Ñahendu Jesús Ñe’ẽ. Jueves 18º Durante el Año

Escucha el evangelio y la reflexión en: https://youtu.be/CKd9ZW61ckQ?feature=shared

Jueves 18º Durante el Año Mateo 16, 13 – 23

Upérõ Jesús oguãhẽmbotávoma Cesaréa Filípope, oporandu idisípulokuérape:— Mba’éiko oje’e che rehe upe rupi. Mavaha che piko he’i hikuái.

He’i chupe hikuái: — Oĩ he’íva nde rehe, nde Juan Bautistaha. Oĩ katu he’íva ndeha Elías, ha oĩ ave he’íva ndeha Jeremías térã ambue proféta.

Jesús oporandu chupe kuéra: — Ha peẽ piko mba’e peje. Mávaiko che.

Ha Simón Pedro he’i chupe: — Nde hína pe Mesías, Ñandejára oikovéva Ra’y.

Jesús he’i chupe: — Ñandejára ta nde rovasa ndéve Simón. Ndejeheguínte ndereikuaái vaerã mo’ã kuri péva, che ru yvagapegua ndoikuaaukái rire ndéve. Ha ha’eve ndéve Pedro, nde réra niko he’ise ita. Ko ita ári amopu’ãta che iglésia, ha mano jepe nda’ipu’aka mo’ãi hese.

Nde pópe amoĩta Ñandejára Rréino rokẽ reipe’a haguã. Ha opa mba’e nde emosãva ko yvy ári oñemosãta avei yvágape. Ha opa mba’e nde reheja reíva ko yvy ári, yvágape avei ojeheja reíta.

Upéi Jesús he’i idisípulokuérape ani haguã he’i avavépe ha’eha pe Mesías. Jesús oñepyrũ omombe’u idisípulokuérape oho mante vaerãha Jerusalénpe. He’i chupekuéra upépe umi mburuvicha, pa’i ruvicha ha umi Moisés léi ombo’éva heta ombohasa asytaha chupe. He’i avei ojejukataha upépe, ha oikove jeytaha mbohapy ára haguépe.

Upépe Pedro ogueraha chupe ha’eñoháme, ha he’i chupe anive haguã péicha oñe’ẽ.

He’i chupe: — Mba’éichata piko péva. Ñandejára ndohejái chéne ojehu ndéve mba’eve.

Jesús katu ojere ha he’i Pédrope: — Na che reja Satana. Nde niko ita che rapépe.

Ndereikuaái pe Ñandejára oipotáva. Nde niko rejogua opavavépe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Mba’épa ñahendu ñande oje’e Jesús re. Mba’épa oje’e ñande róga pýpe, ñane irũnguéra apytépe. Mba’épa he’i umi hénte upérupi Jesús re. Ha mba’e he’i hikuái umi Jesús ndive oguatáva rehe, tupaogua, pa’i, hermana, catequista, animador umíva rehe.

Ñahendu Jesús oporandu ijapóstolkuérape mba’épa ohendu hikuái upérupi, mba’épa he’i la gente hese oikóvo. Ha upéi katu oikuaaséma mba’épa he’i ha mba’épa oñandu hikuái hese. Jesús nohendusevéima gente jurúgui osẽva, ohenduse ha oikuaase
mba’épa he’i ha oñandu hikuái hese.

Ha’ete ku Jesús ombo’eséva ichupekuéra, ha ñandéve avei upe jave che reindy ha nde che irũ, heta ñe’ẽ ha opaichagua ñahendútaha upérupi. La gente juru niko ndaijokohái. Opáichavo, amo ipahápe la he’iséva hína upe ñande ñañandúva amo ñande py’a ruguápe, ha Ñandejára oñandukáva ñandéve. Upéva la ovaléva. Hembyre, láta pararã rei.

Pa’i Alberto Luna.