LECTURAS DEL MIÉRCOLES V DE CUARESMA

LECTURAS DEL MIÉRCOLES V DE CUARESMA

Ko’ágã ñahendúta Tupã Ñandejára ñe’ẽ Daniel arandukápe oĩ háicha     3, 1. 4. 5b-6. 8. 12. 14-20. 24-25. 28

Mburuvicha guasu Nabucodonosor ojapouka órogui peteĩ ta’ãnga ijyvatéva 33 métro ha ipéva 3 métro. Oho omoñembo’y peteĩ ñúme hérava Dura, tetã Babilóniape.

Peteĩ mburuvichaguasu rembiguái hatã osapukái ha he’i: “Pehendúke maymáva ko’a rupi peikóva, ha mayma tetã ambuegua, peñesũta ha pemomba’e guasu pe ta’ãnga ojapouka va’ekue mburuvicha guasu Nabucodonosor. Umi noñesũiva ha nomomba’eguasúi pe ta’ãnga ojeitýta tatakua rendýpe.”

Oĩ upérõ Babiloniagua kuérava ohóva mburuvichaguasu Nabucodonosor rendápe omoĩ vai haguã judíokuérape.

Umi judío kuéra nde remoĩ va’ekue sãmbyhyhára ramo Babilóniape katu ndojapói upéicha. Sadrac, Mesac ha Abed-Negó, umíva niko nomomba’éi ne tupã nguéra ha noñesũi pe ta’ãnga renondépe, órogui rejapouka va’ekue.

Nabucodonosor oporandu ichupekuéra: Añete piko peẽ napemomba’éi che tupã nguéra ha napeñesũi pe ta’ãnga renondépe, órogui ajapouka va’ekue? Ko’ágã pehendu ramo turu ha opaichagua mba’epu, peñesũtapa pe ta’ãnga che ajapouka va’ekue renondépe? Cháke ndapejapói ramo pejeitýta tatakua rendýpe. Ha mba’éichagua tupã piko upégui pene renohẽta?

Sadrac, Mesac ha Abed-Negó he’i Nabucodonosórpe: Natekotevẽi ro’e ndéve mba’eve ore jehe. Tupã ore Jára, ore romomba’e guasúva, ore pe’áta pe tatakua rendýgui, ha opa mba’e vaígui nde rejaposéva ore rehe. Ha ndojapói ramo jepe upéicha, roipota reikuaa ore ruvicha guasu, ore noromomba’e guasu mo’ãiha ne tupã nguéra ha noroñesũ mo’ãi pe ta’ãnga renondépe, órogui rejapouka va’ekue.

Nabucodonosor hova pytãmba pochýgui ohendúvo pe he’íva Sadrac, Mesac ha Abed-Negó. Ha ojatapyuka pe tatakua rehe hakuve haguã jevy jepiguágui. Upéi he’i umi hembiguái imbaretevévape oipokua ha oipykua haguã Sadrac, Mesac ha Abed-Negópe, ha omombo haguã pe tatakuápe.

Upe rire mínte Nabucodonosor opo opu’ã, ha he’i umi ijere rupi oĩvape: Nambohapýinte piko umi jaipokua ha jaity va’ekue tatakuápe?

Péicha niko kuri, he’i ichupe hikuái. Ha Nabucodonosor he’i: Mba’éicha rupi piko péicharõ ahecha irundy kuimba’e? Péina ahecha oguata hína hikuái pe tata mbytépe ha mba’eve ndojehúi ichupe kuéra. Pe irundyha katu ojogua Tupã remimboúpe.

Upe vove Nabucodonosor he’i: “Tojererohory Tupã Sadrac, Mesac ha Abed-Negó Jára, omboúva hemimbou oipe’a haguã hembiguái kuéra jeroviahápe. Ko’ãva ndojapói va’ekue che ha’e haguéicha, ha omanose uvei oñesũ rangue ha omomba’e guasu ambue tupã ndaha’éiva imba’ekuéra.

Tupã Ñandejára Ñe’ẽ.

SALMO ÑEMBOHOVÁI   Dan 3, 52-56

R. Tupã Ñandejára, ndéve romomba’e guasu opa ára.

Ndéve roguerohory, Tupã, ore rukuéra ypykue Jára.

Roguerohory nde Réra Marangatu ha herakuä poräva.

Ndéve romomba’e guasu opa ára. R.

Nde reje rerohory nde Tupao marangatu mimbipápe,

reñe momba’e guasu ha reñe momorã opa ára opa mba’e ha opaichagua ári. R.

Ndé reje rerohory mburuvicha guasúicha reguapýva,

reñe momba’e guasu opa mba’e ha opichagua ári

ha reñe momorã opa ára. R.

Nde reje rohory rehechágui umi ipypukuvehápe,

ha reguapy umi tekove ipepóva ári,

nde reñe momba’e guasu ha reñe momorã opa ára. R.

Nde reje rerohory yvága ha arapýre,

reñe momba’e guasu ha reñe momorã opa ára

opa mba’e ha opaichagua ári. R.

VERSÍCULO ANTES DEL EVANGELIO   Lc 8, 15

Ovy’a ite umi oraháva Tupä Ñandejára ñe’ẽ

ikorasöme omoïre hekopete ha ohecha hembiapo repykue naikane’öigui.

EVANGELIO

Marandu porã Ñandejára Jesucristo rekove ha hemimbo’e San Juan omombe’u háicha   8, 31-42

Upe ramo Jesús he’i umi hese ojerovia va’ekuépe: Peẽ pejapo ramo upe che ha’éva peẽme, peẽ che remimbo’e añetéta. Peikuaáta añetehápe Tupã Ñandejárape, ha upéva pende joráta pe mba’égui pende rerekóva ipo guýpe.

Ha’e kuéra katu he’i ichupe: Ore niko Abraham ñemoñare, ha araka’eve ndoroikói va’ekue avave po guýpe. Mba’e erese oréve, ere ramo rojejorataha?

Jesús he’i ichupe kuéra: Añetéko ha’e peẽme, opa iñangaipáva niko oiko angaipa po guýpe. Peteĩ tembiguái niko ndopytái ijára rógape omano meve. Pe óga jára ra’y katu opyta pe ógape omano meve. Upévare, Tupã Ra’y pende jora ramo pene rembiapo vai po guýgui, añetehápe pene sãso. Che aikuaa peẽ Abraham ñemoñareha. Péicharõ jepe, peẽ che jukase ndaperoviáigui che ñe’ẽ. Che amombe’u peẽme umi mba’e che Ru ohechauka va’ekue chéve. Peẽ katu pejapo pende ru he’i haguéicha peẽme.

Ha’ekuéra he’i ichupe: Abraham niko ore ypykue.

Jesús katu he’i ichupekuéra: Abraham ñemoñare rire añete peẽ, pejapo va’erã mo’ã ha’e ojapo haguéicha. Upéva rangue peẽ che jukase, amombe’u haguére peẽme ñe’ẽ añetegua Tupã Ñandejára he’i va’ekue chéve. Abraham ndaupéichai va’ekue. Peẽ pejapo pende ru ojapo háicha.

Ha’ekuéra he’i Jesúspe: Ore ndaha’éi mitã okarakue. Peteĩnte ore Ru, ha upéva Tupã.

Jesús he’i ichupekuéra: Tupã pende ru rire, che rayhu va’erã mo’ã peẽ. Tupãgui niko che aju, ha ápe aime. Ndajúi che jehegui reínte, Tupã pe che mboúva.

Ñandejára Jesucristo Ñe’ẽ.