DOMINGO DÉCIMOTERCERO TIEMPO ORDINARIO

DOMINGO DÉCIMOTERCERO TIEMPO ORDINARIO

LECTURA PETEÎHA:
Motivación: Ñaipytyvõramo Tupã rembijokuái, ichupe voi ñaipytyvõ. Péicha jahecha Ñandejaŕa ohovasa umi omoguahẽ va’ekue hógape Proféta Elías pe.

Ko’ágã ñahendúta Tupã Ñandejára ñe’ẽ Reyes aranduka mokoĩhápe oĩ háicha 4, 8-11. 14-16a

Peteĩ jevy Eliseo ohasa Sunám rupi ha peteĩ kuña pepegua ojeapóva mba’e ramo he’i jevy-jevy ichupe oho haguã okaru hendive. Ha ohasa ramo upérupi Eliseo oho jepi hógape okaru.

Upéma ramo ha’e he’i iménape: Aikuaa ko kuimba’e oúva ñande rógape okaru haguã, peteĩ Tupã profeta marangatuha. Jajapóna ñande róga ári peteĩ koty ichupe guarã. Ñamoĩta ichupe hupa, imesa, apyka ha hesapeharã. Upéicha oguahẽ ramo ñande rógape ikatúta opyta upépe.

Peteĩ ára, oguahẽ ramo ikotýpe opyta haguã oke, Eliseo he’i hembiguái Gehasípe: Mba’éiko ikatu jajapo hese?

Ndaikuaái, – he’i Gehasi-. Naimembýi niko, ha iména itujáma.

Ehenói ichupe, – he’i Eliseo.

Pe tembiguái ohenói ichupe ha pe kuña opyta oñembo’y ikoty rokẽme. Upéma ramo Eliseo he’i ichupe: Pe áño oúvape guarã, ko’ã ára rupi rerekóta ne memby nde jyva ári.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 89, 2-3. 16-19
Opavave: Tupã, opa ára aropurahéita ne mborayhu tuichaiteha

Tupã, opa ára aropurahéita ne mborayhu tuichaiteha.
Opavavépe aikuaaukáta nde reko jeroviaha.
Aikuaaukáta ne mborayhu mba’e opa’ỹvaha,
Nde reko jeroviaha naiñambueivaha
naiñambueiháicha upe yvága. O.

Ovy’aite va’erãpa pe tetã torypápe ne momba’e kuaáva,
ha oguatáva nde resa renondépe,
nde rérape ovy’a opa ára,
ha nde reko joja omokyre’ỹ ichupekuéra. O.

Nde remombarete ha rembotuicha ichupe,
ha remombareteve katu nde py’a porãgui hendive.
Ore Jára, nde remoĩ oñangareko va’erã ore rehe,
remoĩ oréve ore ruvicharã nde ha’égui imarangatúva. O.

LECTURA MOKÕIHA:
Motivación: San Pablo ñanemomandu’a ñañemopeteĩ hague Cristo ndive, ñande karai rupi hérape. Ñañotỹ ñande pekádo ha jaikove jevy Ñandejárape guarã.

Ñahendúta Tupã Ñandejára Ñe’ẽ San Pablo ohai va’ekue Roma guápe 6, 3-4.8-11

Che pehenguekuéra: Ndapeikuaái piko peẽ, jajoajúvo Jesucrísto rehe ñemongarai rupi, jajoajuha imano rehe?

Ñemongaraípe niko Jesucrísto ndive ñañeñotỹ, ha ñamano ñañemoingove jevy haguã, ha jarohasa peteĩ jeikove ipyahúva, Jesucrístope omoingove jevy haguéicha Tupã ñande Ru pu’aka mimbipa.

Ñande ñamano ramo Jesucrísto ndive, jajerovia hendive avei jaikovetaha. Jaikuaa, oikove jevývo Jesucrísto nomano mo’ãveimaha. Pe mano ndaipu’aka mo’ãvéima hese.

Jesucrísto omanóvo, omano angaipápe guarã, ha oikovévo, oikove Tupãme guarã. Upéicha avei peẽ, pejerereko omanóva ramo angaipápe guarã, ha oikovéva ramo Tupãme guarã, Jesucrísto ndive pejoaju rupi.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA 1Ped 2, 9
Aleluia.
Peẽ niko ñemoñare ojeporavo pyre, mburuvicha guasúpe guarã pa’i rembiapo, peteĩ tetã imarangatúva, Tupã ojogua va’ekue imba’erã. Ha upéva péicha, pemombe’u haguã mba’e hechapyrãva Tupã rembiapokue, pene renói va’ekue pesẽ haguã pytũhagui ha peike imba’e rendy hechapyrãvape.

Aleluia.

EVANGELIO
Motivación: Ñamoĩ va’erã Ñandejárape opa mba’e ári, he’i Jesús. Ha jaguata haguã hendive jahupi va’erã ñande kurusu ñande apére ha jaha heseve.

Marandu porã Ñandejára Hesukrísto rehegua San Mateo omombe’u háicha 10,37-42
Opavave: Romomba’e guasu ndéve, Ñandejára.

Upérõ Jesús he’i idisípulokuérape: Pe itúva térã isýpe ohayhuvéva che hegui, ndikatu mo’ãi oiko che disípulo ramo. Pe ohayhuvéva ta’ýra térã tajýra che hegui, upéichante avei. Ha pe ohupi’ỹva ikurusu ijapére che moirũ haguã, péva ndaha’éi che rehegua. Pe hekovére hakate’ỹva, omanóta. Pe omanóva che rehehápe katu, ojesalváta.

Oĩ ramo pene moguãhẽ porãva, chéve che moguãhẽ ramo guáicha hína. Ha upe chéve che moguãhẽva, omoguãhẽ avei che mbouharépe.

Umi profétape omoguãhẽva katu, proféta haguérente pe oguãhẽva, umívape Ñandejára ome’ẽta pe ha’e ome’ẽva proféta kuérape. Oĩ ramo ymínte jepe ome’ẽva che disípulope, michĩvévape jepe, che ha’e peẽme, Ñandejára ndahesarái mo’ãiha chugui.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesucristo.