LECTURAS DEL MARTES 3º TIEMPO ORDINARIO

LECTURAS DEL MARTES 3º TIEMPO ORDINARIO

Ñahendúta Tupã Ñandejára Ñe’ẽ San Pablo ohai va’ekue Hebreos guápe   10, 1-10

Che pehẽnguekuéra: Moisés rembiapoukapy niko umi mba’e porã ou va’erã joguahánte, ha ndaha’éi pe ha’etéva voi. Upévare, upe tembiapoukapy máramo ndaikatúi omoporã añete umi oñemboja mantévape Tupã Ñandejára renondépe oikuave’ẽ haguã ichupe mymbajuka jevýnte.

Upe tembiapoukapy ikatu rire añete omopotĩ ichupekuéra angaipágui, noñeñandu mo’ã véima angaipa apoha ramo ha noikuave’ẽvéi va’erã upe mymbajuka.

Umi mymbajuka ojejapóva jepi áño ohasávo, iporã omomandu’a haguãnte ichupe kuéra iñangaipa kuérare. Umi tóro ha kavara ruguykue ndaikatúi omboguévo angaipa.

Upévare, Cristo oúvo ko yvy ári he’i va’ekue Tupã Ñandejárape: “Nde reipotái jejuka ha kuave’ẽmby, reme’ẽ uvei chéve che reterã.

Nde rerohorýi mymbahapy térã kuave’ẽmby reheja rei haguã angaipa.”

Upérõ ha’e va’ekue: “Ápe aime, pe oje’e háicha che rehe kuatiápe, ajapo haguã ne rembipota, ha Tupã Ñandejára.”

Tenondete ha’e he’i, Tupã Ñandejárape nombohoryiha jejuka, mymbajuka ha mymbahapy ojeheja rei haguã angaipa, he’i ramo jepe tembiapoukapy upéicha ojejapo haguã. Ha upéi he’ive: “Péina aju ajapóvo ne rembipota.”

He’ise oipe’aha umi mymbajuka yma guare ha omoĩ hendaguépe peteĩ ipyahúva. Tupã Ñandejára ñane mboyke va’ekue imba’erã, Jesucristo ojapo rupi hembipota oikuave’ẽvo hete voi ojejuka haguã peteĩ ete jevy ha tapia guarãma.

Tupã Ñandejára Ñe’ẽ.

SALMO ÑEMBOHOVÁI  39, 2. 4ab. 7-11

Opavave: Tupã Ñandejára rehénte ajerovia.

Tupã Ñandejára rehénte ajerovia.

Che rendápe oñemboja ha che rendu.

Che jurúgui omoheñói purahéi pyahu,

ha Tupã Ñandejárape amomba’e guasu. O.

Heta oĩne ohechávo ko’ã mba’e ojeroviáne Ñandejára rehe.

Rejerure rangue mymba juka ha mba’e kuave’ẽ,

térã mymba hapy tembiapo vai jeheja reirã,

hendaguépe reju che resape’a. O.

Nde kuatiápe ojehíma voi nde apukapy

upe ajapo va’erä ajesarekohápe:

Upévare ha’e ndéve: “Nde pópe añemoĩ.”

Tupã Ñandejára, nde apoukapy araha che korasöme. O.

Opavavépe aikuaauka va’ekue nde reko joja,

yvypóra kuéra atyhápe;

ha nambotýi che juru araka’eve,

Tupã Ñandejára, nde reikuaa porã. O.

Na ñongatúi che jupe guarãnte nde reko joja,

amombe’u nde reko jerovia ha ne pysyrõ.

Opavavépe ha’e nde ore pytyvõha ha rehayhuha opa ne retã guápe. O.

ALELUIA Cf. Mt  11, 25

Aleluia.

Romomba’e guasu che Ru, yvy ha yvága Jára,

reikuaauka hague mba’e guasu ete Sambyhy rehegua naiñarandúivape.

Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha   3, 31-35

Upe ramo guare oguahẽ Jesús sy ha ityvýrakuéra. Opyta okápe ha ohenoiuka ichupe. Umi oguapýva Jesús ykére he’i ichupe: Nde sy, nde ryvy kuéra ha umi ne reindy na’ápe okápe hína, nde reka. Jesús katu he’i: Mávaiko che sy ha máva che ryvy?

Upéi oma’ẽvo umi ijerére oguapývare he’i: Ko’ãva hína che sy. Ko’ãva che ryvy. Ha oimeraẽ ojapóva che Ru rembipota, upéva hína che ryvy, che reindy ha che sy.

Ñandejára Jesucristo Ñe’ẽ