LECTURAS DEL JUEVES TRIGÉSIMA CUARTA SEMANA

LECTURAS DEL JUEVES TRIGÉSIMA CUARTA SEMANA

Primera lectura:

Ko’ágã ñahendúta Tupã Ñandejára ñe’ẽ Daniel arandukápe oĩ háicha  6, 12-28

Umi kuimba’e oho oike Daniel rógape, ha ojuhu ichupe omomba’e guasu ha oñembo’e jave hína Tupã Ñandejárape. Pya’e oho hikuái mburuvicha guasu rendápe ha omomandu’a ichupe upe kuatiáre he’ívape, ha he’i ichupe: Nde, ore ruvicha guasu, remoĩ kuri nde réra kuatiáre oje’ehápe upe oñembo’éva oime raëichagua tupãme térã yvypóra, ndaha’éiva nde, ko’ã 30 ára jave, oñemombotaha león rembi’urã. Ndaupéichaipa hína? Upéichaite, he’i mburuvicha guasu, ha ipype he’íva ojejapo va’erã, Médo ha Pérsa kuéra léi niko péicha ha ndaikatúi jeheja rei.

Upépe ha’ekuéra he’i ichupe: Daniel, Judágui ojegueru va’ekue  tembiguáirõ, na nde apói voi mba’eve ramo, ore ruvicha guasu. Ha’e ndojepy’apýi ete voi pe erévare nde kuatiápe. Rohecha ichupe oñembo’e ramo mbohapy jevy peteĩ árape.

Ohendúvo upéva, mburuvicha guasu ndovy’ái ha oheka mba’éichapa oguenohẽvo Daniélpe jejopy vaígui. Kuarahy reike peve ojapo ikatumíva ani haguã Daniélpe ho’a vai. Umi karai katu ou jevy hendápe ha he’i ichupe:

Nde, ore ruvicha guasu, reikuaa porã Médo ha Pérsa kuéra léipe he’íva, ha mburuvicha guasu omoĩ haguépe héra, ndaikatuiha ojeheja rei.

Upe marõ mburuvicha guasu omondo Daniel píari ha oityuka ichupe león kuápe, hembi’urã. Oity kuetévoma ichupe hikuái, mburuvicha guasu he’i Daniélpe: Tupã nde Jára, toĩ ne ndive. Rejeroviágui hese, nde rekyhyjéi rejapo haguã ha’e oipotáva. Oity rire hikuái Daniélpe upe león kuápe, omboty pe ijuru peteĩ ita guasúpe.

Upéi karai mburuvicha guasu oheja hese ikuãirũ mbore ha ambue mburuvicha kuéra kuãirũ mbore ani haguã avave oguenohẽse Daniélpe. Upéi mburuvicha guasu oho hóga guasúpe. Ho’u’ỹ rehe mba’eve ha ohenoiuka’ỹ rehe umi ikuña oñeno oke haguã jepiguáicha, ha ndaikatúi oke upe pyharépe. Ko’ẽtĩ jave opu’ã ha pya’e oho pe león kuápe. Oñemoaguïvo upégui, ohenói Daniélpe ha ha’ete vaicha ku iñe’ẽ iñapokytãva ijahy’ópe.

Osapukái ha he’i: Daniel, Tupã Ñandejára oikovéva rembiguái! Tupã Ñandejára piko ndepe’a ra’e umi león rãi nguágui? Nde niko chupénte voi remomba’e.

Ha Daniel he’i ichupe: Tereikovéke opa ára, che ruvicha guasu! Tupã Ñandejára ombou hemimbou ha ha’e omboty umi león juru ani haguã ojapo che rehe mba’eve. Tupã Ñandejára niko oikuaa ndajapói hague nde rehe mba’eve ivaíva, che ruvicha guasu.

Upévo mburuvicha guasu tuicha ovy’a ha oguenohẽuka Daniélpe león kuágui. Oñerenohẽ rire, ohecha hese hikuái ndojehúi hague ichupe mba’eve ojerovia haguére Tupã Ijárare. Upéi mburuvicha guasu oityka pe león kuápe umi Daniélpe omoĩ vai va’ekue, hembireko ha ita’ýra kuéra reheve. Oguahẽ mboyve huguápe voi umi león oipehe’ã ha omokõma katu ichupe kuéra.

