SÁBADO TERCERO DE PASCUA
7 mayo, 2022LUNES CUARTO DE PASCUA
9 mayo, 2022LECTURA PETEÎHA:
Ko’ágã ñahendúta Tupã Ñandejára ñe’ẽ Apóstolkuéra arandukápe oĩ háicha 13,14.43-52
Pablo ha Bernabé ohasa hikuái Pérgegui, Antioquía Pisidia guápe. Upépe, pytu’uha árape oike hikuái umi judío kuéra tupaópe ha oguapy.
Opa rire upe ñembyaty, pe judíokuéra tupaópe, heta judío ha umi ojeroviáva Tupã rehe judíokuéraicha, oho Pablo ha Bernabé ndive. Ha ha’ekuéra oñemoñe’ẽ oñemohatã haguã upe jerovia Ñandejára mborayhu ohenoihápe ichupekuéra.
Upe pytu’u ára ambuépe haimete opa tavagua oñembyaty pa ohendu haguã Ñandejára ñe’ẽ. Umi Israelgua katu, ohechávo heta itereiha umi oñembyatýva, ojepicha iterei, ha oñepyrũ oñe’ẽ api Páblope ha oñe’ẽ reity ichupe. Upéma ramo Pablo ha Bernabé oñe’ẽ kyhyje’ỹ rehe ha he’i ichupekuéra: Ore romyerakuã va’erã kuri Ñandejára Ñe’ẽ peẽme raẽ, peẽgui Israelgua. Ko’ágã katu peẽ pemboyke ha nda
peikuaaséigui mba’eve upe jeikove opa’ỹvagui, rohóta Israelgua’ỹvape.
Upéicha niko he’i va’ekue oréva Ñandejára, he’í ramo guare: ‘Romoĩ tetãnguéra resapeha ramo, reraha haguã ñepysyrõ che aguerúva,yvy
opaha peve’.
Ohendúvo kóva, umi Israelgua’ỹva ovy’a ha oñepyrũ he’i Ñandejára ñe’ẽ iporãha, ha oguerovia umi ojeporavo va’ekuéva ohupitytaha jeikove opave’ỹva.
Upéicha oñemyasãi Ñandejára ñe’ẽ opa upe tetãpy rehe. Israelguáva katu oñe’ẽ kuñakarai iñembo’e rayhúva ndive, ha ombohuguy raku ichupe kuéra opu’ã haguã Saulo ha Bernabére, ha omosẽ upégui.
Upéma ramo ha’ekuéra oityvyro yvy tĩmbo ipýgui, techaukahárõ ichupekuéra, ha oho hikuái Icóniope. Umi oguerovia va’ekue katu henyhẽmba vy’águi ha Espíritu Sántogui.
Tupã Ñandejára Ñe’ẽ
Opavave: Romomba’e guasu ndéve, Ñandejára.
SALMO ÑEMBOHOVÁI 99, 1b-3. 5
Opavave: Ñande apohare ningo Tupã ha ñande ijovecha.
O bien:
Aleluia.
To guerohory ko yvy Ñandejárape.
Pejapo vy’a pópe ichupe hembipota,
peguahẽ hendápe sapukái rorýpe. O.
Peikuaa porãke: Ñandejára hína Tupã.
Ha’e ñande apohare ha ñande imba’e,
hetãgua ha ovecha iñu megua. O.
Ñandejára imba’e porã.
Imborayhu ndaijapýrai,
ha heko jeroviaha opa ára guarã. O.
LECTURA MOKÕIHA:
Ñahendúta Tupã Ñandejára Ñe’ẽ Apocalípsis arandukápe oĩ háicha 7, 9. 14b-17
Che Juan ama’ẽ ha ahecha hetaiterei opa tetã megua, opa yvypóraicha guáva, opáicha oñe’ẽva ha opa táva peguáva. Oñembo’y joa pe guapyha ha pe Ovecha ra’y renondépe, ha heta itereígui avave ndaikatúi oipapa. Oñemonde ao morotĩme ha oguereko ipópe pindo rogue.
Karai myakãhára peteĩva he’i chéve: “Ko’ãva hína umi heta ohasa asy va’ekue ha ojohéi va’ekue ijao pe Ovecha ra’y ruguýpe.
Upéva rehe oĩ Ñandejára guapyha renondépe, ha ára ha pyhare omba’apo itupaópe. Pe oĩva iguapyhápe oñangarekóne hesekuéra ha’ete voi. Ha’ekuéra ndo hasa mo’ã véima yuhéi ha ñembyahýi, ndohapymo’ãvéima kuarahy, ha ára haku mba’evéma ndojapo mo’ãvéi hesekuéra; pe Tupã Ovecha ra’y, oĩva guapyha mbytépe, oñangarekóta hesekuéra, ha ogueraháta ichupekuéra yvukuéra oikovéva gotyo, ha Ñandejára omokãta umi hesay”.
Tupã Ñandejára Ñe’ẽ.
Opavave: Romomba’e guasu ndéve, Ñandejára.
ALELUIA Jn 10, 14
Aleluia.
Che hína pe ovecha rerekua imba’e porãva,
che aikuaa háicha che ovechápe, ha’ekuéra che kuaa chéve.
Aleluia.
EVANGELIO
Marandu porã Ñandejára Jesucrísto rekove ha hemimbo’e San Juan omombe’u háicha 10, 27-30
Opavave: Romomba’e guasu ndéve, Ñandejára.
Upérõ Jesús he’i: Che ovecha kuéra niko oikuaa che ñe’ẽ ha ou che rapykuéri, ha che aikuaa ichupekuéra. Che ame’ẽ ichupekuéra tekove opa ára guarãva, ha araka’eve ha’ekuéra noñehundi mo’ãi, ha avave ndoipe’a mo’ãi che hegui.
Upe che Ru ome’ẽva chéve tuichave opa ite mba’égui, ha avave ndaikatu mo’ãi oipe’a ipógui. Che Ru ha che peteĩnte.
Ñandejára Jesucrísto Ñe’ẽ.
Opavave: Romomba’e guasu ndéve, Ñandejára Hesukrísto.