DOMINGO XV DEL TIEMPO ORDINARIO

DOMINGO DECIMOQUINTO TIEMPO ORDINARIO

LECTURA PETEÎHA:

Motivación: Pe Ñandejára Ñe’ẽ katuete opoko ñande rehe, he’i Profeta Isaías.
Ndohasa reíri ñande apysápe. Omba’apo ijehegui ñane korasõme ha itiémpope oúne hi’a porã.

Ko’ágã ñahendúta Tupã Ñandejára ñe’ẽ Isaías arandukape oĩ háicha 55, 10-11

Péicha oñe’ẽ Ñandejára: Ama ha y rypy’a ho’aháicha yvágagui ha ndojevýi, omohe’õ mboyve yvy, heñói haguã mba’e ra’ỹi oñemitỹvape ha oĩ haguã tembi’u okarúvape guarã. Péichata pe ñe’ẽ osẽva che jurúgui, ndojevy mo’ãi che rendápe, ojapo’ỹ rehe che rembipota, ha oikopa pe che ha’e va’ekue.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 65, 10-14
Opavave: Reñemity yvy porãme ha hi’a heta.

Yvy rehe reñangareko ha remomorã
remyakỹ ha remyenyhẽ ñemitỹgui.
Ysyrykuéra remyenyhẽmba,
ha péicha rembosako’i yvy ñemitỹrã. O.

Rembohykue yvy ojeka’apíma va’ekue,
ha rembojoja, remohu’ũ amarayvípe,
ha rehovasa heñóiva. O.

Tembiapokue hu’ãvo
heta mba’e porã regueru,
mamo rehasaha rupi
opa mba’e hembypa. O.

Yvy iperõ va’ekue hovyũmba,
Yvyty rehe yvyrakuéra ipotypa,
ñu rehe mymbakuéra isarambi,
umi kokue rehe kóga mante ojekuaa.
Maymáva opurahéi, ha vy’águi osapukái. O.

LECTURA MOKÕIHA:
Motivación: Pe kuña imembýtaicha, he’i San Pablo, ñande jahasakuaa va’erã avei jejopy ha ñembyasy apytépe onase haguã ñande rekovépe pe tekove pyahu oúva Ñandejáragui.

Ñahendúta Tupã Ñandejára Ñe’ẽ San Pablo ohai va’ekue Roma guápe 8, 18-23

Che pehenguekuéra:

Che ha’e ko’ã jehasa asy ko’agãgua nda ha’eiha mba’eve ñambojoja ramo pe vy’a mimbipa rehe, jahasátava upe rire. Opa mba’e ijapo pyre oha’arõ py’a tarovápe ojekuaa porã ñande Tupã ra’yha.

Opa mba’e ijapo pyre niko osẽ hapégui ha oñembyaipa, ndaha’éi ijehegui rei oipotágui, Tupã upéicha oipotáguinte.
Ha upéicha ramo jepe, opa ára oha’arõva, osẽ tembiguái reko ha ñehundígui, ohupity haguã pe vy’a mimbipa pegua teko sã’ỹ oguerekóva Tupã ra’ykuéra.

Jaikuaa niko ko’ágã peve opa mba’e ijapo pyre ohasa asyha peteĩ kuña imemby pota vaicha. Ha ndaha’éi ha’énte ohasa asýva, ñande avei jahasa asy, ñande jarekómava pe Espíritu, oñeme’ẽ tenonde va’ekue ñandéve. Jahasa asyeterei ñaha’arõvo pe ára jajerereko haguã Tupã ra’y ramo, ha ñande rete osẽ jejopýgui.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA
Aleluia.
Pe semilla oñeñotýva niko ha’e Ñandejára Ñe’ẽ
Pe oñemitỹva ha’e Cristo.
Aleluia.

EVANGELIO
Motivación: Opa ára niko Ñandejára oñemitỹ oikóvo ñande rekovépe. Sapy’ánte ñande py’a ratã ha ndoikéi ñande pype, sapy’ánte katu ñamoguahẽ, oguapy ñane korasõme ha hi’a porã.

Marandu porã Ñandejára Hesukrísto rehegua San Mateo omombe’u háicha 13,1-23
Opavave: Romomba’e guasu ndéve, Ñandejára.

