LECTURAS: MIÉRCOLES 3º DURANTE EL AÑO

LECTURAS: MIÉRCOLES 3º DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Hebreosguápe 10, 11-18

Che pehẽnguekuéra: Umi pa’i judío ko’ágä peve, ára ko’ẽre, umi mymba juka jeýnte oikuave’ẽ jevy jevy, ndaikatúi ramo jepe umíva ombogue angaipa. Jesucristo katu oikuave’ẽ hekove opavave angaipa rehe peteĩete jevy ha opa ára guarã, ha upéi oguapy Tupã Ñandejára aka túape. Upépe oĩ hína, Tupã Ñandejára omoĩmeve ipyenda ramo umi ichupe ohay hu’ỹva.

Peteĩ oikuave’ẽme hekove peteĩ jevyete, ha’e omoporã añete opa ára guarãma umi Tupã Ñandejára pe guarã oñemboyke va’ekuépe. Ha Espíritu Santo omoañete ñandéve upéva he’ívo: “Ñe’ẽme’ẽ ajapótava umi ára rire hendivekuéra, kóvata hína, he’i Tupã Ñandejára: Amoĩta che rembiapoukapy ipy’ápe kuatiápe guáicha iñapytu’ũme.

Ha na che mandu’a mo’ãvéima iñangaipakuérare ha heko añanguére.”

Aipórõ, umi angaipa ojehejareipamarõ, na tekotevẽ véima kuave’ẽmby angaipáre.

Tupã Ñandejára Ñe’ẽ.

SALMO ÑEMBOHOVÁI  109, 1-4

Opavave: Ndehínapa’i opa árapeguarã

Tupä Ñandejára he’i che ruvicha guasúpe:

“Eguapy che akatúagotyo,

Che amoï aja ndocha’éiva nde rehe ne pyenda ramo umi nde rayhu’ỹva.” O.

Tupä Ñandejára oipysóta isambyhyha pu’aka:

“Sión guive Tupä Ñandejára ne mombarete.

Opa nde rayhu’ỹva toĩmba nde poguýpe”. O.

Reikove ypy guive nde mburuvicha hína,

ha marangatúguirejajaipa.

Chete voi ysapýicha romoheñói va’ekue pe amo ko’ẽjúgui”. O.

Tupä Ñandejára ome’ẽ iñe’ẽ héra rehe ha nopyrũichéne hese:

“Nde hína pa’i Melquisedec chagua opa árape guarã.” O.

ALELUIA   Cf. Mt  11, 25

Aleluia.

Romomba’eguasu che Ru, yvy ha yvágaJára,

reikuaauka hague mba’eguasuete Sambyhy rehegua naiñarandúivape.

Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha     4,1-20

Upe ramo Jesús oñepyrũ oporombo’e jevy yguasu rembe’ýpe. Hetágui umi oñemboatýva Jesús jerére, ojupi ha’e ha oguapy peteĩ kanóape, ha opavave opyta pe y rembe’ýpe. Upe guive ha’e oñe’ẽ ichupekuéra heta mba’ére, ha oiporu ñe’ẽ mbojoja omoesakã haguãi chupekuéra pe he’iséva.

Oporombo’évo, he’iichupekuéra: “Pehendukóva: ‘Oĩ va’ekue peteĩ osẽva oñemitỹ haguã. Ha omosarambívo pe oñotỹsévara’ỹi, oĩ ho’ávaumi tape ojeguataharupi ha ou guyrakuéra ha ho’upa. Oĩ avei ho’áva itatýpe, yvy ipokãháme.

Umíva voi heñói, ipererĩgui pe yvy. Kuarahy ojopévo katu ohapypa, ha ndahapopypukúigui ipirupa. Oĩ avei ho’áva ñuatĩndýpe, ha umi ñana okakuaávo ojaho’ipa ha ojuka. Oĩ katu avei ho’áva yvy iporãháme ha upépe hi’a heta. Oĩ hi’áva 30, oĩ hi’áva 60, ha oĩhi’áva 100”.

Upéi he’i Jesús: “Ohendúvake tojapysaka porã.”

Upéi, Jesús opytávo ha’eño, umi oĩva ijypýpe umi 12 apóstol ndive, oporandu mba’épa he’ise upe Ñe’ẽ mbojoja. He’i ichupekuéra: “Tupã Ñandejára niko oikuaauka peẽmente umi mba’e guasuete Tupã Ñandejára sãmbyhy rehegua.

Umi okápe oĩvape katu ojekuaauka ñe’ẽ mbojoja rupi, oma’ẽ ma’ẽve ramo jepe ani haguã ohecha, ha ohendu henduve ramo jepe ani haguã oikuaa, ani ágä ojevy Tupã Ñandejára gotyo ha ha’e ohejarei ichupekuéra iñangaipa.”

He’i ichupekuéra: “Nahesakãi piko peẽme ko mbojoja? Aipórõ piko mba’éicha hesakãta peẽme umi ambue? Pe oñemitỹva hína pe omoherakuãva upe ñe’ẽ. Oĩ ojoguáva pe mba’e ra’ỹi ho’ava’ekue tapépe: ohendu upe Ñe’ẽ ha ou Satana ha oipe’a pe ñe’ẽ ipy’apýpe oñeñotỹ va’ekue.

Oĩ ojoguáva upe ho’ava’ekue itatýpe: ohendu umi Tupä Ñandejára ñe’ẽ ha vy’apópe ogueroguahẽ, ha ndahapopypukúigui ndopyta hatãi ipypekuéra.

Upévare, oiko asy térã ojejopyvai ramo oguerovia haguére pe ñe’ẽ, pya’e ojei ichugui. Umi ojoguáva mba’era’ỹi oñeñotỹva ñuatĩndýpe, umiva hína umi ohendúva pe ñe’ẽ. Ha’ekuéra katu ojepy’apy umi mba’e yvy ari guare hénte voi, ha mba’eta rerekose ombotavyetei chupekuéra.

Ko’ã mba’e ojaho’i ha ojuka pe ñe’ẽ, ha upévagui ndaikatúi hi’a. Umi oñeñotỹva yvyporãme katu ojogua umi ohendúva pe ñe’ẽ, ha oikuaa porãva mba’épa he’ise. Upéi hi’a porã, oĩ hi’áva 30, oĩ hi’áva, 60 ha oĩ hi’áva 100 peteĩgui.”

Ñandejára Jesucristo Ñe’ẽ