MIÉRCOLES TERCERO DE ADVIENTO

LECTURA PETEÎHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha 45, 6b-8. 18. 21b-25

Tupã Ñandejára he’i: Che opa mba’e Jára, ndaipóri ambue. Che upe ajapóva tesakã ha pytũ, ame’ẽ jeiko porã ha jejopy vai.
Che, opa mba’e Jára, ajapo opa ko’ã mba’e.

Yvágagui ho’a háicha ysapy ha araígui ama, amboúta yvy ári akã rapu’ã. Yvýgui amoheñóita ivaívagui ñesẽ ha ijykére amoĩta teko joja.”
Che, opa mba’e Jára, umíva ajapóta. Péicha he’i Tupä Ñandejára ojapo va’ekue yvága, ha’e hína Tupã.

Ha’e ojapo yvy ha omoĩ hatã henda guãme, ndojapói yvy perõ, ojapo uvei, pype ojeiko haguãicha: “Che hína opa mba’e Jára, ndaipóri ambue. Mávapa omombe’u ra’e ko’ã mba’e oiko mboyve, iñepyrũha guive?

Mávapa ymaite guive he’i ra’e oikotaha? Ndaha’éipa ra’e?

Che hína opa mba’e Jára ndaipóri ambue Tupã.
Che hína Tupã Ñandejára hekojojáva ha oporope’áva ivaívagui, ndaipóri ambue.

Peju jevy che rendápe poipe’a haguã ivaívagui, peẽ opa rupigua. Che hína Tupã Ñandejára ha ndaipóri ambue.
Che añe’ẽ me’ẽ che rérape voi. Che jurúgui osẽ ñe’ẽ añetegua ha ndopyta rei mo’ãi.

Che renondépe oñesẽta opavave ha che rérape ome’ẽta iñe’ẽ, he’ívo: ‘Tupã Ñandejára ndive ño ite oĩ akã rapu’ã ha pokatu’.
Henondépe opytáta itĩndy opa umi hese ipochy rendy va’ekue. Tupã Ñandejára rehe ae oñakã rapu’ã ha omimbipáta Israel ñemoñare.

Tupã Ñandejára Ñe’ẽ.

SALMO ÑEMBOHOVÁI 84, 9ab. 10-14

Opavave: Tupã Ñandejára he’i ome’ẽtaha py’aguapy

Amomarandúta Tupã Ñandejára he’íva:
Ha’e he’i ome’ẽtaha py’aguapy iñirü ha hese ojeroviávape
Hi’aguĩ ára oipysyrö haguã umi ichupe omomba’évape.
Tupã, nde reko mimbipa ojekuaáne ore yvýpe. O.

Mborayhu ha añete oñuguãitĩne,
py’aguapy ha teko joja oñoañuãne.
Añete heñóine upe yvýgui,
ha teko joja yvágagui oma’ẽne. O.

Tupã Ñandejára, ha’ete voi ome’ẽta ñandéve iporãva,
ha ko ñande yvy ome’ẽta hi’a.
Teko joja ohóne henonderã,
ombosako’ívo ichupe haperã. O.

ALELUIA Is40, 9-10

Aleluia.
Hatã eñe’ẽ, nde reraháva marandu porã.
Oguahẽma Tupã Ñandejára pu’aka reheve.
Aleluia.

EVANGELIO

Ko’ágä ñahendúta Ñandejára Jesucristo rekove ha hemimbo’e San Mateo omombe’u háicha 7, 19-23

Upérö Juan el Bautista ohenói mokõi hemimbo’épe ha omondo Ñandejára rendápe, oporandúvo ichupe ha’épa añete pe ou va’erã, térã oha’arõ va’erãpa hikuái ambuépe. Aipórõ, Juan Bautista remimbou kuéra oñemboja Jesús rendápe, ha he’i ichupe: Juan Bautista ore mbou roporandu haguã ndépa ha’e pe ou va’erã, térãpa roha’arõ va’erã ambuépe.

Upe javete Jesús omonguera oikóvo hetápe imba’asýgui ha iñangata kuéragui, ha mba’epochýgui ave, ha omonguera ohecha heta ohechave’ỹ va’ekuépe.

Upéi he’i ichupekuéra: Ta peho ha peje Juánpe opa mba’e pehecháva ha pehendúva. Pemombe’u ichupe ohecha’ỹva ohecha jevyha, ijypíva oguata porãha, ipire aipáva okueraha, ohendu’ỹva ohendu jevyha, omanóva oikove jevyha ha imboriahúvape oñehendukaha marandu porã. Ha ovy’a iténe umi ojerovia mantéva che rehe!

Ñandejára Jesucristo Ñe’ẽ.