JUEVES XIII DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Génesis arandukápe oĩ háicha 22, 1-19

Abraham are oiko va’ekue Filistéokuéra yvýpe ha Tupã Ñandejára oikuaa porãseve mba’éicha guápa Abraham ha ohenói ichupe: Abraham, Abraham!

Ha’e he’i: Ápe aime!

Tupã Ñandejára he’i ichupe: Eraha nde ra’y peteĩmi rehayhu etéva Isaac peteĩ hendápe hérava Moria. Upépe, peteĩ yvyty ru’ãme che ahechaukátava ndéve, eikuave’ẽ chéve nde ra’y rejukávo ichupe ha rehapývo chéve guarã altar ári.

Abraham opu’ã ko’ẽ mboyve, ombyape hymba vúrro, ombo’i jepe’a, ogueraha mokõi hembiguái ha ita’ýra Isaac, ha oho Tupã Ñandejára he’i hague gotyo ichupe. Mbohapy ára haguépe Abraham ohecha mombyry guive upe yvyty.

Upérõ he’i hembiguái kuérape: Pepyta ko’ápe peñangareko che rymba vúrrore, che ha che ra’y rojupi aja hu’ãme romomba’e guasu haguã Tupã Ñandejárape. Upéi roju jevýta pene rendápe.
Abraham ohupi jepe’a ita’ýra ati’ýre, ogueraha ipópe tata ha kyse ha ojupi hikuái oñondive. Isaac he’i itúvape: Taita.

Ha’e he’i: Mba’épa che ra’y?

Isaac he’i: Jaraha niko tata ha jepe’a, ha mamópa oĩ upe ovecha ra’y mymbahapyrã?
Abraham he’i ichupe: Tupä Ñandejára voi ome’ẽta ñandéve che ra’y. Ha oho tenondeve hikuái oñondive.

Oguahẽvo he’i haguépe ichupe Tupã Ñandejára, Abraham omopu’ã peteẽ altar ha omoĩ jepe’a hi’ári. Oipokua ita’ýra ha omoĩ ichupe altárpe jepe’a ári. Upéi oipyso ipo ojuka haguã ichupe ikysépe.

Tupã Ñandejára remimbou katu ohenói ichupe yvága guive ha he’i: Abraham, Abraham! Ha’e he’i: Ápe aime!

Tupä Ñandejára remimbou he’i ichupe: Ani reikutu nde ra’ýpe térã rejapo hese mba’eve. Aikuaáma rehayhuha Tupãme ha rejeroviaha hese. Nde ra’y peteĩmíre jepe na ne rakate’ỹi.

Abraham ohecha ovecha mácho hatígui opa’ãva javoráire. Oho ipiári ha ogueru oikuave’ẽ Tupã Ñandejárape mymbahapy ramo ita’ýra rekovia. Abraham ombohéra upe tenda: “Tupã Ñandejára ome’ẽ oñekotevẽva.” Upévare Ko’ágä peve oje’e: “Yvyty ru’ãme Tupä Ñandejára ome’ẽ oñekotevẽva.”

Tupã Ñandejára remimbou ohenói jevy Abrahámpe yvágagui, ha he’i ichupe: Che jehe voi añe’ẽ me’ẽ, he’i Tupã Ñandejára: Rejapo haguére ha’e va’ekue ndéve, ha na ne rakate’ỹigui reme’ẽ haguã chéve nde ra’y, amboheta etereíta ndéve ne ñemoñare, mbyjakuéra yvága pegua ha yvyku’i ra’ỹi yguasu rembe’ýpe guáicha.

Ne ñemoñare kuéra ipu’akáta umi hesekuéra ija’e’ỹvare. Ha opa tetã ko yvy arigua ojehovasáta ne ñemoñare rupi, rejapo haguére ha’éva ndéve.

Abraham ou jevy hembiguáikuéra rendápe. Upégui oho hikuái oñondive ha opyta Beersébape.

Tupã Ñandejára Ñe’ẽ.

SALMO ÑEMBOHOVÁI 114, 1-6. 8-9

Opavave: Pejerovia Tupä Ñandejára rehe, Ha’e pene pytyvõta

Ore Jára, ani ore momba’e, ne añónte reñe momba’e va’erã,
ne mborayhu ha nde reko jeroviaha rupi.
Ore Tupã oĩ yvága ha yvýpe,
ha’e ojapo ojaposéva. O.

Umi ta’ãnga katu pláta ha óro,
yvypóra rembiapokue, umíva ijuru ha noñe’ẽi,
hesa ha ndohechái, ijapysa ha nohendúi, itĩ ha nohetũi.
Upéichata avei umi ijapohare, umíva rehe omoĩva ijerovia. O.

Peẽ Israelgua! Pejerovia Ñandejára rehe,
Tupã Ñandejára imba’e porã,
che ajejuhu vai jave che pytyvõ.
Ha’e oipytyvõta ha oñangarekóta umi ykangyvéva rehe.O.