Upéi mburuvicha guasu Darío omondo ikuatia ñe’ẽ opa tetã yvy ári guápe peteĩ teĩme iñe’ẽ teépe, ha he’i kóicha ichupe kuéra: Aipota peiko porã ha pende py’aguapy joa, ha aipota avei opa rupi ete ko che retã guasúpe oñemomba’e guasu ha oñeñakãity Tupã Daniel Járape.

“Ha’e niko hína Tupã Ñandejára oikovéva, ha oikóva opa ára. Ha’e oporosãmbyhyhápe noñehundi mo’ãi, ha ipokatu ndopa mo’ãi araka’eve. Ha’e oporope’a jejopy vaígui, ha oporomosãso. Ojapo mba’e hechapyrãva, yvágape ha yvy ári. Ha’e oipe’a Daniélpe, umi león rãinguágui.”

Tupã Ñandejára Ñe’ẽ.

SALMO ÑEMBOHOVÁI Dn 3, 68-74

Opavave: Tupä Ñandejárape, pemomba’e guasu ha peropurahéi ichupe opa ára.

Ysapy ha y rypy’a. Tupä Ñandejárape, pemomba’e guasu ha peropurahéi

ichupe opa ára. O.

Y ratã ha ro’y. Tupä Ñandejárape, pemomba’e guasu peropurahéi

ichupe opa ára. O.

Ára ha pyhare. Tupä Ñandejárape, pemomba’e guasu ha peropurahéi

ichupe opa ára. O.

Ára sakã ha pytũ. Tupä Ñandejárape, pemomba’e guasu ha peropurahéi

ichupe opa ára. O.

Ára tiri ha arai. Tupä Ñandejárape, pemomba’e guasu ha peropurahéi ichupe opa ára. O.

Yvy.Tupä Ñandejárape, to momba’e guasu ha to gueropurahéi ichupe opa ára. O.

ALELUIA Lc 21, 28

Aleluia.

Pende py’a guasúke ha pene akã rapu’ã, oguahẽtama ára ñañe pysyrõ haguã.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha          21, 20-28

Upe ramo Ñandejára omombe’u hemimbo’ekuérape mba’éichatapa pe ijeju:

Pehechávo Jerusalén rehe ojerepa ñorairõhára aty, peikuaáke voi ete ntema oñehunditaha. Upéva pehecha vove, umi Judéape oikóva pya’éke toho to kañy yvytýre. Ha umi oĩva ñúme, ani oho jevy upépe. Ára oñeporo nupãtaha hína umíva, oikotaha opa he’íva Tupä Ñandejára Ñe’ẽ.

To jererekóke umi kuña, umíva umi árape hye guasúva térã imemby kambúva! Hetáta ñembyasy tetã tuichakue, ha peteĩ ñenupã nde vaíva ho’áta opavavére. Oiméta ojejukáva kyse pukúpe, ha oiméta ojereraháva tembiguáirõ opa tetã rupi. Ha umi heko jeroviaha’ỹva opyrũta Jerusalén rehe oguahẽ peve ichupe kuéra hi’ára paha.

“Heta mba’e ojehu’ỹva ojehecháta kuarahy, jasy ha mbyja kuéra rehe ha yvy ári. Tetã nguéra ipy’a tarovapáta ha oñemondyipáta pe yguasu ryapu vai opu’ã mbávagui. Yvypórakuéra ipy’a manombáta kyhyjégui, ojepy’a mongetávo opa ojehútavare. Ha opa mba’e yvágape oĩva okuchupáta. Ha upépe ojehecháta Tupã Ñandejára ra’ýpe, yvypóraicha ou va’ekuépe, ou ramo peteĩ arai ári tuicha pokatu ha mimbipápe. Oñepyrũvo oiko ko’ã mba’e, pejeroviánteke ha pemopu’ã pene akã. Pya’etéma peñe pysyrõtagui.”

Ñandejára Jesucristo Ñe’ẽ.