DOMINGO TRIGÉSIMO PRIMERO DURANTE EL AÑO

DOMINGO TRIGÉSIMO PRIMERO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Deuteronomio arandukápe oĩ háicha 6, 1-6

Ko’ãva hína umi tembiapoukapy Ñandejára he’i hague chéve poheko mbo’e haguã. Pejapóke opa mba’e he’íva, peiko ramo pe yvýpe peiketahápe ko’ágã peñe momba’e haguã hese.

Peikove aja pukukue peẽ ha pene ñemoñarekuéra pemomba’e guasu va’erã Ñandejárape ha pejapo va’erã opa umi hembiapoukapy che ame’ẽva peẽme, ikatu haguã peiko are pe yvýpe.

Peẽ Israel ñemoñare, pehendúke ha pejapóke hembiapoukapy! Upéicha ramo opa mba’e osẽ porãta peẽme, oikóta pende hegui tetã mbarete ha peikóta pe yvy ýicha osyryhápe kamby ha eíra, Ñandejára pende ru ypykue Jára he’i haguéicha peẽme.

Ehendu Israel ñemoñare, Ñandejára ha’e añoiténte hína Tupã. Ehayhu Ñandejárape nde py’aite guive, opa nde rekove ha ne mbaretekue reheve. Ani nde resarái araka’eve ko’ã tembiapoukapýgui che ame’ẽva ndéve ko’ágã.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 17, 2-4. 47. 51ab

Opavave: Rohayhu Ñandejára nde che mombaretéva.

Rohayhu Ñandejára, nde hína pe che mombaretéva ha che joráva.
Nde reñangareko che rehe,
ne rendápe aguahẽ akañy haguã. O.

Nde reime che jerekuévo, nde hína pe che renohẽva jejopy vaígui.
Ne rendápe aguahẽ ramo, nde che pytyvõ.
Añembo’e Ñandejárape, ichupe jaropurahéi va’erã.
Ha’e, che pe’a umi che rayhu’ỹvagui. O.

Toikove Ñandejára, che Pytyvõhára.
Toñemomba’e Tupã che pe’áva ivaívagui. O.

LECTURA MOKÕIHA:
Ko’ágã ñahendúta Tupã Ñandejára ojehai va’ekue Hebreoskuérape 7, 23-28

Che pehenguekuéra: Umi ambue pa’i heta va’ekue, hekovia mante va’erã jepi, omanógui ohóvo hikuái. Jesús katu nomanói, upéva rehe pe hembiapo pa’i ramogua natekotevẽi ohasa ambuépe.

Upéva rehe Jesús ikatu oipysyrõ opa ára guarãma umi oñemo aguĩvape Ñandejáragui, oikove tapia rupi oñembo’e haguã Ñandejárape hesekuéra.

Aipo ramo, Jesús hína pe Pa’i Guasu ñaikotevẽva. Ha’e niko imarangatu, ndaheko añái ha imarã’ỹva, mombyry tembiapo vaívagui ha oñemoĩ ichupe yvateve yvágagui.

Ha’e ndaha’éi umi ambue Pa’i Guasúicha, omba’e juka va’erãva ha ára ko’ẽ rehe oikuave’ẽ va’erã hína iñangaipa rehe voi, ha upéi opavave angaipa rehe. Jesús oñekuave’ẽ ha’ete voi, peteĩ jevýnte ha tapia guarãma. Moisés rembiapoukapy niko omoĩ pa’i guasu ramo yvypóra iporãmba’ỹvape. Ha Ñandejára ñe’ẽ me’ẽngue katu, oñeme’ẽ va’ekue tembiapoukapy rire, omoĩ Pa’i Guasu ramo Ta’ýrape, iporã añetéva opa ára guarã.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Jn 14, 23

Aleluia.
Jesús he’i ichupe: Pe che rayhúva ojapo che ha’éva ha che Ru ohayhúta ichupe.
Ha che Ru ndive rojúne roiko hendive.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Marcos omombe’u háicha 12, 28b-34

Upérõ peteĩ Moises léi ombo’éva ojapysaka hína ra’e umi mba’e saduséokuéra he’ívare Jesúspe. Upéi ha’e oñemboja Jesús rendápe ha oporandu chupe: —Mavaite piko hína pe mandamiénto tuichavéva opavavégui.

Jesús he’i chupe: — Pe mandamiénto tuichavéva niko he’i, “Ehendúke, Israel, Tupã Ñandejára niko peteĩnte. Ehayhu Ñandejárape nde py’aite guive, ne ánga rugua guive, ne ñe’ã guive, ha ne mbaretekue reheve.” Ha upéva riregua he’i kóicha, “Ehayhu nde rapichápe nde rejehayhuháicha”. Ndaipóri mandamiénto tuichavéva ko’ãvagui.

Upe Moises léi ombo’éva he’i chupe: — Oĩ porã mbo’ehára. Añetéko upe eréva. Ñandejára niko peteĩnte, ndaipóri ambue. Ha jahayhu vaerã Ñandejárape ñande py’aite guive, ñane ñe’ã guive, ñane mbaretekue reheve, ha jahayhu va’erã ñande rapichápe ñande jupéicha. Umíva umi mandamiénto niko tuichave opa sacrifício jajapóva ha ofrénda ñame’ẽvagui.

Jesús, ohechávo pe Moises léi ombo’éva ombohovái porã hague chupe, he’i:— Namombyrýi reime Ñandejára Rréinogui.
Upe rire avavéma noporandusevéi chupe mba’eve.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.