DOMINGO SEGUNDO DE ADVIENTO

DOMINGO SEGUNDO DE ADVIENTO

LECTURA PETEÏHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha             40, 1-5. 9-11

Tupã Ñandejára he’i:

“Pembovy’a, pembovy’a che retã guápe.

Peñe’ẽ pende py’a ite  guive Jerusalénpe ha peje ichupe opamaha tembiguái reko,

omyengoviapamaha hembiapo vaikue rehe, ohupitýma hague Tupã Ñandejáragui

ñenupã jo’a opa iñangaipa rehe”.

Oĩ peteï osapukáiva:

“Pembosako’i Tupã Ñandejárape háperã yvy ojeiko’ỹháme, pejapo yvy perõme tape po’i

ñane Tupä Ñandejárape guarã.

Pemyenyhẽ umi ipyko’ẽha, pemboguejy yvyty ha yvy pu’ã.

Pejapo yvyty pa’ũgui ñu ojojapa itéva.

Upéma ramo Tupä  Ñandejára ohechaukáta heko mimbipa ha upéva ohechata opa yvypóra oñondive.

Tupä Ñandejára voi upéicha he’i”. Ejupi yvyty yvatépe, nde, rerahava Siónpe marandu porã.

Hatã esapukái, nde, rerahava marandu porã Jerusalénpe.

Esapukái kyhyje’ỹ rehe, ere Judá pegua táva kuérape:

“Péina upépe ne Tupä!”

Oguahẽma Ñandejára ipokatu reheve ha pyapy mbaretépe opa mba’e ipo guýpe omoĩ.

Ogueru hendive hetãgua oguenohẽ va’ekue jejopy vaígui.

Ovecha rerekuáicha ogueraha ijovechakuéra omongarúvo, ohupi umi ovecha ra’y,

ogueraha ijyva ári ha oñangareko ovecha imemby ramovare.

Tupä Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI      84, 9-14

Opavave: Tupä echauka oréve nde poriahuvereko

Ajapysakáta Tupã he’íva rehe.

Ha’e he’i ome’ẽtaha py’a guapy hetãme ha umi hese ojeroviávape

Hi’aguĩ ára ha’e oguenohẽ haguã jejopy vaígui hayhupárape.

Tupä, nde reko mimbipa ojekuaáne ore yvýpe. O.

Mborayhu ha añete oñuguãitĩne, py’a guapy ha teko joja oñoañuáne.

Añete heñóine upe yvýgui, ha teko joja yvágagui oma’ẽne. O.

Ñandejára, ha’ete voi ome’ẽta ñandéve iporãva,

ha ñande yvy ome’ẽta hi’a. Teko joja ohóne henonderã,

ombosako’ívo ichupe háperã. O.

LECTURA MOKÖIHA:       

Ñahendúta Tupã Ñandejára Ñe’ẽ San Pedro ohai va’ekue ikuatia peteĩhápe Corinto guápe     3, 8-14

Che pehẽnguekuéra, aníke pende resarái peteï mba’égui. Jesucrístope guarã niko peteĩ ára 1.000 áñoicha, ha 1.000 áño katu peteï áraichante. Nda ha’éi  niko ku Jesucrísto  hi’arétava ojapo haguã pe he’i va’ekue, oimeháicha upéicha he’íva. Nahániri. Pene ra’arõnte hína peẽme, oipotágui opavave ojere Tupã Ñandejára gotyo ani haguã avave omano.

Jesucrísto  ou jevyha ára niko oguahẽta ku monda háicha, avave oimo’ã’ỹhágui. Upévo,  sununu guasúpe yvága oñehundíta ha opa mba’e yvágape oĩva tatápe okaipáta. Yvy ha opa mba’e ipype oĩva ikusuguéta.

Péicha oñehundipátagui opa mba’e, peë peñeha’ã va’erã pende rekove peme’ẽmbaite Tupäme. Peipota kena toguahẽ pe ára Tupä Ñandejára oporo mbojovaketaha, ha peñeha’ã toguahẽ pya’e. Upéva upe árape, yvága oñehundíta tatápe, ha opa mba’e yvága pegua hykúne tata rendýpe. Ñande katu ñaha’arõ peteï yvága ha yvy ipyahúva, Tupä Ñandejára he’i va’ekue ome’ẽtaha. Ha upépe opa ite mba’e oikóta Tupä Ñandejára oipota háicha.

Upéva rehe che pehẽngue kuéra ahayhuetéva, peñeha’ãmba itéke ani Tupä Ñandejára pende juhu mba’eve ivaívape. Ta pende juhu uvei peimeha hendive py’a guapýpe, ko’ã mba’e peha’arõ aja.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA     Lc. 3, 4-6

Aleluia.

Pembosako’i Ñandejárape háperã pejapo ichupe tape ikarẽ’ỹva

Opavave ohechane Tupä oporopysyrõha

Aleluia.

EVANGELIO

Marandu porã Ñandejára Hesukrísto rehegua San Marcos omombe’u háicha 1, 1-8

Opavave: Romomba’e guasu ndéve, Ñandejára.                 

Kóva ha’e hína ñe’ẽ porã ñepyrũha, Jesús, Tupã Ra’y rehegua. Péicha oime profeta Isaías kuatiápe: “Amondo che ñe’ẽ rerahaha ne renonderã, ombosako’i haguã ndéve nde raperã.  Oime peteĩ osapukáiva desiértope: ‘Pembosako’i Ñandejárape haperã, pejapo chupe tape ikarẽ’ỹva.’”

 Ha péicha Juan Bautista oho opredika upe desiértope. He’i opavavépe oñemboja va’erãha Tupãre ha oñemongaraika vaerã Tupã oheja rei haguã chupe kuéra hembiapo vaikue.  Opa Judea ha Jerusalengua osẽ ohendúvo chupe, oñemombe’u hembiapo vaikuégui ha Juan omongarai chupe kuéra rrío Jordánpe.

Juan ao ojejapo kaméllo raguekuégui ha iku’a jokuaha katu vakapi. Ha ho’úmi va’ekue tuku ha eíra ka’aguy.  Ha’e opredika péicha: “Che rire oúta peteĩ imbaretevéva che hegui, ndaijáiva chéve ajayvy henondépe ajora isapatu sã.  Che pomongarai va’ekue ýpe. Ha’e katu pene mongaraíta Espíritu Sántope.”

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.