterei ha ohecha vaicha voi Jesús ha Tupãsy ouha ipiári, ha upéicha oñeme’ẽ ha omano vy’a ha py’aguapýpe.

Kóva ko kuña gua’i marangatu ete ojapo raẽ raka’e upe Marta ojapo haguéicha Ñandejára ndive: Oiko hatã, ou ha oho oservi ha ojapóvo heta mba’e Jesús ha iñirũ nguérape guarã. Ipahápe katu ou oiko María icha: opytántema oguapy, ojesareko Jesús re, oñembo’e ha ohendúntema ichupe.

Pa’i Alberto Luna.