Ñahendu Jesús Ñe’ẽ. Viernes 27º Durante el Año

Escucha el evangelio y la reflexión en: https://youtu.be/jo_J5mRT_ho

Viernes 27º Durante el Año Lucas 11, 15 – 26

Jesús omosẽ rire peteĩ karia’ýgui peteĩ demóño oime he’íva: “Beelzebú, ku Aña ruvicha, ha’e niko pe ome’ẽva Jesúspe pu’aka omosẽ hag̃ua umi demóño.”

Oĩ ave ombopakova pireséva Jesúspe. Ojerure chupe hikuái ojapo hag̃ua peteĩ milágro ohechauka hag̃ua Ñandejára oĩha hendive. Jesús katu, oikuaágui mba’épa ombojere hikuái iñakãme, he’i chupekuéra: Peteĩ tetã oñemboja’opa ramo ha ihénte kuéra opu’ãmba ramo oñoakãre, oñehundi.

Péichante avei peteĩ ógape, opu’ãmbárõ hikuái ojuehe oñehundínte avei. Ha Satana voi opu’ãrõ ijehe, piko noñehundi mo’ãi nga’u. Peẽ niko peje amosẽha umi demóño Beelzebú rupi. Ha pejemi chéve máva rupi piko pende disípulo kuéra omosẽ umi demóño. Ha’ekuéra ohecha kuaáta hína peẽ pejavyha. Ha che amosẽ ramo umi demóño Ñandejára po rupi, upéva he’ise Ñandejára Rréino og̃uahẽmaha pende apytépe.

Peteĩ kuimba’e imbarete ha hi’árma porã ramo, hasýta jaike hógape ha ñamonda chugui. Ikatu ou chupe peteĩ imbaretevéva ha ipu’aka hese. Oipe’áne chugui hi’árma, oguerahapa oguerekóva ha omboja’o umi hendive oĩva ndive.

Pe che ndive oĩ’ỹva, oñemoĩ che rehe. Ha upe che ndive omono’õ’ỹva, omosarambi. Peteĩ demóño osẽvo oimeraẽvagui, oho oiko umi desiértore ohekávo pytu’u. Ág̃a ndojuhúi ramo he’i: “Aha jeýtante che róga tujápe, ha apyta upépe.” Ou jeývo, ojuhu ojeitypei hague ha ipotĩ porã.

Upéi katu, osẽ oheka 7 hapicha demóño, heko añavéva chugui. Ha ou oike hikuái ha oiko upépe. Ha péicha, pe ñande rapicha rekove ou ipahápe ivaieteve pe iñepyrũmbýgui.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

“Ñandejára jepe ningo nome’ẽi gústo opavavépe. Mba’e piko la ñande”. He’i lo mitã upérupi oiméramo ombovaíva tembiapo porã ojejapóva. Ñahendu Jesús omosẽ jave demóño ha omonguera jave hasývape, oĩha ombovaíva hembiapo, ha he’íva omosẽha añanguéra, Aña ruvicha pu’aka rupi. Aña ojokuáiramo guáicha Jesús pe.

Ha péva ja’e porãséramo ipohýi ha iñarõ. Ipohýi ningo Ñandejára rembiapópe ñahenói Aña rembiapo. Ha iñarõ ja’e Jesús pe ha’eha Aña rembiguái, ja’e hese ha’eha Aña ra’y. Jahecha mba’eichaite pevépa oime ipy’a ratãva, ojetyvyróva Jesús gui ha itie’ỹva hendive, ombohováiva Ñandejára ha oñemoĩva hese.

Jesús katu he’i oiméramo Aña añete ipu’aka ha ipo pohýi, ha’e imbareteve, ipu’aka ha ipo pohyive chugui. Ha ikatu oike pe Aña raitýpe, omosẽ, oñapytĩ ha ojoko Aña rembiapo vaikue. Mba’etekópa che reindy ha nde che irũ. Rejeroviápa Jesús ikatuha ipu’aka ha omosẽ nde rekovégui umi Aña nde reko asýva.

Pa’i Jasy.