Ñahendu Hesu Ñe’ẽ. Lunes 23º Durante el Año

Escucha el evangelio y la reflexión en: https://youtu.be/4x_YVOAUnrI

Lunes 23º Durante el Año Lucas 6, 6 – 11

Upérõ, peteĩ pytu’uha árape, Jesús oike tupaópe ha oñepyrũ ombo’e. Oĩ hína ra’e upépe peteĩ kuimba’e ipo akatúa atãva. Umi fariséo ha Moisés léi ombo’éva omaña hína Jesús rehe jahecha omonguerápa chupe pytu’uha árape. Péicha ojapórõ, he’i kuaáta hese hikuái omba’apo hague pytu’uha árape. Jesús katu niko, oikuaapáma voi mba’épa oguereko hikuái iñakãme.

Osẽ he’i pe kuimba’e ipo atãvape:— Epu’ã ha eñembo’y pe mbytépe.

Upe kuimba’e opu’ã ha oñembo’y, ha Jesús he’i umi ijerére oĩvape:— Peje chéve peteĩ mba’e. Mba’e-mba’épa ikatu jajapo pytu’uha árape, ivaíva térãpa iporãva. Jasalva peteĩ ñande rapichápe, térãpa ñahundi.

Ha oma’ẽ umi ijerére oĩvare, ha he’i pe ipo atãvape: — Eipyso nde po. Oipyso ha’e ipo, ha upévo okuera.

Umi fariséo hamba’e katu ipochy eterei ha oñepyrũ oheka hikuái mba’éichapa ikatúta oity Jesúspe.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Jaguata karẽ ha jafalláramo niko ikatu jajepilla ha opẽ ñande rehe léi ha artículokuéra. Ou ñande ári policía, fiscalía, karai Juez, ha jaike pléitope. Ñamomba’éramo léikuéra ha jajapóramo he’íva niko jaguata hesakã hárupi. Ndajakyhyjéi ha ndaipóri ñakañy haguã avavégui.
Opáichavo ñande jaikuaa oĩha sapy’ánte léi nañanembojojáiva ha naiporãmbáiva opavavépe guarã.

Jaikuaa ñande ymave ñane retãme kuñanguéra ndaikatúi va’ekue ovota. Upe léi nome’ẽi ichupe pe derecho. Ndaikatúi vaekue avei
omoĩ iñakãre yvy, óga. Iména mante upe léi ombo katu. Ymave avei umi kamba ojerereko vaekue tembiguáiramo. Ha’e kuéra ndaikatúi ohái héra registro civílpe ha ndorekói documento. Ha’e kuéra léi guýpe mymbáramo guáicha va’ekue.

Umíva umi léi niko iñambuéma ha oñemohendáma ombojojave haguã kuña ha kuimba’e, kamba ha morotĩva. Ha umíva ohechauka ñandéve tekotevẽha ñañeha’ã ñamohenda jahávo umi léi nañanembojojáiva, oĩva gueteri ñande apytépe. Ikatu haguãicha léi ho’a peteĩcha opavave akã ári. Taha’e rríko térã imboriahúva, taha’e itavy térã iñarandúva.

Umi judíokuéra léi niko he’i va’ekue ndaikatuiha oñemba’apo sábado ára aja. Ha ipochy hikuái Jesús ndive oipohano haguére peteĩ kuimba’e hasýva sábado árape.

Jesús he’i chupekuéra upe léi noirĩha ojoko haguã tembiapo porã. Ha oiméramo léi ojokóva tembiapo porã upéva naiporãi, ndajahejái vaerãha jajapo’ỹre tembiapo porã ñande rapichápe, ñapu’ãramo jepe upe léi rehe. Upéicha avei oiméramo peteĩ léi he’íva jajapo haguã hendape’ỹva, térã ivaíva ñande rapicháre, upéva, cristiáno ñande rekópe, ndaikatúi jajapo, ñapu’ãramo jepe upe léi rehe.

Pa’i Jasy.