JUEVES TERCERO DE ADVIENTO

LECTURA PETEÎHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha 54, 1-10

Esapukái vy’águi kuña ikatu’ỹva ne memby ha ne memby’ỹ va’ekue, epurahéi rory nde na ne membýi va’ekue araka’eve, he’ígui Tupä Ñandejára: “Kuña ojeheja rei va’ekue imemby hetavéta kuña omenda va’ekuégui.”

Embotuichave nde róga vakapi, eipyso kyhyje’ỹre pe reñemo’ãha, embopukuve isã, eikutu porã umi yvyra hakua, rejepysótagui nde akatúa ha nde asu gotyo. Ne ñemoñare heta tetãre oñemomba’éta ha oikóta umi táva ko’ágã ojeiko’ỹháme. Ani rekyhyje, nereñemotĩ mo’ãi, ndaipóri mo’ãi mba’érepa reiko haguã tĩndyhápe.

Ne kuñataĩme guare akã hatã nguégui reñembyesaráita, na ne mandu’a mo’ãvéi reiko hague mena’ỹre ijaheipýrõ, omendátagui nde rehende Apohare, hérava opa mba’e Jára ipu’akapáva, ivaívagui nde pe’áva, Tupã Israelgua marangatúva, ko yvy tuichakue Jára.

Nde va’ekue peteĩ tembireko pyahúicha, rejeheja rei ha revy’a’ỹva. Tupã Ñandejára katu ne renói jevy ha he’i ndéve: “Sapy’a mínte roheja kuri ha che py’a ite guive roguereko jevýta che mba’e ramo.

Che pochy rendýpe nde hegui akañy va’ekue sapy’aite, ha upéicha ramo jepe, yma ite guive rohayhu che py’a ite guive.” Péicha he’i nde Jára ivaívagui nde pe’áva. “Añe’ẽ me’ẽ haguéicha Noépe, y ojaho’ipa ramo guare yvy, nambojaho’i mo’ã veimaha ýpe yvy, upéicha añe’ẽ me’ẽ ko’ágã ne ndive nda che pochy mo’ã véima ha ndajahéi mo’ã veimaha nde rehe.

Hendágui ojei ramo jepe, ha ovava yvyty kuéra, ndojei chéne nde hegui che mborayhu, ha che Ñe’ẽ me’ẽ py’aguapy rehegua ndovavái chéne.” He’i nde Jára nde rayhúva.

Tupã Ñandejára Ñe’ẽ.

SALMO ÑEMBOHOVÁI 29, 2. 4-6. 11-12a. 13b

Opavave: Ñandejára, che romomba’e guasu che pe’águi jejopy vaígui

Ñandejára, che romomba’e guasu che pe’águi jejopy vaígui,
ha nderehejáigui umi che rayhu’ỹva oñembohory che rehe.
Tupã Ñandejára, amanóma hágui che moingove jevy,
che renohẽ omanóva oho hágui. O.

Peẽ, Tupã Ñandejára rehe pejeroviáva, pepurahéi ichupe.
Peropurahéi héra marangatu.
Tupã niko ndaipochy aréi, imba’e porã katu opa árape.
Pyharekue ñane rasẽ ramo, vy’a ñaroko’ẽ. O.

Tupã Ñandejára, che rendúke ha che poriahuvereko.
Che pytyvõke Tupã Ñandejára.
Tupä Ñandejára, che rasẽ niko remoengovia vy’ápe,
Tupã che Jára, ndéve apurahéi. O.

ALELUIA Lc 3, 4.6
Aleluia.
Pembosako’i Tupã Ñandejárape haperã.
Maymave yvypóra ohecháta Tupã Ñandejára Pysyrö.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha 7, 24-30

Upérö Juan remimondokuéra oho rire, Jesús oñepyrũ oñe’ẽ hese opavavépe, ha he’i: Peẽ pesẽ ramo guare peho yvy ojeiko’ỹháme, mba’e rehechávo peho ra’e? Pehechápa ra’e takuapi yvytu ombovaváva? Nahániri? Mba’erã aipórö peho?

Pehechápa peteĩ kuimba’e oñemonde jeguapávape? Peẽ niko peikuaa porã umi oñemonde jeguáva ha vy’ahápe oikóva, oikoha mburuvicha guasukuéra rógapente. Amo ipahápe, mba’e aipo ramo pesẽ pehecha?

Peteĩ maranduhára, ajépa. Upéicha añete. Ha pejuhu peteĩ mba’e guasuvéva maranduháragui katu. Juan niko hína pe Tupã Ñandejára ñe’ẽme he’iha: Che amondo che ñe’ẽ rerahaha ne renonderã ombosako’i haguã ndéve nde raperã.

Ha’e peẽme, ndaipóri yvypórakuéra apytépe mba’e guasuvéva Juángui. Pe michĩvéva Tupã Ñandejára oisãmbyhyhápe, upéva mba’e guasuve ichugui.

Opa ohendu va’ekue Juánpe, umi viru mono’õha Rómape guarã jepe, oheja Juan omongarai ichupekuéra, ojapo haguã péicha pe teko jojápe ojeruréva Tupã. Umi fariséo ha umi Moisés rembiapoukapy mbo’eha katu ndohejái omongarai ichupe kuéra Juan, ojahéivo pe Tupã Ñandejára ojapose va’ekuére hesehápe kuéra.

Ñandejára Jesucristo Ñe’ẽ.