LECTURAS SANTOKUÉRA ÁRA

LECTURA PETEÎHA:

Ko’ágã ñahendúta Tupã Ñandejára ñe’ẽ Apocalipsis arandukápe oĩ háicha (7,2-4.9-14)

Che Juan, ahecha peteĩ Ánhel oúva kuarahy resẽ guio, ha oguerekóva Tupã oikovéva séllo. Hatã osapukái umi 4 Tupã remimboúpe, oñeme’ẽ hague pu’aka ojapo haguã ivaíva yvy ha mar rehe: “Ani pejapo ivaíva yvy, mar ha umi yvyráre, ndasellái aja ñane Tupã rembiguái kuéra syva.” Ha ahendu mbovýpa umi ojeselláva: 144.000 umi Israelgua ñemoñare aty apytégui.

Kóva rire ama’ẽ ha ahecha hetaiterei opa tetã megua, opa yvypóraicha guáva, opáicha oñe’ẽva ha opa táva peguáva. Oñembo’y joa pe guapyha ha pe Ovecha ra’y renondépe, ha hetaitereígui avave ndaikatúi oipapa. Oñemonde ao morotĩme ha oguereko ipópe pindo rogue. Maymáva osapukái hatã joa: “Jajesalva Ñandejára oĩva iguapyhápe ha pe Ovecha ra’y rehe ae!”

Ha umi Ánhelkuéra oĩmba joa ñembo’yhápe, ha karai myakãhárakuéra ha umi 4 oikovéva pe guapyha jerére; ha ojayvy hikuái pe guapyha renondépe omboja peve isyva yvýre, ha omomba’e guasu hikuái Tupãme, he’ívo:

“Amén! Jererohory, teko mimbipa, arandu ha jehecha kuaa, terakuã porã, pu’aka ha mbarete toñeme’ẽ Ñandejárape opa ára. Amén!”

Upérõ, pe karai myakãhára peteĩva oporandu chéve: “Máva piko ko’ã oñemondéva ao morotĩme, ha moõgui piko ou hikuái?” Ha che ha’e chupe “Nde reikuaa, karai”. Ha’e he’i chéve: “Ko’ãva hína umi heta ohasa asy va’ekue, ha ojohéi vaekue ijao pe Ovecha ra’y ruguýpe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 23, 1-6
Opavave: Ko’ãva hína umi Tupãre ojeroviáva.

Ko yvy niko Ñandejára mba’e, opa mba’e ipype oĩva, ha opavave ipype oikóva.
Ha’e upe yvy omopyenda va’ekue, yguasu ha ysyry ári omboguapy. O.

Mávapa ojupíne Tupã sérro ru’ãme.
Mávapa opytáne itupao marangatúpe.
Umi ipo ha ipy’a potĩva, ha ojeíva opa mba’e vaígui. O.

Umívape ohovasa Ñandejára, ha oguenohẽ chupekuéra jejopy vaígui.
Ko´ãva hína umi Tupãre ojeroviáva, umi Ñandejára rendápe oguahẽva. O.

LECTURA MOKÔIHA Apóstol San Juan Kuatia Ñe’ê 3,1-3

Pema’ẽmi mba’éichapa ñande rayhu Tupã pe Túva, ikatu haguã ñañembohéra Tupã ra’y, ha ñande ha’e. Upévare yvypóra reko rayhuha na ñande kuaái, ndoikuaái haguére Tupãme.

Che pehẽnguekuéra pohayhúva, ñande ha’éma Tupã ra’y, ha jepe ndojekuaáirõ gueteri mba’eichaguátapa ñande, jaikuaa, Jesucristo ojechaukávo, ha’eichaguataha ñande jahechátagui chupe ha’ehaichaite. Ha opa ojeroviáva hese oñemopotĩ, Jesucristo ipotĩháicha.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

EVANGELIO

Mateo 4, 25 – 5, 12

Upérõ katu hetáma sapy’a ohóvo umi oikóva Jesús rapykuéri oúva Galiléagui, Decápolis, Jerusalén, Judea ha Jordán mboypýri guive.

Jesús ohechávo hetaha umi ijatýva, ojupi peteĩ sérro akãme ha oguapy oñe’ẽ hag̃ua. Idisípulokuéra oñembyaty ijerére, ha Jesús oñepyrũ ombo’e chupekuéra.

“Ovy’a va’erã umi ohecha kuaáva imboriahuha, chupekuéra g̃uarã niko hína Ñandejára Rréino.

Ovy’a va’erã umi ohasa asýva, Ñandejára voi omyangapyhýta chupekuéra.

Ovy’a va’erã umi heko mirĩva, Ñandejára ome’ẽta chupekuéra yvy imba’e teerã.

Ovy’a va’erã umi Ñandejára rembipotánte ojaposéva, ha’e voi ome’ẽta chupekuéra opa oikotevẽva.

Ovy’a va’erã umi oiporiahuverekóva hapichápe, Ñandejára oiporiahuverekóta chupekuéra.

Ovy’a va’erã umi ipy’a potĩva, ha’e kuéra ohechátagui Ñandejárape.

Ovy’a va’erã umi oñeha’ãva oporomoingo py’aguapýpe, Ñandejára oguerekóta chupekuéra ita’ýra ha itajýra ramo.

Ovy’a vaerã umi ohasa asýva Ñandejára rembipota ojapógui, chupekuéra g̃uarã niko hína Ñandejára Rréino yvagapegua.

Pevy’a va’erã pejeja’o ha peñemuña ramo, ha oje’e ramo pende rehe opa mba’e vai, che ndive peiko haguére. Pevy’áke ha tapende py’a rory, tuicha mba’e niko oñeme’ẽta peẽme yvágape. Peẽicha avei, profétakuéra ohasa asy va’ekue yma.”

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.