LECTURAS DOMINGO DECIMOSEXTA SEMANA

LECTURAS DOMINGO DECIMOSEXTA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Génesis arandukápe oĩ háicha 18, 1-10a

Tupã ojechauka Abrahampe, Mamré ka’aguy ypýpe. Abraham oguapy aja hóga rokẽme ára hakuve jave, asajekue, ojesaupi ha ohecha
mbohapy kuimba’e oñembo’ýva ijypýpe. Ohecha vove ichupekuéra osẽ huguãitĩvo, oñesũ henondépekuéra, omboja isyva yvy rehe, ha he’i: Karai, ani kena rehasátei reguahẽ’ỹre sapy’aite. Tanohẽna peẽme y pejepyhéi haguã, ha pepytu’umi ko yvyra guýpe.

Amoĩta avei peẽme hi’upy pejepy’a joko haguã, peipykúi mboyve pende rape. Tuichaitéma niko che mbojerovia pehasávo ko pende
rembiguái róga ypy rupi. Ha’ekuéra he’i: Néi, ropytáta.

Abraham oike pya’e porã kotýpe ha he’i Sárape: Pya’éke eru 20 kílo trígo ku’i iporãvéva ha ejapo ichugui mbujape. Upéi oho mymba korapýpe, ipojái peteĩ vakara’y kyrỹi porãre ha ome’ẽ hembiguáipe ojuka ha ombojy haguã. Upéi ogueru ichupekuéra kesu pyahu ha kamby upe so’o ka’ẽ reheve. Ha opyta kuarahy ãme hendivekuéra okaru aja hikuái.

Ha’ekuéra oporandu ichupe: ¿Mamópa oime ne rembireko Sara?

Ha’e he’i: Oime kotýpe.

Peteĩ ha’ekuérava he’i: Águi 9 mésepe aju jevýta ha ne rembireko Sara imemby kuimba’éta.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 14 2-5
Opavave: Ñandejára, mávapa oguahẽta nde rógape.

Upe hembiapo porã ha heko jojáva,
upe añete guánte he’íva ipy’aite guive,
upe oñe’ẽ vai’ỹva hapicha rehe. O.

Upe ojapo’ỹva ivaíva hapicha rehe,
upe oiko vai’ỹva hapicha ndive,
upe ndohecha ramoiva hembiapo vaívape,
umi Tupã rehe ojeroviávape omomba’éva. O.

Upe he’íva ojapóva ohasa asy ramo jepe,
pe pláta jeporukápe ojerure’ỹva imba’e’ỹva,
térã plátare omoĩ vai’ỹva hapichápe. O.

LECTURA MOKÕIHA:
Ko’ágã ñahendúta Tupã Ñandejára ñe’ẽ San Pablo ohai va’ekue Colosas guápe 1, 24-28

Che pehenguekuéra: Ko’ãga avy’a umi pende rehehápe ahasa asýva rehe, upéicha ramo niko amoĩmba ahavo che retépe pe Cristo jehasa asykue ohasa’ỹva gueteri, Tupã iglésia rehe, ha’éva hete.

Ñandejára ojapo che hegui iglésia Pytyvõhára, ha’e ome’ẽva chéve ajapo haguã pende rehehápe, amyasãi haguã opa rupi imarandu,
he’iséva, pe imba’e ñemi hetaiterei ára ha ñemoñare pukukue Tupã omongañy va’ekue, ha ko’ágã oikuaaukáva umi imba’évape. Ñandejára oikuaaukase va’ekue ichupekuéra mba’épepa iporãta pe mba’e reta mimbipa oñongatúva upe oñembopy’a peteĩ hague. Ha upe oñembopy’a peteĩ ñemi hague niko Cristo, oĩva pende pype, hese ae oñeha’arõ kuaáva jeiko mimbipa pereko va’erã.

Ore romoherakuã Crístope, roñemoñe’ẽvo ha rombo’évo opavavépe arandu, opavave peho haguã pejavy’ỹ rehe Crístope.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Cf. Lc 8, 15
Aleluia.
“Umi semilla ho’a va’ekue yvy porãme hína umi imarangatúva ha oñemoĩva ohendu ha ojapo pe marandu he’íva, ha oñemohatãgui
hese hi’a porãva”.
Aleluia.

EVANGELIO
Marandu porã Ñandejára Jesucristo rekove ha hemimbo’e San Lucas omombe’u háicha 10, 38-42
Opavave: Romomba’e guasu ndéve, Ñandejára.

Upe ramo ohokuévo Jerusalénpe, Jesús ha idisípulokuéra oguãhẽ peteĩ puéblope. Upépe, peteĩ kuña hérava Marta omoguãhẽ chupekuéra hógape Marta ndive oiko avei ikypy’y hérava María. Ha oho María oguapy Jesús ypýpe ha ojapysaka hína Jesús rehe.

Marta katu hembiapóva hína kosináme ha óga ñemopotĩme hamba’e, upéi oñemboja Jesús rendápe ha he’i chupe:— Mbo’ehára, nde rehechakuaái piko chenteha pe omba’apóva, ha María ndojapoiha mba’eve. Ere chupe ta che pytyvõ.

Jesús ojere he’i chupe:— Marta, Marta. Heta mba’ére niko rejepy’apy rei hína. Ha peteĩ mba’énte tekotevẽ. María oiporavo pe iporãvéva, ha upéva ndoipe’a mo’ãi chugui avave.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.