VIERNES DÉCIMA SEMANA
14 junio, 2024DOMINGO XI DEL TIEMPO ORDINARIO
16 junio, 2024Ko’ágã ñahendúta Tupã Ñandejára ñe’ẽ Reyes aranduka peteĩhápe oĩ háicha 19, 19-21
Elías oho upe Tupã Ñandejára yvytýgui ha ojuhu Eliséope yvy ombojeréva hína. Eliseo renondépe oĩ 12 júnta guéi ha ha’e omboguata pe tapykue pegua. Elías oho hendápe ha oity hi’ári ijahoja. Upe vove Eliseo oheja hymba guéikuéra, oho pya’e Elías rapykuéri ha he’i ichupe: Tahána ta mombe’u che rukuérape ha upéi taha ne ndive.
Ikatu reho, he’i ichupe Elías, ha ne mandu’áke upe nde rehe ajapo va’ekue. Eliseo oho ha ojuka mokõi tóro, oipuru pe júgo jepe’a ramo, ombojy pe so’o ha omongaru hogayguápe. Upéi oho Elías rapykuéri ha opyta hembiguái ramo.
Tupã Ñandejára Ñe’ẽ.
SALMO ÑEMBOHOVÁI 15, 1-2a. 5. 7-10
Opavave: Tupã Ñandejára, nde hína opa mba’e chéve guarã
Tupã, eñangareko kena che rehe, ne rendápe niko aguahẽ.
Ha’e ndéve: “Nde hína che Jára ndaipóri ne jojáva.”
Tupã Ñandejára, nde hína opa mba’e chéve guarã.
Nde pópe oĩ che rekove. O.
Amomba’e guasúta Ñandejárape che resape’áva,
pyharekue jepe che py’a rugua guive che moarandu.
Opa árape Tupã Ñandejárare che mandu’a,
ha’e oĩ ramo che ypýpe nda’ái chéne. O.
Upévare, che py’a rory, che korasõ ombovy’a ha py’a guapýpe aikóne.
Nda che rejái chéne amano.
Ndereheja mo’ãi ne irũme yvy kuápe ojeity. O.
ALELUIA Sal 118, 36a. 29b
Aleluia.
Che korasõ emboguejy nde apoukapy rehe ha eme’ẽ chéve ne remime’ẽ aikuaa haguã rembiapoukapy.
Aleluia.
EVANGELIO
Marandu porã Ñandejára Jesucristo rekove ha hemimbo’e San Mateo omombe’u háicha 5, 33-37
Upe ramo Ñandejára he´i hemimbo’ekuérape: Peẽ peikuaa oje’e hague pende ypykuérape yma: “Ani repyrũ ne ñe’ẽ Tupä Ñandejára renondépe reme’ẽ va’ekuére.”
Che katu ha’e peẽme: Ani peme’ẽ pene ñe’ẽ mba’evéicha vérõ. Ani yvágare, cháke upéva Tupã Ñandejára guapyha, térã yvýre, cháke upéva ipyenda. Ani Jerusalén rehe, upévako mburuvicha guasu Tupã Ñandejára táva. Pene akãre jepe ani peme’ẽ pene ñe’ẽ. Peẽ niko ndaikatúi, peteĩ pene akãraguénte jepe pemoapatĩ térã pemohũ. Peje uvei ‘Héẽ’, térã ‘Nahániri’. Pejeve ramo, upéva ou pe ivaívagui.
Ñandejára Jesucristo Ñe’ẽ