LECTURAS DEL LUNES SEGUNDO DE ADVIENTO

LECTURAS DEL LUNES SEGUNDO DE ADVIENTO

Ko’ágã ñahendúta Tupã Ñandejára ñe’ẽ Isaías arandukápe oĩ háicha   35, 1-10

Ta hory yvy ojeiko’ỹha ha yvy iñapekãmbáva, tovy’a ha ta ipoty yvy perõ!

Ta henyhẽ yvotýgui, ta hory, to sapukái vy’águi!

Ichupe oñeme’ẽ Líbano reko mimbi, Carmelo ha Sarón reko jegua. Maymáva ohecháta Ñandejára imimbipápe, Tupã Ñandejárape ohecháta ijajaipápe.

Pemombarete ikangývape, pemokyre’ỹ ikane’õvape.

Peje ojepy’apývape: “Néike, ani pekyhyje!

Ápe oĩ Tupã pende Jára, ou omyengoviávo pende rehe ija’e’ỹvape ou pende pe’ávo jejopy vaígui.”

Upérõ umi ohecha’ỹva ohecháta, ha umi ohendu’ỹva ohendúta. Upérõ ijapáva, guasúicha oñaníta ha iñe’ẽngúva vy’águi osapukáita, hetátagui pe y yvy ojeiko’ỹháme ha y osyry hatãva yvy perõme.

Yvy ndahi’ýivagui ojapóta y renda ha yvy ijyuhéivape ombohetáta yvu.

Aguara’i rekohágui, oikóta takuaraty ha pirity.

Upépe oĩta peteĩ tape oñembohératava “Tape marangatu”.

Upe rupi ndoguata mo’ãi heko ky’áva ha itavýva ndoiko mo’ãi. Ndaipóri mo’ãi upépe jaguarete, ha ndoike mo’ãi tymba saite.

Upe rupi oguatáta umi oguenohẽ va’ekue jejopy vaígui Tupã Ñandejára, ha oikéta Siónpe purahéi ha vy’a pópe.

Vy’a ha tory omoirũta ichupekuéra, ha mombyry opytáta pyahẽ ha vy’a’ỹ.

Tupã Ñandejára Ñe’ẽ.

SALMO ÑEMBOHOVÁI 84, 9ab. 10-14

Opavave: Tupã Ñandejára he’i ome’ẽtaha py’aguapy

Amomarandúta Tupã Ñandejára he’íva:.

Ha’e he’i ome’ẽtaha py’aguapy iñirü ha hese ojeroviávape

Hi’aguĩ ára oipysyrö haguã umi ichupe omomba’évape.

Tupã Ñandejára, nde reko mimbipa ojekuaáne ore yvýpe. O.

Mborayhu ha añete oñuguãitĩne,

py’aguapy ha teko joja oñoañuãne.

Añete heñóine upe yvýgui,

ha teko joja yvágagui oma’ẽne. O.

Tupã Ñandejára, ha’ete voi ome’ẽta ñandéve iporãva,

ha ko ñande yvy ome’ẽta hi’a.

Teko joja ohóne henonderã,

ombosako’ívo ichupe haperã. O.

ALELUIA

Aleluia.

Oúta Mburuvicha guasu, yvy ha yvága Jára,

ha ñande pe’áta jejopy vaígui.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha     5, 17-26

Peteĩ árape, Jesús oporombo’e jave hína, oguapy ra’e hína upe rupi Fariséova, ha Moisés rembiapoukapy ombo’éva ou va’ekue Galilea, Judá ha Jerusaléngui. Ha Tupã Ñandejára pokatu ojechauka Jesús rupi omonguerávo heta hasývape.

Upérõ oguahẽ kuimba’e kuéra ogueraháva hupápe peteĩ ijapávape. Oguerahase hikuái pe kotypýpe omoĩ haguã Jesús renondépe. Ha ndojuhúi hikuái moõ rupípa omoingéta, hetágui umi upépe oĩva. Aipórõ ojupi hikuái pe óga ári, ombokua pe óga ape ha omboguejy hikuái pe hasývape, hupápe, Jesús renondépe. Jesús ohechávo mba’éicha itépa ha’e kuéra ojerovia hese, he’i pe hasývape: Che irũ, ojeheja reíma ndéve ne angaipa.

Ha upévo, umi Moisés rembiapoukapy mbo’eha ha umi fariséo oñepyrũ he’i: “Máva piko kóva péicha ojahéi haguã Tupã Ñandejárare, ku hendaguépe oĩrõ guáicha? Tupã Ñandejára añónte niko ikatu oheja rei ñandéve ñane angaipa.” Ha Jesús ohecha kuaa mba’épa he’i hína hikuái ipy’apýpe, ha oporandu ichupekuéra: Mba’érepa pejepy’a mongeta péicha?

Mba’épa ndahasyive ja’e: “Ojeheja reíma ndéve ne angaipa”, térãpa: “Epu’ã ha eguata”? Néi, ahechaukáta peẽme che, yvypóraicha aju va’ekue, ikatuha ko yvy ári aipysyrõ angaipa. Ha upévo he’i pe ijapávape: Ndéve ha’e: ‘Epu’ã, ehupi nde rupa ha tereho nde rógape.’

Upepete pe ijapáva opu’ã opavave renondépe, ohupi hupa oñeno hague, ha oguerohory Tupã Ñandejárape ohóvo hógape. Maymáva opyta ijurujái, ha oguerohory hikuái Tupã Ñandejárape. Ha tuicha kyhyje reheve he’i joa: Ko árape jahecha mba’e hechapyrãva.

Ñandejára Jesucristo Ñe’ẽ.