Jesús osẽ hógagui ha oho Lágo Galiléa rembe’ýpe. Upépe oguapy oñe’ẽ hag̃ua. Ha heta oĩ ijatýva ijerére. Upémarõ ojupi oguapy peteĩ kanóape, umi ou va’ekue hendápe katu opyta oñembo’y upe y rembe’ýpe. Heta mba’ére Jesús oñe’ẽ chupekuéra. Ha omombe’u chupekuéra káso omyesakã hag̃ua pe he’íva.

He’i chupekuéra: Oiko va’ekue ndaje raka’e peteĩ osẽva oñemitỹ. Ha omosarambívo upe semílla, oĩ ho’áva tapépe ha ou guyrakuéra ho’upa. Oĩ avei ho’áva itatýpe, yvy ipererĩháme ha voi heñói. Kuarahy ojopévo katu hakã manomba, ha ndahapo pypukúigui ipirupa.
Oĩ avei ho’áva ñuatĩndýpe. Ñana okakuaávo katu, ojaho’ipa ha ojuka.

Oĩ katu ho’áva yvy iporãháme, ha upépe hi’a heta. Oĩ hi’áva 100, oĩ hi’áva 60 ha oĩ hi’áva 30.

Upéi Jesús he’i chupekuéra: “Ohendu kuaáva tojapysaka porã.”

[Jesús discípulokuéra oñemboja hendápe, ha oporandu chupe: — Mba’ére piko káso rupi meménte reporombo’e.

Jesús he’i chupekuéra: — Tupã niko peẽmente oikuaauka umi mba’e ñemimby Ñandejára Rréino yvága rehe guáre. Chupekuéra katu niko nahániri.

Upe heta oguerekóvape, oñeme’ẽvéta ha hembypáta chupe. Upe oguereko’ỹvagui katu, pe michĩmi oguerekóva jepe, ojepe’áta chugui. Ko’ãva niko oma’ẽramo jepe ndohechái, ha ohendúramo jepe ndoikéi chupekuéra iñakãme.

Upévare amombe’u chupekuéra ko’ã káso. Ha péicha ou ojehu chupekuéra ku proféta Isaías he’i va’ekue: Ko’ãva ohenduvérõ jepe ndoikuaamo’ãi. Omañavérõ jepe ndohechamo’ãi. Ko’ãva akãme ndoikevéima mba’eve, ijapysa ha hesa omboty. Péicha ojapo’ỹ rire hikuái ikatu va’erã mo’ã ohecha ha ohendu, térã ojehecha kuaa ha ojere ou che rendápe ha aipohano chupekuéra.

Peẽme katu niko Tupã pende rovasa. Peẽ niko pende resa tee rupi che recha, ha pende apysa tee rupi che rendu. Añete ha’e peẽme, heta proféta ha heta imarangatúva ohechase ha ohenduse va’ekue ko peẽ pehecháva hína ko’ág̃a.

Chupekuéra katu nda’ijái va’ekue ohecha térã ohendu. Amombe’úta peẽme mba’épa he’ise pe chokokue káso. Oĩ niko umi ohendúva pe
evangélio Ñandejára Réino rehegua. Ha ndoikuaáigui mba’épa he’ise, ou Aña ha ogueraha pe ñe’ẽ, ipy’apýpe oñeñotỹ va’ekue. Umíva ojogua umi semíllape ho’a va’ekue tapépe.

Umi ho’a va’ekue itatýpe katu, ojogua umi Ñandejára Ñe’ẽ ohendu ha ogueroviáva vy’apópe. Ha ndahapo pypukúigui ipypekuéra, ivy’a pya’e opa. Ohasa asýrõ térã ojejopy vaírõ ojerovia haguére Ñandejárare, pya’ete hesarái pe ohendu va’ekuégui.

Upéi oĩ umi semílla ho’áva ñuatĩndýpe. Umíva hína umi ohendúva pe ñe’ẽ, ha ojepy’apýgui umi mba’e yvy arigua rehénte ha imba’eta rerekoségui, ko’ã mba’e ojaho’i ha ojuka pe ñe’ẽ, ha ndahi’ái.

Umi oñeñotỹva yvy porãme katu ojogua umi ohendúva pe ñe’ẽ, ha oikuaa porãva mba’épa he’ise. Upéi hi’a porã, ha oĩ hi’áva 100, oĩ katu hi’áva 60, ha oĩ hi’áva 30.]

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesucristo.