LECTURAS SAGRADA FAMILIA: JESÚS, MARÍA Y JOSÉ

LECTURA PETEÎHA:

Ko’ágã ñahendúta Tupã Ñandejára Ñe’ẽ Samuel aranduka peteĩháme oĩ háicha 1, 20-22. 24-28

Péicha Ana opyta hye guasu. Ha oñembotývo hi’ára, imemby peteĩ mitã kuimba’e ha ombohéra Samuel, “Ojerure hague rehe Tupãme”. Upéi Elcaná oho jevy hogagua kuéra ndive Sílope, oikuave’ẽ haguã mymbajuka áño jere rehegua, ha opaga haguã Tupãme ipromésa.

Ana katu ndohói ha he’i iménape: “Ndaha mo’ãi amombo’o peve che memby. Upe rire araháta aikuave’ẽ Tupãme ko mitã opyta haguã upépe opa ára guarã”.

Pe mitã nokambuvéi rire, ogueraha chupe tupao Sílope. Ogueraha avei mbohapy tóro ra’y, 22 kílo trígo ha peteĩ víno ryru. Imemby imitã gueteri upérõ.

Ojuka rire pe tóro ra’y ogueraha hikuái pe mitã pa’i Elípe. Ha Ana he’i chupe: – Nde karai, che niko pe kuña añembo’e va’ekue Ñandejárape nde ypýpe ko tupaópe. Ajerure va’ekue chupe ome’ẽ haguã chéve peteĩ mitã. Kóva ha’e. Upévare aru ame’ẽ chupe imba’erã, ha oikove aja oikóta hendive omba’apóvo chupe itupaópe. Upéi oñesu hikuái Ñandejára renondépe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 83, 2-3. 5-6. 9-10

Opavave: Ovy’aite vaerãpa Tupã, umi nde rógape oikóva

Javy’aite piko nde rógape Tupã opa mba’e Jára.
Che py’aite guive che ãho nde tupao róga guýre.
Che py’aite guive hi’ãnte chéve apurahéi
Tupã oikovévape. O.

Ovy’aite vaerãpa umi nde rógape oikóva
ha opa ára nde reropurahéiva!
Ovy’aite vaerãpa umi nde pype ojuhúva pytyvõ
oñepyrũvo oguata nde rape rupi. O.

Tupã ore Jára, nde pu’akapáva, ehendu che ñembo’e.
Che rendu Tupã, Jacob Jára.
Tupã, eipytyvõ ore ruvicha guasúpe,
ehovasa ne rembiporavópe. O.

LECTURA MOKÕIHA:
Ko’ágã ñahendúta Kuatiañe’ẽ peteîha San Juan ohai va’ekue 3, 1-2. 21-24

Che pehengue kuéra: Pema’ẽmi mba’éichapa ñande rayhu Tupã pe Túva, ikatu haguã ñañembohéra Tupã ra’y, ha ñande ha’e. Upévare yvypóra reko rayhuha na ñande kuaái, ndoikuaái haguére Tupãme.

Che pehẽnguekuéra pohayhúva, ñande ha’éma Tupã ra’y, ha jepe ndojekuaáirõ gueteri mba’eichaguátapa ñande, jaikuaa, Jesucristo ojechaukávo, ha’eichaguataha ñande jahechátagui chupe ha’ehaichaite.

Che pehẽngue kuéra pohayhúva, ñande py’a na ñane moĩ vaíri ramo, jajerovia Tupã renondépe. Ha ha’e ome’ẽta ñandéve opa jajeruréva, ñane ñe’ẽ rendúgui hembiapoukapýpe ha jajapógui ha’e oipotáva. Ha hembiapoukapy hína kóva: Jarovia Ita’ýra Jesucrístope ha
jajoayhu ha’e he’i haguéicha ñandéve.

Umi ohayhúva hembiapoukapy oiko ipype, ha ha’e oiko ipype kuéra. Ha jaikuaa oĩha ñande pype, Espíritu ha’e ome’ẽ vaekue rupi.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Col 3, 15-16
Cristo py’aguapy to myenyhẽ pende py’a.
Cristo Ñe’ẽ toĩ pende pype iporãngue heta háicha.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha (2,41-52)

José ha María ohómiva áño jerére Jerusalénpe Páskua areterã. Jesús ombotývo 12 áño, oho avei túva ha isy ndive Jerusalénpe. Pe arete ohasapa rire, ojevy hikuái hogaperãicha. Ha José ha María ohecha kuaa’ỹre, Jesús opyta ra’e Jerusalénpe.

Oimo’ã hikuái Jesús ouha hína hapicha kuéra apytépe. Ha ka’arúmavo, oñepyrũ oheka chupe igénte kuéra ha ikuaahakuéra apytépe, ha ndojuhúi. Upémarõ ojevy hikuái Jerusalénpe hekávo.

Mbohapy ára rire ojuhu chupe Tupaópe oguapy hína umi Moisés léi ombo’éva apytépe. Ojapysaka hese kuéra ha omba’e porandu hína chupe kuéra. Ha opa umi ojapysakáva, ohecha ramoite. Ijurujái opytávo hikuái ohechávo mba’éichapa iñarandu, ha hekoitépe he’iha opa
mba’e. Túva kuéra ohechávo chupe, ipy’andýi.

María he’i chupe: — Che memby, mba’éreiko péicha rejapo ore rehe. Nde ru ndive niko opa rupi roheka roikóvo, ha heta rojepya’apy nde rehe.

Jesús katu he’i chupe: — Maerãiko che reka. Ndapeikuaái nga’u piko aime vaerãha che Ru rógape.

Túva kuéra katu ndoikuaái pe he’íva. Jesús oho hendive kuéra Nazarétpe. Ha opa mba’épe iñe’ẽ rendúva túva ha isýpe. Isy María katu oñongatupánte ko’ã mba’e ipy’apýpe. Jesús okakuaa aja ohóvo, iñaranduve ave ohóvo. Ñandejára ohovasa ha opavave oguerohory
ichupe.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.