Pejerovia Ñandejára rehe. Ha’e pene pytyvõta
ha oñangarekóta pende rehe.
Peẽ Ñandejárape pemomba’éva!
Pejerovia hese. O.

LECTURA PETEÎHA:

Ko’ágã ñahendúta Tupã Ñandejára ñe’ẽ Amós arandukápe oĩ háicha 7, 10-17

Amasías, Betel pegua pa’i, he’iuka Israel ruvicha guasu Jeroboámpe: “Amós oñe’ẽ vai nde rehe Israelgua apytépe. Tekotevẽma ojejoko, he’i niko hikóni: ‘Jeroboam ojejukáta kyse pukúpe ha Israelgua ojereraháta tetã mombyrýpe.’”

Upéi Amasías he’i Amóspe: Tereho ko’águi, mba’e rechahára. Tereho Judápe ha eñe’ẽ upépe, rehupityse ramo ne rembi’urã. Betélpe katu anive reñe’ẽ cháke kóva hína mburuvicha guasu tupao, ha avei ko tetã megua tupao guasu.

Amós he’i ichupe: Che ndaha’éi voi maranduhára, térã hesegua kuéra. Che ajeheka añangarekóvo ovecha rehe ha ígo ñembyatýpe.

Tupã Ñandejára katu che pe’a che ovechakuéragui ha he’i chéve: “Tereho eñe’ẽ che rérape Israel guápe.” Ehendúke aipóramo Tupã Ñandejára Ñe’ẽ: “Nde ere: anive reñe’ẽ Tupã rérape Israélpe ha ani ere mba’eve Isaac ñemoñarére.”

Tupã Ñandejára katu he’i upéicha: “Ne rembirekógui oikóta kuña vai opavave renondépe, nde ra’y ha nde rajykuéra ojejukáta kyse pukúpe, nde yvykuéra oñemboja’óta ojeitývo hesekuéra po’a, nde voi remanóta tetã mombyrýpe ha Israelgua ojereraháta mombyry hetãgui.”

Tupã Ñandejára Ñe’ẽ.

SALMO ÑEMBOHOVÁI 18, 8-11

Opavave: Tupã Ñandejára rembiapoukapy oĩ hekoitépe

Tupã Ñandejára rembiapoukapy ndaijojahái,
ñane mbopy’a rory;
Tupã Ñandejára rembiapoukapy ijeroviaha,
omoarandu oikuaa’ỹvape. O.

Tupã Ñandejára rembiapoukapy oĩ heko itépe,
ñane korasõ ombovy’a;
Tupã rembiapoukapy hesakã,
ñande resape’a jahecha haguã. O.

Tupã Ñandejára Ñe’ẽ naimeguãi
araka’eve ndahekoviái.
Tupã Ñandejára rembiapoukapy ijeroviaha,
opavave oĩ heko itépe. O.

Iporã iteve óro ojajaipávagui,
umi óro ijoheipyrégui,
he’ëve opavave eiretégui
osyrýva káva raitýgui. O.

ALELUIA 2Cor 5, 19

Aleluia.
Tupã Ñandejára oĩ Jesucrístope, omoigo porã jevývo yvypóra hendive, ome’ẽvo ñandéve ñe’ẽ oporomoingo porãhava.
Aleluia.

EVANGELIO

Ñahendúta Ñandejára Jesucristo rekove ha hemimbo’e San Mateo omombe’u háicha 9, 1-8

Upe ramo Jesús ojupi peteĩ kanóape ha ohasa pe yguasu mboypýri ha oguahẽ pe táva ha’e oiko haguépe. Upépe, ojegueru ichupe tupápe peteĩ ijapáva. Ha ohechávo Jesús mba’éichapa ha’ekuéra ojerovia hese, he’i pe hasývape: Néike che ra’y. Ne angaipa ojeheja reíma ndéve.

Upépe, umi Moisés rembiapoukapy mbo’eha he’i ipy’apýpe: “He’i’ỹ va’erã niko he’i. Ojahéi niko Tupã Ñandejárare ku hendaguépe oĩrõ guáicha.” Ha Jesús ohecha kuaágui mba’épa he’i hína hikuái, he’i ichupekuéra: Mba’ére piko ivaíva pembojere peína pene akãme?

Mba’épa ndahasyive ja’e ko kuimba’épe: “Ojeheja reíma ndéve ne angaipa”, térãpa “Epu’ã ha eguata”? Néi, ahechaukáta peẽme ko’ágä che, yvypóraicha aju va’ekue, ikatuha aheja reívo iñangaipa oimeraẽvape ko yvy ári.

Ha upévo he’i pe ijapávape: Epu’ã. Ehupi nde rupa ha tereho nde rógape. Upépe pe ijapáva opu’ã, ha oho hógape. Ohechávo upéva, oñemondyipa opavave ha omomba’e guasu Tupã Ñandejárape ha’e ome’ẽ haguére yvypórape péichagua pu’aka.

Ñandejára Jesucristo Ñe’ẽ