LECTURAS 25 DE DICIEMBRE: NAVIDAD

MISA DE LA NOCHE

LECTURA PETEÎHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha 9, 1-6

Upe Táva oguata va’ekue pytümbýpe ohecha ára sakã guasu; umi oiko va’ekue hína upe tekoha pytümbýpe ojajái tesape. Remongakuaa tory, ha heta ojevy’a.

Opavave ovy’a ne renondépe, kóga ñemono’õme ramo guáicha, ovy’a háicha umi oñomboja’óva opa mba’e ñorairõme guare rehe.
Mba’e pohýi ijati’ýre oĩ va’ekue, mba’e pohýi ijape rehe oguapýva, inupãhára po pegua yvyra, remongu’ipa, Madiánpe ramo guaréicha.

Ipy rehegua ombohyapu va’ekue ñorairõhára, ha ijaokuéra tuguýpe ojehypýiva, ojehapýta ha tatápe ikusuguéta. Ou hague rehe ñandéve mitãmi, mitã ra’y oñeme’ẽta ñandéve ichupe oñeme’ẽta pu’aka oisambyhy haguã ha oñembohérata ha’e: Mbo’ehára imombe’upyrã, Tupã Ñandejára imbaretéva Túva opa ára oikovéva, Mburuvicha guasu py’aguapy reruha.

Itúva ypykue David guapyhápe oguapýta; ha py’a guapy ndopa mo’ãi, hetã imbaretéta, tekojoja ha hekopeguáta ipyenda, ãga guive opa árape guarã. Ko’ã mba’e ojapóta Ñandejára mborayhu ipu’akapáva.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 95, 1-3. 11-13
Opavave: Ko árape onase ñande salvahára. Ñandejára remimbou

To jereropurahéi Tupãme purahéi pyahu,
To purahéi Ñandejárape ko arapy
Pepurahéi Ñandejárape, héra pemomba’e. O.

Opa ara ite pemyerakuã jejopy vaígui oporoguenohẽha.
Pemombe’u opa tetã rupi ha’e tuichaha,
ha maymávape, hechapyrãva ojapóva. O,

To vy’a yvága ha yvýpe to jerosapukái.
To sununu yguasu ha opa ipýpe oĩva.
To vy’a umi ñu ha opa mba’e ipype oĩva.
Vy’águi to sapukái umi yvyra ka’aguy pegua.O.

To jepurahéi Ñandejára renondépe,
ha’ete voi oúgui oisãmbyhy haguã ko arapy.
Teko jojápe oisãmbyhýta ko yvy,
ha tetãnguéra iñañetépe O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue Títope 2, 11-14

Ñandejára niko ohechauka va’ekue imba’e porãha, oikuave’ẽvo yvypórape oñepysyrõ haguã. Pe Tupã py’a porã, ñane mbo’e jajeheja haguã teko jerovia’ỹ ha mba’e pota yvy ári guágui, ha jaiko haguã ñande rekove ko’ágã guápe, akã guapýpe, hekópe ha Ñandejára mborayhúpe, torypápe ñaha’arõ aja ou jevy Ñandejára Jesucrísto ñande salvahára.

Ha’e omano va’ekue ñande rayhupápe, ñane renohẽ haguã teko añágui ha ñane mopotĩmbaite haguã, ojapóvo ñande hegui peteï tetã imba’e teéva, mba’e porãnte oipotáva.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Lc 2, 10-11
Aleluia.
Agueru peẽme marandu iporãva, ombovy’átava opavavépe: Péina ko árape onase yvy ári, pe oporopysyrõva,
upéva hína ku Mesías, Ñandejára voi.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha 2, 1-14

Jesús onase mboyvemi, emperador Augusto ojapouka peteĩ sénso oikuaa haguã máva-mávapa hína umi oikóva ipoguýpe. Quirínio upe ramo gobernador va’ekue Síriape, ha chupe ho’a ojapóvo pe sénso Palestínape.

Opavave oho va’erã ivállepe, omoĩ haguã héra kuatiápe. Upévare, José osẽ Nazarétgui opytáva Galiléape, ha oho Belénpe oĩva hína Judéape.

Upépe niko onase va’ekue rréi David, ha José niko David ñemoñare vaekue. María niko upérõ hye guasetéma hína, ha oho ave José ndive. Ha Belénpe oĩ aja hikuái, Maríape oguãhẽ hi’ára imemby haguã. Ha ndojuhúigui hikuái mamove opyta haguã, oheja chupekuéra opyta óga guýpe mymbakuéra apytépe. Ha upépe onase imemby kuimba’e. Omonde mitã aópe ha omoñeno peteĩ mymba karuhápe.

Belén ypýpe oĩ upe pyhare ovecha rerekua oñangerekóva hína ñúme hymbakuérare. Peichaháguinte ojechauka sapy’a chupe kuéra Ñandejára Ánhel peteĩ. Ha Ñandejára mimbipa ojaho’ipágui chupekuéra, okyhyjepa hikuái. Ñandejára Ánhel katu he’i chupe kuéra: “Ani
pekyhyje. Aru hína peẽme marandu iporãva, ombovy’átava opavavépe.

Péina ko pyhare onase kuri, David vállepe, pende salvahára. Upéva hína pe Mesías, Ñandejaraite voi. Peikuaáta mávapa, pejuhúvo oñeñuã mitã aópe, ha oñeno hína vaka karuhápe.”

Upéicha háguinte, ojechauka sapy’a yvágape heta Ñandejára Ánhel, oguerohorýva Ñandejárape, ha he’íva: Toñemomba’e guasu yvágape Ñandejára, ha py’a guapy tou opa yvypórape, Ñandejára ohayhúva.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.