Ñahendu Jesús Ñe’ẽ. Martes 26º Durante el Año

Escucha el evangelio y la reflexión en: https://youtu.be/CnkInZy9t1M

Martes 26º Durante el Año Lucas 9, 51 – 56

Oñemo’aguĩvo ára Jesús ojehupi hag̃ua yvágape, osẽ oho Jerusalénpe. Omondo henonderã oho vaerãva ohecha chupe hendaguã Samariape. Umi Samariagua katu ndoipotái Jesúspe ijapytépekuéra, oikuaágui hikuái ohoha hína Jerusalénpe. Santiágo
ha Juan oikuaávo upéva, osẽ he’i chupe: — Mbo’ehára, reipotápa roñembo’e Ñandejárape, ha toity ha’e tata yvágagui ohundipa hag̃ua ko’ãvape.

Jesús katu ojere oja’o chupekuéra. Ha osẽ oho hikuái ambue puéblope.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Oĩ ningo ñande rapicha oiko vaíva ha ndaikatúiva ojuecha ha’e haguére ambue partido, ambue organización, ambue família, ambue távagua. Oñakontraria voi lo mitã, ojoavy haguére irreligiónpe, iclub, icolégiope ha mba’e. Ndaija’éi ojuehe ha ndoikuaaséi ojuehegui mba’éve. Ojotopáramo katu oñorairõ haguãntema voi. He’i háicha ojupe umi oiko vaíva: “ágante jajotopáta tape po’ípe hína”.

Ñahendu angete mba’éichapa Jesús ohasa umi Samariagua válle rupi, ohóvo Jerusalénpe. Ha umi Samariagua niko ndaija’éiva ha noñe’ẽiva umi judiokuéra ndive, ha judiokuéra katu ojeguaru voi ichuguikuéra. Jesús oikuaa porã Samaritano ha judiokuéra noñe’ẽiha ojupe. Opáichavo ojerure chupekuéra opytanhaguã hógape.

Oñemboja ha oñe’ẽ umi ndaija’éiva hesekuéra rehe. Ohechauka ñandéve ikatuha jaiko oñondive, ñañe’ẽ ojupe, ñañomoguahẽ, jajoavýramo jepe ñande idéape, ñande rreligión, ñande partídope. Upéva nde’iséi katuete jaiko vai va’erãha. Ikatu jaiko py’aguapýpe, ñañomongeta, jahechakuaa ojupe, ha ñamba’apo oñondive, ndaha’éi ramo jepe ojueheguáva.

Umi samaritáno kuéra katu nomoguahẽséi Jesús ha iñirũnguérape. Omboty chuguikuéra okẽ. Ha ñahendúma mba’éichapa Santiago ha Juan ipochyeterei upévare ha he’i Jesús pe oityka haguã tata iñakã árikuéra. Jesús katu oja’o Santiago ha Juánpe ha ohónte upégui ambue hendápe, otopa peve ipy’a porãvéva ha omoguahẽva ichupekuéra.

Upéva ohechauka avei ñandéve ndaha’e mo’ãiha pochýpe, ñorairõme, térã ñe’ẽ vaípe, ñambohovái vaerãha umi oñembotývape.
Upéicha ningo oñembotyvéta ha imombyryvéta ñande hegui.

Mba’etekópa hína che irũ ha che reindy ñañandu ko Jesús ojapóva. Ñaimépa ñande avei ñañemoaiguĩ, ñañemongeta ha ñañomoirũ haguãicha ñande rapicha, kuña ha kuimba’éva, ambue tetã, térã religión, taha’e ambue partido guáva, taha’e ha’éva iñambuéva ñandehegui. Ikatúko oime ñaikotevẽ ñande avei Jesús ñanembo’e upéva, ombo’e haguéicha apóstolkuérape. Mba’épa reñandu.

Pa’i Jasy.